ސީރިއާގައި ގާތްގަނޑަކަށް 14 އަހަރު ދެމިގެން ދިޔަ ހަނގުރާމައިގެ ތެރޭގައި ހިންގި ޖަރީމާތަކާ ގުޅިގެން އެ ޤައުމުގެ ކުރީގެ ރައީސް ބައްޝާރުލް އަސަދާއި އޭނާގެ ޢާއިލާގެ ދެ މެންބަރަކަށް ދިމިޝްޤުގެ ޖިނާއީ ކޯޓުން މިއަދު މަރުގެ ޙުކުމް އިއްވައިފިއެވެ.

2024 ވަނަ އަހަރުގެ ޑިސެމްބަރު މަހު ވެރިކަމުން ވައްޓައިލުމާ ގުޅިގެން ރަޝިޔާއަށް އަރުވާލެވިގެން ދިރިއުޅެމުންދާ ބައްޝާރުލް އަސަދުގެ މައްޗަށް ކޯޓުން ސާބިތުކުރީ ގަސްދުގައި މީހުން މެރުމާއި އަނިޔާކުރުމާއި އިންސާނިއްޔަތާ ދެކޮޅު ޖަރީމާ ހިންގި ކަމުގެ ކުށެވެ. މި ހުކުމް އިއްވީ ގައިރު ހާޒިރުގައި އެވެ.

Advertisement

ރަޝިޔާގައި ފިލައިގެން ދިރިއުޅެމުންދާ އޭނާގެ ކޮއްކޮ މާހިރުލް އަސަދުގެ މައްޗަށް ވެސް ގަސްދުގައި މީހުން މެރުމާއި އަނިޔާކުރުމުގެ ކުށް ސާބިތުވެ މަރުގެ ޙުކުމް އިއްވައިފައިވެއެވެ. ސީރިއާގެ ދެކުނުގެ ދަރުޢާ ޕްރޮވިންސްގެ ކުރީގެ ސިޔާސީ ސެކިއުރިޓީ ވެރިޔާ ޢާޠިފް ނަޖީބަށް ވެސް ކޯޓުން މަރުގެ ޙުކުމް އިއްވީ އިންސާނިއްޔަތާ ދެކޮޅު ޖަރީމާ ހިންގި ކަމުގެ ކުށް ސާބިތުވެގެންނެވެ.

މީހުން މެރުމާއި 15 އަހަރު ނުފުރޭ ކުޑަކުދިން ގަސްދުގައި މެރުމާއި އަނިޔާކޮށް މީހުން މެރުމުގެ ކުށްތައް އޭނާގެ މައްޗަށް ސާބިތުވެފައިވެއެވެ. މިދިޔަ އަހަރުގެ ޖެނުއަރީ މަހު ސީރިއާގެ އިންތިޤާލީ ސަރުކާރުން ހައްޔަރުކޮށްފައިވާ ނަޖީބު ޙުކުމް އިއްވިއިރު ހުރީ ޤައިދީންގެ ހެދުމެއް ލައިގެން ކޯޓުގެ ކޮށީގެ ތެރޭގައެވެ. 2011 ވަނަ އަހަރު ދަރުޢާގައި މުޒާހަރާކުރި މީހުންނާ ދެކޮޅަށް ލޭ އޮހޮރުވައިގެން ހިންގި ރަޙުމެއް ނެތް އޮޕަރޭޝަނަކީ ފަހުން ސީރިއާގެ ދާޚިލީ ހަނގުރާމައަށް މަގުފަހިވި ހާދިސާއެވެ.

މި ޝަރީޢަތަކީ 2024 ވަނަ އަހަރު ވެރިކަން ބަދަލުވީ ފަހުން ސީރިއާގެ އިންތިޤާލީ ސަރުކާރުގެ ދަށުން ކުރީގެ ސަރުކާރުގެ ބޭފުޅުންގެ މައްޗަށް ހިންގި ފުރަތަމަ ޝަރީޢަތެވެ.