ތ. މަޑިފުށިން ފުރައިގެން ހުވަދު އަތޮޅަށް ދަތުރު ކުރަނިކޮށް "ފްރެންޑްސް 4" ދޯނި ބަންޑުން ޖަހާލައި އަޑިއަށް ދިޔަ ހާދިސާގައި ގެއްލުނު ތިން މީހުން ހޯދަން ބޭރުގެ އެހީތެރިކަން ހޯދަން ނިންމައިފި އެވެ.

މި ހާދިސާގައި ގެއްލިގެން ހޯދަމުން ދަނީ 33 އަހަރުގެ ޕޮލިސް ސާޖަންޓް އަލީ ނާފިއުއާއި 39 އަހަރުގެ އެމްއެންޑީއެފް ސްޓާފް ސާޖަންޓް އިބްރާހިމް އަހުމަދާއި، އަޑިއަށް ދިޔަ ދޯނީގެ ކަކެޕްޓަން ތ. މަޑިފުށީ 35 އަހަރުގެ މުހައްމަދު ހަމްދޫނެވެ. މި ހާދިސާ ހިނގީ މިދިޔަ ބުދަ ދުވަހުގެ ރޭ އެވެ.

Advertisement

ފޮރިން މިނިސްޓްރީން ރޭ ބުނީ ތިން މީހުން ގެއްލުނު ހާދިސާއާ ގުޅިގެން ކަމާގުޅޭ އިދާރާތާ އެކު މަސައްކަތް ކުރަމުން އަންނަ ކަމަށާއި މި ވަގުތުު އެންމެ އިސްކަން ދެނީ އެ މީހުން ހޯދަން ކަމަށެވެ. 

މި އޮޕަރޭޝަނަށް ބޭނުންވާ އިތުރު އެހީތެރިކަމާއި ފަންނީ އެއްބާރުލުން ހޯދުމަށާއި އަޑިއަށް ދިޔަ އުޅަނދާ ގުޅޭގޮތުން ކުރަންޖެހޭ މަސައްކަތްތަކަށް ބޭރުގެ ގައުމުތަކާ ގުޅިގެން ދަނީ މަސައްކަތް ކުރަމުން ކަމަށް ބުނެފައި އެވެ.

ގެއްލުނު ފަރާތްތައް ހޯދުމާ ގުޅޭ ހުރިހާ ކަމެއްގައި ކަމާ ބެހޭ އެންމެހައި އިދާރާތަކާއި ބައިވެރީންނާ ގުޅިގެން ކުރެވެން ހުރި ކޮންމެ މަސައްކަތެއް ކުރަމުން ގެންދާނެ ކަމަށް އެ މިނިސްޓްރީން ބުންޏެވެ.

އެމްއެންޑީއެފުން ބުނީ އެ ދޯނި ބަންޑުން ޖަހާލީ ގއ. ކުޑަލަފަރީގެ 4.1 ނޯޓިކަލް މޭލު ބޭރުން ކަމަށެވެ. އެ ސަރަހައްދުގެ ފުންމިނުގައި 1،645 މީޓަރު (5،489 ފޫޓު) ހުންނާނެ ކަމަށް ވަނީ ލަފާކޮށްފަ އެވެ. އެ ފުން މިނުގައި ދޯނި އޮތް ނަމަ މައްޗަށް ނެގުމަކީ ކުރެވޭނެ ކަމެއް ނޫން ކަމަށް ވެސް އެމްއެންޑީއެފުން ބުނެފައިވެ އެވެ.

ދޯނި ބަންޑުން ޖަހާލައި އަޑިއަށް ދިޔަ އިރު އެ ތިން މީހުން ތިބީ ދޯނިން ދިޔަ ހިއްކަން ކަމަށްވެ އެވެ.