އިންޑިއާގެ އުއްތަރް ޕްރަދޭޝް ސްޓޭޓުގެ ބުލަންދްޝަހްރުގައި ދަނޑުވެރިންގެ އަތުން ގެރީގެ ކުޑަކަމުދާ ތަކެތި ގަތުމުގެ ޕައިލެޓް މަޝްރޫޢެއް ފަށައިފި އެވެ.

މި މަޝްރޫއު ކުރިޔަށް ގެންދަނީ ސީދާ އެ ސްޓޭޓުގެ ސަރުކާރުންނެވެ. އެ ސްޓޭޓުގައި ވެރިކަން ކުރަނީ އިންޑިއާގައި ވެރިކަން ކުރާ ބޮޑުވަޒީރު ނަރެންދްރަ މޯދީގެ ޕާޓީ ބާރަތިޔަ ޖަނަތާ ޕާޓީ (ބީޖޭޕީ) އިންނެވެ.

Advertisement

ސްޓޭޓް ސަރުކާރުން ބުނެފައިވާ ގޮތުގައި މަޝްރޫޢުގެ ބޭނުމަކީ ދަނޑުވެރިންނަށް ލިބޭ އާމްދަނީ އިތުރުކުރުމާއި ރަށްފުށު ހިސާބުތަކުގެ އަންހެނުންނަށް އެ ތަކެތި ނެގުމުގެ މަސައްކަތުން ނަފާ ހޯދޭނެ މަގު ފަހިކުރުމާއި ކިރު ނުދޭ ގެރީގެ ބެލެހެއްޓުމަށް ޚަރަދު ހަމަޖެއްސުމެވެ. ގެރި ކުޑަކަމުދާ ތަކެތި ބޭނުންކުރާނީ ދަނޑުވެރިކަމުގެ ދާއިރާގެ ފީފާ މާއްދާއެއްގެ ގޮތުގައި ކަމަށާއި ކެމިކަލް ބޭސްތަކުގެ ބަދަލުގައި މި ތަކެތި ބޭނުންކުރެވިދާނެ ކަމަށް ބުނެފައިވެ އެވެ.

ސަރުކާރުން ނިންމާފައިވަނީ އެ މަޝްރޫޢު ކާމިޔާބުވެއްޖެ ނަމަ ރަސްމީ ސިޔާސަތެއް އެކުލަވާލައި މުޅި ސްޓޭޓަށް ފުޅާކުރުމަށް ކަމަށް ރިޕޯޓުތައް ބުނެ އެވެ. ޕައިލެޓް މަޝްރޫއު ފެށީ އެ ސްޓޭޓްގެ އަވަށެއް ކަމަށްވާ ނާރުސައިނާ އަވަށުގައި ހިންގާ ދަނޑުވެރިންގެ ޖަމިއްޔާ (އެފްޕީއޯ) މެދުވެރިކޮށެވެ. ރިޕޯޓުތައް ބުނާގޮތުގައި މިހާތަނަށް މި މަޝްރޫއުގައި 15 އަވަށެއް ބައިވެރިވެއްޖެ އެވެ.

ދުވާލެއްގެ މައްޗަށް ގާތްގަނޑަކަށް 500 ލީޓަރު ނެގޭ އިރު ތަކެތި ރައްކާކުރުމަށް 200 ލީޓަރުގެ ޖާގަ ހުރި ތާނގީ އަވަށްތަކުގައި ވަނީ ބަހައްޓާފައި އެވެ.

މިހާރު ހަމަޖައްސާފައިވަނީ ލީޓަރެއް 10 އިންޑިއަން ރުޕީސްއަށް ވިއްކުމަށެވެ. އަދި ޑިމާންޑު ބޮޑުވުމުން އެ އަގު 20 ރުޕީސްއަށް މަތި ކުރާނެ ކަމަށް ސަރުކާރުން ބުނެފައިވެ އެވެ.

މި މަސައްކަތް ކުރަން 300 އަށްވިރެ ގިނަ އަންހެނުން އަވަށްތަކުގައި ރަޖިސްޓްރީވެފައިވާ ކަމަށާއި މަސައްކަތް ކުރުމުގެ އުޖޫރައެއްގެ ގޮތުގައި ނަގާ ކޮންމެ ލީޓަރަކަށް އެމީހުންނަށް ދެ ރުޕީސް ދޭން ހަމަޖައްސާފައިވެ އެވެ.

ބީޖޭޕީގެ މި މަޝްރޫއަށް އެ ސްޓޭޓްގެ އިދިކޮޅު ސަމާޖްވާދީ ޕާޓީ (އެސްޕީ) އިން ވަނީ ޖޯކު ޖަހައި މަޝްރޫޢަކީ "ސްކޭމެއް" ގެ ގޮތުގައި ސިފަކޮށްފައެވެ. އެ ޕާޓީގެ ތަރުޖަމާނު މުޙައްމަދު އާޒަމް ޚާން ތުހުމަތުކުރި ގޮތުގައި މިއީ އިންތިޚާބުތަކަށް ފައިސާ ހޯދުމަށް ބީޖޭޕީ އިން ރާވައިގެން ހިންގާ ކަމެއް ކަމަށެވެ. އޭނާ ބުނީ ސްޓޭޓުގައި ގެރީގެ ހިޔާތައް ވެސް އެ ތާނގީތަކުގައި ތިބި ގެރިތައް ވެސް ރައްކާތެރި ނޫން ކަމަށާއި މި ސްކީމުން ތަރައްޤީއެއް ނާންނާނެ ކަމަށެވެ.