ހުޅުމާލޭ ހޮސްޕިޓަލުގެ މުވައްޒަފަހު ބަލިމީހަކަށް ޖިންސީ ގޯނާކުރި ކަމަށް ބުނެ ސޯޝަލް މީޑިއާގައި ދައުރުވަމުންދާ ވާހަކަތައް އެ ހޮސްޕިޓަލުން ދޮގުކޮށްފިއެވެ.

މިއަދު ސޯޝަލް މީޑިއާގައި އާންމު ކުރި ޕޯސްޓެއްގައި ވަނީ އެ ހޮސްޕިޓަލަށް ފަރުވާ ހޯދަން ދިޔަ ބަލި މީހަކަށް ޑޮކްޓަރަކު ޖިންސީ ގޯނާ ކުރި ކަމަށް ތުހުމަތުކޮށް އެވާހަކަ ލިޔެފައި އެވެ.

Advertisement

އެ ހޮސްޕިޓަލުން ނެރުނު ނޫސް ބަޔާނެއްގައި ބުނެފައިވާ ގޮތުގައި ޑޮކްޓަރަށް ދައްކަން ދިޔަ މީހަކާ މެދު ޖިންސީ ގޯނާގެ އަމަލެއް ހިންގި ކަމަށް ބުނެ އޮންލައިންކޮށް ފެތުރެމުންދާ ވާހަކަތަކަކީ އެ ހޮސްޕިޓަލަށް ލިބިފައިވާ މަޢުލޫމާތާ ފުށުއަރާ ޙަޤީޤަތެއް ނެތް ވާހަކަތަކެއް ކަމަށެވެ.

އެ ބަޔާނުގައި ހުޅުމާލޭ ހޮސްޕިޓަލުން ވަނީ ބަލިމީހުންގެ ރައްކާތެރިކަމާއި ކަރާމާތާއި އިތުބާރު ދެމެހެއްޓުމަކީ ޚިދުމަތް ދިނުމުގައި އެންމެ ބޮޑު އިސްކަމެއް ދޭ ކަންކަން ކަމުގެ ޔަޤީންކަން ދީފައެވެ. ބަލިމީހުން ހުށަހަޅާ ކޮންމެ މައްސަލައެއް ވެސް ނާޒުކު ކަމެއްގެ ގޮތުގައި ބަލައި ޤާނޫނީ އޮނިގަނޑާއި ފަންނީ މިންގަނޑުތަކާ އެއްގޮތަށް ފިޔަވަޅު އަޅާ ކަމަށް ވެސް ބަޔާނުގައި ފާހަގަކޮށްފައިވެއެވެ.

ބަޔާނުގައި ބުނީ ދައުލަތުގެ ޞިއްޙީ މުއައްސަސާއެއް ކަމުން ބަލިމީހުންނާއި މުވައްޒަފުންގެ ޒާތީ މަޢުލޫމާތު ޤާނޫނީ ގޮތުން ރައްކާތެރިކޮށް ސިއްރު ހިފެހެއްޓުން ކަށަވަރުކުރާނެ ކަމަށެވެ. އެ ހޮސްޕިޓަލުން ބުނީ ކަށަވަރު ނުވާ ވާހަކަ ނުފެތުރުމަށް ޢާންމުންނަށް އިލްތިމާސް ކުރާ ކަމަށެވެ.

އެ ބަޔާނުގައި ވަނީ ޙަޤީޤަތް ބެލުމެއް ނެތި ފަތުރާ މަޢުލޫމާތުގެ ސަބަބުން ޚިދުމަތް ހޯދާ ފަރާތްތަކާއި ޞިއްޙީ ޚިދުމަތްތެރިންނާއި އެ ފަރާތްތަކުގެ ޢާއިލާތަކަށް ނަފްސާނީ ނުތަނަވަސްކަން ލިބޭ ކަމުގެ ކަންބޮޑުވުން ފާޅުކޮށެވެ.

ހުޅުމާލޭ ހޮސްޕިޓަލަކީ ބަލިމީހުންނަށް އަޚުލާޤީ އަދި ފަންނީ މިންގަނޑުތަކާ އެއްގޮތް ރައްކާތެރި ޞިއްޙީ ޚިދުމަތެއް ދިނުމުގައި ދެމިއޮންނާނެ ތަނެއް ކަމަށް އެ ހޮސްޕިޓަލުން ބުނެފައިވެއެވެ.