އިންޑިއާގެ އުއްތަރަހާންދު ސްޓޭޓުގެ ނީތީ ވެލީ ސަރަހައްދަށް ބޯކޮށް ވާރޭ ވެހި ކޯރެއްގެ ފެންގަނޑު އުފުލުމާ ގުޅިގެން އުފެދުނު ގަދަ އޮއިވަރުގައި ޖެހި ބުރިޖެއް ވެއްޓިއްޖެއެވެ.

ޗަމޯލީ ޑިސްޓްރިކްޓުގެ ދަށުން ހިންގާ މި ވާދީގައި ހުރި ދަގަނޑު ބުރިޖުގައި ކިސަޑާ އެކުވެފައިވާ ބާރުގަދަ ފެންގަނޑު ޖެހުނީ ވަރަށް ބޮޑު ބާރުމިނެއްގައި ކަމަށް ރިޕޯޓުތައް ބުނެ އެވެ.

Advertisement

ބްރިޖު ވެއްޓޭތަން ފެންނަ ވީޑިއޯ މީޑިއާގައި އާންމުވެފައިވާއިރު ބްރިޖު ވެއްޓުން ގަޑީގައި ބްރިޖު މަތީގައި މީހުން ނެތް ނަމަވެސް އެ ސަރަހައްދުގައި ގިނަ ބަޔަކު ތިބިތަން ފެނެ އެވެ.

އާންމުވެފައިވާ ވީޑިއޯއިން ފެންނަ ގޮތުގައި މަދު ސިކުންތުކޮޅެއްގެ ތެރޭގައި ފެނުގެ ބާރުގައި ބުރިޖު ކޯރުގެ އައްސޭރިފަށަށް ފެންގަނޑާއި އެކު ދަމައިގެންނަ މަންޒަރު ފެނެއެވެ. މި ހާދިސާ ހިނގި ބްރިޖު ހުރަސް ކުރަން ތައްޔާރުވެފައި އޮތް ޓްރަކެއް ސަލާމަތްވެފައިވަނީ ކިރިޔާ އެވެ.

މި ބްރިޖަކީ އެ ސަރަހައްދާއި ނީތީ ވެލީގެ ވެރި ރަށާއި ގުޅުވައިދޭ ބްރިޖެވެ. ރިޕޯޓުތައް ބުނާގޮތުގައި މިހާރު އެ ސަރަހައްދުގެ މީހުންނަށް ވެރި ރަށަށް ދެވޭނެ ގޮތެއް ނެތެވެ.

ކަމާ ބެހޭ އިދާރާތަކުން ވަނީ ހާލަތު ރަނގަޅުވެ ރައްކާތެރިކަމުގެ ޔަގީންކަން ލިބެންދެން އެ ސަރަހައްދަށް ދަތުރުނުކުރުމަށް އިލްތިމާސްކޮށްފައެވެ. ހަމަ އެހެންމެ ފެންގަނޑު އިތުރަށް އުފުލުމުގެ ނުރައްކާ އަދިވެސް އޮތުމުން ކޯރާއި ފެންއާރުތަކުގެ އައްސޭރިފަށުގައި ދިރިއުޅޭ މީހުން ރައްކާތެރި ދުރުމިނެއް ބެހެއްޓުމަށް ވެސް ވަނީ އެދިފައެވެ.

އުއްތަރަކަންދު ޑިޒާސްޓާ މެނޭޖްމެންޓް އެންޑް ރީހެބިލިޓޭޝަން ސެކެޓްރީ ވިނޯދު ކުމާރު ސުމަން ބުނީ އާދީއްތަ ދުވަހުގެ ރެއިން ފެށިގެން މެދުކެނޑުމެއް ނެތި ވާރޭ ވެހެމުން ދާ ކަމަށެވެ. ވާރޭގެ އަސަރުކޮށްފައި ވަނީ ޑެހެރާދޫން ބާގެޝްވާރު ނައިނީޓާލް އަދި ޗަމްޕާވަތު ހިމެނޭ ސަރަހައްދުތަކަށެވެ.

ބިންގަނޑު ކެނޑުމުގެ ނުރައްކާ ބޮޑު ސަރަހައްދުތަކުގައި ހޭލުންތެރިކުރުވުމުގެ ޕްރޮގްރާމްތައް ހިންގައި މި ފަދަ ހާލަތެއް ކުރިމަތިވާ ވަގުތު ޢަމަލުކުރާނެ ގޮތް ރައްޔިތުންނަށް ކިޔައިދެމުންދާ ކަމަށް ވެސް ސުމަން ފާހަގަކުރިއެވެ.