ޗައިނާގައި އެއް ދަރި ސިޔާސަތުގެ ނަތީޖާއެއްގެ ގޮތުން އުފެދިފައިވާ ޖިންސީ ނިސްބަތުގެ ތަފާތުކަމުގެ ފައިދާ ނަގައިގެން ކައިވެނި ކުރާނެ ބައިވެރިން ހޯދައިދޭ ކުންފުނިތަކުން ފިރިހެނުން އެއްކޮށްފައި ހުންނަ ފައިސާ ފޭރޭ މައްސަލަތައް އިތުރުވެ ދައުލަތުގެ ފަސް އިދާރާއެއް ގުޅިގެން އެކަމާއި ދެކޮޅަށް ބޮޑު އޮޕަރޭޝަނެއް ފަށައިފި އެވެ.

ޗައިނާގައި ފިރިހެނުންގެ އާބާދީ އަންހެނުންނަށް ވުރެ 30 މިލިއަން އިތުރެވެ. އެ ޤައުމުގެ ކޮމިއުނިސްޓް ޕާޓީން ޒަމާންތަކެއް ވަންދެން ދެމެހެއްޓި އެއް ދަރި ގަވާއިދާއި ފިރިހެން ކުދިންނަށް ދެވޭ އިސްކަމުގެ ސަބަބުން އަންހެނުންގެ ނިސްބަތް ބޮޑުތަނުން ދަށްވެ ކައިވެނީގެ ބާޒާރެއް އޮންނަނީ ހުޅުވިފައިވެއެވެ.

Advertisement

ވަކީން ޚާއްސަކޮށް ކުދި ރަށްރަށާއި ރަށްފުށު ސަރަޙައްދުތަކުގައި ދިރިއުޅޭ 30 ގެ ފަހުކޮޅުގައި ތިބި ފިރިހެނުންނަށް ބައިވެރިން ހޯދުން ވެފައި ވަނީ ވަރަށް ދަތި ކަމަކަށެވެ.

ތަފާސް ހިސާބުތަކާއި ހަވާލާދީ ރިޕޯޓުތައް ބުނާގޮތުގައި 2024 ވަނަ އަހަރުގެ ޖެނުއަރީން ފެށިގެން 2025 ވަނަ އަހަރުގެ މާރިޗާ ދެމެދު މި ދާއިރާއާ ގުޅުންހުރި ކުށްތަކުގައި 1,546 މީހެއްގެ މައްސަލަ ޕްރޮސެކިއުޓަރުން ބެލި އެވެ. މީގެ ތެރޭގައި ޕާޓީ ކުރާ ތަންތަނުގައި ތިބޭ އަންހެން ވެއިޓަރުން ބޭނުން ބޭނުކޮށްގެން ފިރިހެނުން ފޭރޭ މައްސަލަތައްވެސް އެހާ ގިނަ ކަމަށްވެ އެވެ.

ލަނޑުލިބުނު ބައެއް މީހުން މީޑިއާގައި ބުނީ އެމީހުން ކައިވެންޏަށް އަންހެން މީހާގެ އިތުރުން އެޖެންސީއަށް ފަސް ލައްކައަށްވުރެ ގިނަ ޔުއާން ހަރަދު ކުރި ކަަމަށެވެ. އެކަމަކު ކައިވެނި ކުރިތާ ގިނަ ދުވަހެއް ނުވެ އަންހެނުން ދައްކަން ޖެހޭ ލޯނު ހުރި ކަމަށްބުނެ މީހުން ގުޅައި އެމީހުންގެ އަތުން ފައިސާ ފޭރެން ފެށި ކަމަށެވެ.

އަދި ފަހުން އެނގުނު ގޮތުގައި އެމީހުންނަށް ކައިވެނި ކުރެވުނު މީހުންނަކީ އޭގެ ކުރިން އެތައް ކައިވެންޏެއް ކޮށް ދަރިން ލިބިފައިވާ މީހުން ކަމެވެ. އަދި ޖިންސީ ގޮތުން ފެތުރޭ ބަލިތައް ޖެހިފައިވާ މީހުންކަންވެސް ފަހުން އެނގުނު ކަމަށެވެ.

މިފަދަ ކަންކަން އިތުރުވެ ޗައިނާ ފިރިހެނުންގެ މެދުގައި ހާސްކަން އިތުރުވެ އާއިލާއިން އެމީހުން ކުށްވެރި ކުރުމުގެ މައްސަލަތައް އިތުވުމުން ކައިވެނީގެ މައްސަލަތަކުގައި ނަފްސާނީ މައްސަލަތައް ފިރިހެނުންގެ މެދުގައި އިތުރުވެފައިވާކަމަށް ދިރާސާތަކުން ދައްކައެވެ.

ބައެއް ފިރިހެނުންދަނީ އެމީހުން އަތުން ގެއްލުނު ފައިސާ ހޯދުމަށް މަސައްކަތްވެސް ކުރަމުންނެވެ. އެގޮތުން ބައެއް އެޖެންސީތަކުގެ ވެރިންގެ މައްސަލަ ފުލުހުންނަށް ހުށަހަޅައި ވަކީލުންގެ އެހީތެރިކަން ހޯދަމުންނެވެ. ނަމަވެސް ވަކީލުން ބުނަމުންދަނީ ކައިވެނީގެ ނަމުގައި ހިންގާ މިފަދަ ޖަރީމާތަކަށް ދައުވާ ކުރަން ދަތިކަމަށެވެ.

މި ބާވަތުގެ ޖަރީމާތައް ޗައިނާ ސަރުކާރުގެ ސަމާލުކަމަށް އައިސް މި މަހު ފެށި ޤައުމީ ފެންވަރުގެ ކެމްޕޭންގެ ނަތީޖާ ނުކުންނާނެ ގޮތެއް އަދި ސާފު ނުވާ ކަމަށް ރިޕޯޓުތައެް ބުނެ އެވެ.