ތ. މަޑިފުށިން ފުރައިގެން ހުވަދު އަތޮޅަށް ދަތުރު ކުރަނިކޮށް އަޑިއަށް ދިޔަ ހާދިސާގައި ގެއްލުނު ތިން މީހުން ހޯދުމުގެ މަސައްކަތުގައި ކަން ހިނގައިދިޔަ ގޮތް ސާފު ނުވަނީސް އިހުމާލުގެ ވާހަކަ ދެއްކުން ރަނގަޅު ނޫން ކަމަށް ހޯމް މިނިސްޓަރު ޢަލީ އިހުސާން މިއަދު ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ކެންދޫ ދާއިރާގެ މެންބަރު މައުރޫފު ޒާކިރު ކުރެއްވި ސުވާލަކަށް ޖަވާބު ދެއްވަމުން ވަޒީރު ވިދާޅުވީ ގެއްލިފައިވާ ފަރާތްތައް ހޯދައި ސަލާމަތްކުރުމުގެ ޒިންމާ އޮންނަނީ ޑިފެންސް މިނިސްޓްރީގެ ދަށުގައި ކަމަށެވެ. ނަމަވެސް މި ހާދިސާގައި ފުލުހެއް ވެސް ގެއްލިފައިވާތީ ދައުލަތުން މިހާރު އެންމެ ބޮޑު އިސްކަމެއް ދީގެން ހިންގާ އެއް އޮޕަރޭޝަނަކީ އެއީ ކަމަށް ވިދާޅުވިއެވެ.

Advertisement

މިނިސްޓަރު ވިދާޅުވީ އެ ހާދިސާ އާއި ގުޅިގެން އިހުމާލުގެ ވާހަކަ ދައްކަން އެންމެ ރަނގަޅު ވަގުތު އަދި ނުޖެހޭ ކަމަށެވެ. ސަބަބެއް ކަމަށް ވިދާޅުވީ ހާދިސާ ހިނގި ގޮތް އަދި ނޭނގޭތީ ކަމަށާއި އެމީހުންވެސް ފެނިފައި ނުވާ ކަމަށެވެ. މިނިސްޓަރު ވިދާޅުވީ ގެއްލުނު މީހުން ހެޔޮ ހާލުގައި ތިއްބާ ފެނުމަކީ އެންމެންގެ ވެސް ދުޢާ ކަމަށެވެ.

އެ ހާދިސާ އާއި ގުޅިގެން އެންމެ ފަހުން ސަރުކާޜުން ވަނީ ތިން މީހުން ހޯދުމަށް ބޭރުގެ އެހީ ހޯދަމުންދާ ކަމަށް ބުނެފައިވެ އެވެ. އެމްއެންޑީއެފުން ބުނީ ދޯނި އަޑިއަށް ދިޔަ ސަރަހައްދުުގައި 1645 މީޓަރު  ހުންނާނެތީ ދޯނި ފެންމައްޗަށް ނެގުމަކީ ކުރެވޭނެ ކަމެއް ނޫން ކަމަށެވެ.

މި ހާދިސާގައި ގެއްލިފައިވަނީ ދޯނީގެ ކެޕްޓަނާއި އެމީހުންނަށް އެހީތެރިކަން ފޯރުކޮށްދޭން ދިޔަ ސިފައިންގެ މީހަކާއި ފުލުހެކެވެ. އެ ތިން މީހުން ގެއްލުނީ ދޯނި އަޑިއަށް ގޮސްދާނެތީ ފެން ހިއްކަން ދޯނީގައި ތިއްބަ ޖެހި ރާޅަކާއި އެކު ދޯނި ބަންޑުން ޖަހާލައި އަޑިއަށް ދިއުމުންނެވެ.

މި ހާދިސާގައި ދޯނިން ދަތުރު ކުރި އަނެއް ހަތް މީހުން ވަނީ ސަލާމަތް ކޮށްފައި އެވެ. އެއީ ހުސް ބިދޭސީންނެވެ.