ތައިލެންޑުގެ ވެރިރަށް ބެންކޮކް ކައިރީގައި ހުންނަ ދެބްސިރިން ސްކޫލުގެ 14 އަހަރުގެ ދަރިވަރަކު އެ ކުއްޖާގެ ގެއާއި ސްކޫލުގައި ބަޑިން ހަމަލާދީ މަރާލި މީހުންގެ އަދަދު ހަތަކަށް އަރައިފި އެވެ.

މި ހާދިސާގެ ރިޕޯޓު ފުރަތަމަ ކުރި އިރު ބަޑީގެ ހަމަލާގައި މަރުވެފައިވަނީ އެންމެ ޓީޗަރެކެވެ. ނަމަވެސް މިހާރު މި ހާދިސާގައި އިތުރު މައުލޫމާތުތައް ވަނީ ހާމަކޮށްފައި އެވެ.

މި ހާދިސާގައި ހަމަލާ ދިން ދަރިވަރު ފުރަތަމަ ބަޑިޖެހީ އެ ކުއްޖާ އެކުގައި ދިރިއުޅެމުން ދިޔަ ކާފައާއި މާމަ ގަޔަށެވެ. އެ ދެ މީހުން މަރައިލުމަށް ފަހު ސްކޫލަށް ގޮސް ދިން ބަޑީގެ ހަމަލާތަކުގައި ފަސް ޓީޗަރަކު މަރާލި އެވެ. އަދި އެ ކުއްޖާ އަމިއްލައަށް ވަނީ މަރުވެފައި އެވެ.

ބެލެވޭ ގޮތުގައި މިއަދު ހެނދުނު 10:00 ހާއިރު ފެށި މި ހަމަލާތަކުގައި 23 މީހަކަށް އަނިޔާ ލިބުނެވެ. އޭގެ ތެރެއިން ނުވަ މީހެއްގެ ހާލު ސީރިއަސް ކަމަށް ތައިލެންޑުގެ ކަމާ ބެހޭ ފަރާތްތަކުން ބުނެއެވެ.

މި ހާދިސާއާއި ގުޅިގެން އެ ދަރިވަރުގެ ބައްޕަ ވަނީ މީޑިއާގެ ކުރިމަތީގައި ރައްޔިތުންގެ ކިބައިން މައާފަށް އެދިފައި އެވެ. އޭނާ ބުނީ ދަރިފުޅުގެ އަމަލާއި މެދު ހިތާމަކޮށް މަރުވި މީހުންނާއި ޒަހަމްވި މީހުންގެ އާއިލާތަކަށް ހަމްދަރުދީ ފޮނުވާ ކަމަށެވެ. އެ ކުއްޖާގެ މަންމަ ވަނީ އެކަމާ ހިތާމަ ކުރާ ކަމަށް ބުނެ، މީޑިއާގައި ވާހަކަ ދައްކަން ނުކެރޭނެ ކަމަށް ބުނެފައި އެވެ.

ތައިލެންޑު ފުލުހުންގެ ވެރިޔާ ޖެނެރަލް ކިއްތިރެޓް ޕަންފެޓް ބުނެފައިވާ ގޮތުގައި ހަމަލާދިން ކުއްޖާ ޖެހި ވަޒަންތައް ވަރަށް ބޮޑަށް ޓާގެޓަށް އަމާޒުވެފައި ހުރި ކަމަށެވެ. އެގޮތުން ގިނަ ވަޒަން އަރާފައި ހުރީ މަރުވި މީހުންނާއި ޒަހަމްވި މީހުންގެ ހަށިގަނޑުގެ ނާޒުކު ދިމާތަކަށް ކަމަށް ބުންޏެވެ.

އޭނާ ބުނީ ހަމަލާތައް ދޭން ދަރިވަރު ގެންގުޅުނު ބަޑިއަކީ ހަމަލާ ދިން ކުއްޖާގެ ކާފަގެ ބަޑިއެއް ކަމަށެވެ. މި ހާދިސާ އާއި ގުޅުން ހުރި ކަންކަން ބަލަމުންދާ ކަމަށާއި މިހާތަނަށް ބެލި ބެލުމުން ވައްކަމުގެ ހެއްކެއް ނެތް ކަމަށް އޭނާ ބުނެއެވެ. 

ތައިލެންޑުގެ ބޮޑުވަޒީރު އަނުތިން ޗާންވީރަކުލް ނޫސްވެރިންނާ ވާހަކަ ދައްކަމުން ވިދާޅުވީ ހަމަލާދިން ކުއްޖާ އަމިއްލައަށް ބަޑިޖެހި ވަގުތު 30 އަށް ވުރެ ގިނަ ވަޒަން ބާކީ އޮތް ކަމަށެވެ. އެ ހަމަލާއަކީ ރާވައިގެން ހިންގި ކަމެއް ކަމަށާއި "ސާފު ލަނޑުދަނޑިތަކެއް" ކަނޑައަޅައިގެން ކުރި ކަމެއް ކަމަށް ވެސް ބޮޑުވަޒީރު ވިދާޅުވި އެވެ.

ބޮޑުވަޒީރު ވިދާޅުވީ މިއީ ވެގެން ނުވާނެ ކަމެއް ކަމަށާއި ސަރުކާރުން ރައްޔިތުން ހަތިޔާރު ގެންގުޅުން ހުއްދަ ނުކުރަނީ މި ސަބަބަށް ޓަކައި ކަމަށެވެ. ހަތިޔާރާ ބެހޭ އައު ޤާނޫނެއް ހުށަހެޅުމަށް ނިންމާފައިވާ ކަމަށާއި އެ ޤާނޫނުގެ ދަށުން ބަޑި ގެންގުޅެވޭނީ ހަމައެކަނި ޑިއުޓީގައި ތިބޭ ސަރުކާރު މުވައްޒަފުންނަށް އެކަނިކަމަށް ކަނޑައެޅުމަށް މަޝްވަރާ ކޮށްފައިވާ ކަމަށް ވެސް ބޮޑުވަޒީރު ވިދާޅުވި އެވެ.

މިއީ މި އަހަރު ތައިލެންޑުގެ ސްކޫލެއްގައި ބަޑިޖެހި ދެ ވަނަ ފަހަރެވެ. މިދިޔަ ފެބްރުއަރީ މަހު އެ ޤައުމުގެ ދެކުނުގައި ހުރި ސްކޫލެއްގައި ފުރާވަރު އުމުރުގެ ކުއްޖަކު ބަޑި ޖެހި ހާދިސާގައި ޕްރިންސިޕަލް މަރުވެ، ދެ ދަރިވަރަކު ޒަޚަމްވެފައިވެއެވެ.

ތައިލެންޑުގެ ޤާނޫނުގައި ހުއްދަ ނެތި ހަތިޔާރު ގެންގުޅޭ މީހުންނަށް 10 އަހަރާ ހަމައަށް ޖަލު ހުކުމް ކުރެވެއެވެ. ނަމަވެސް އެ ޤާނޫނު ތަންފީޒުކުރުމުގައި މައްސަލަތައް ހުރި ކަމަށް ރިޕޯޓުތައް ބުނެއެވެ. ދެކުނު އިރުމަތީ އޭޝިއާގައި ރައްޔިތުންގެ ބަޑި ގެންގުޅުން އެންމެ ގިނަ ޤައުމުތަކުގެ ތެރޭގައި ތައިލެންޑު ހިމެނޭ އިރު އެ ޤައުމުގައި ގެންގުޅޭ ބަޑީގެ ގާތްގަނޑަކަށް 40 އިންސައްތައަކީ ޣައިރު ޤާނޫނީ ހަތިޔާރު ކަމަށް ލަފާކުރެވެއެވެ.