ދޮޅު އަހަރު ކުރިން ތިން ވުޒާރާއެއް ހިންގި ގްރީން ބިލްޑިން ކޮމްޕްލެކްސްގައި ހިނގި އަލިފާނުގެ ހާދިސާގެ ތަޙުޤީޤު ނިމި އެއާ ކޮންޑިޝަނަރުތަކުގެ ވަޔަރުތަކެއްގައި ރޯވެގެން ހިނގި ހާދިސާއެއް ކަމަށް ހޯމްލޭންޑް ސެކިއުރިޓީ ވަޒީރު ޢަލީ އިޙްސާން މިއަދު ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ވައިކަރަދޫ ދާއިރާގެ މެންބަރު އަދި އެމްޑީޕީގެ ޕާލަމެންޓަރީ ގްރޫޕުގެ ޑެޕިއުޓީ ލީޑަރު ޙުސައިން ޒިޔާދު (ފިއްޓޭ) ކުރެއްވި ސުވާލަކަށް ޖަވާބު ދެއްވަމުން ވަޒީރު ވިދާޅުވީ ބަޔަކު ގަސްދުގައި ރޯކުރި ކަމުގެ އެއްވެސް ހެއްކެއް ތަޙުޤީޤަށް ފާހަގަނުވާ ކަމަށެވެ. ފުލުހުންގެ ބޮޑީކެމް ފުޓޭޖުން ވެސް އެކަން ކަށަވަރުވާ ކަމަށް އިޙްސާން ވިދާޅުވިއެވެ.

Advertisement

"ކަރަންޓުގައި ރޯވެފައި އެންމެ ފުރަތަމަ އިނީޝިއަލް ސްޓޭޖުގައި ފުލުހުން އެ ތަނަށް އެޓެންޑުވެގެން ފުލުހުންގެ ބޮޑީކޭމް ފުޓޭޖުން އަޅުގަނޑުމެންނަށް ސާބިތު އެބަ ވޭ އެންމެ ފުރަތަމަ އަލިފާން ރޯވެފައިވަނީ ސީލިންގަނޑު ތެރޭގައި އެއާ ކޮންޑިޝަންތެރޭގައި ހުރި ވަޔަރުތަކެއްގައި ކަން" އޭނާ ވިދާޅުވިއެވެ.

މި ހާދިސާއާ ގުޅޭ އިތުރު ތަފުސީލު ދެއްވުމަށް ނޫސްވެރިންގެ ބައްދަލުވުމެއް ބާއްވަވާނެ ކަމަށް ވެސް ވަޒީރު ވިދާޅުވިއެވެ.

2024 ވަނަ އަހަރުގެ ޑިސެމްބަރު 12 ގައި ހިނގި މި ހާދިސާގައި ހައުސިން ވުޒާރާއާއި އިންފްރާސްޓްރަކްޗާ ވުޒާރާއާއި އެންވަޔަރަމަންޓް ވުޒާރާ ހިންގި އިމާރާތަށް ބޮޑެތި ގެއްލުންތަކެއް ލިބި ބޭނުންނުކުރެވޭ މިންވަރަށް އެ ތަން އަނދައިފައިވެއެވެ. އެ އިމާރާތުގައި މާލޭ ސިޓީ ކައުންސިލުގެ އިދާރާއެއް ވެސް ހިންގާފައިވާ އިރު ގިނަ ޢަދަދެއްގެ ލިޔެކިޔުންތައް ވެސް ވަނީ އެ ހާދިސާގައި އަނދައިފައެވެ. މިއީ ދިވެހި ދައުލަތުގެ އިމާރާތަކަށް އަލިފާނުގެ ހާދިސާއެއްގައި ލިބުނު އެންމެ ބޮޑު އެއް ގެއްލުމެވެ.

ހާދިސާ ހިނގި ދުވަސްވަރު މަޢުލޫމާތު ހާމަނުކުރާތީ ބޮޑެތި ތުހުމަތުތަކެއް ކުރެވުނެވެ. ކުރީގެ ރައީސް ޢަބްދުﷲ ޔާމީން އޭރު ވިދާޅުވީ އެ ހާދިސާއާ ގުޅޭ ގޮތުން ޖަވާބު ނުލިބޭ ސުވާލުތައް ގިނަ ކަމަށާއި ގެއްލުނީ ކޮން ލިޔެކިޔުންތަކެއް ކަން ވެސް ސާފުކޮށްދޭން ބޭނުންނުވާ ކަމަށެވެ.