ސްރީލަންކާގެ ތިން ޖަލެއްގައި ވަކިވަކިން ހިނގި ހަމަނުޖެހުންތަކުގައި ތިން ޤައިދީއަކު މަރުވެ 23 ޤައިދީއަކަށް އަނިޔާވެއްޖެ އެވެ.

ސްރީލަންކާގެ ޕަބްލިކް ސެކިއުރިޓީ މިނިސްޓަރު އާނަންދަ ވިޖެޕާލަ ޤާނޫނު ހަދާ މަޖިލީހުގައި ހުކުރު ދުވަހު ވާހަކަ ދައްކަމުން ބުނީ ވެރިރަށް ކޮޅަމްބޯގައި ހުންނަ ނިއު މެގަޒިން ޖަލުގައި ބުރާސްފަތި ދުވަހުގެ ރޭ 40 ޤައިދީއަކު ގޮޅިތައް ފަޅައިލައިގެން ނުކުތް ހާދިސާގައި އެކަކު މަރުވި ކަމަށެވެ. އެއަށްފަހު ހުކުރު ދުވަހުގެ ހެނދުނު ކޮޅަމްބޯއާ ގާތްގަނޑަކަށް 80 ކިލޯމީޓަރު ދުރުގައި އޮންނަ ކުރުވިޓާ ޖަލުގައި ހިނގި ދެވަނަ ހަމަނުޖެހުމެއްގައި އިތުރު ދެ ޤައިދީއަކު މަރުވި ކަމަށް އޭނާ ބުންޏެވެ. މި ދެ ހާދިސާގައި ޖުމްލަ 23 ޤައިދީއަކަށް އަނިޔާވެ ހޮސްޕިޓަލުތަކުގައި ފަރުވާ ދެމުންދާ ކަމަށް ވެސް ވިޖެޕާލަ ބުންޏެވެ.

Advertisement

މީގެ އިތުރުން ކޮޅަމްބޯއާ 40 ވަރަކަށް ކިލޯމީޓަރު ދުރުގައި އައްސޭރިފަށުގައި އޮންނަ ނެގޮމްބޯ ރަށުގެ އޯޕެން ޖަލެއްގައި ހުކުރު ދުވަހު ޤައިދީން މުޒާހަރާކުރަން ފެށުމުން ކަރުނަ ގޭސް ބޭނުންކޮށްގެން ހާލަތު ކޮންޓްރޯލުކުރި ކަމަށް ފުލުހުން ރޮއިޓާސް ނޫހަށް ބުނެފައިވެއެވެ. ތިން ޖަލުގައި ވެސް ފުރާޅު މައްޗަށް އަރައި ހާމަ ސަރަހައްދުތަކަށް ނުކުތް ޤައިދީން އެނބުރި ގޮޅިތަކަށް ވެއްދުމުގައި ދަނގަޑު ޖަހާ ފުލުހުން ހަރަކާތްތެރިވި ކަމަށް މިނިސްޓަރު ބުންޏެވެ.

މި ހަމަނުޖެހުންތަކުގެ ފަހަތުގައި ވަނީ މަސްތުވާތަކެތީގެ ވިޔަފާރިވެރިންނާއި ވާދަވެރި ކުށުގެ ގޭންގުތައް ކަމަށް ވިޖެޕާލަ ބުންޏެވެ. މި ހާދިސާތައް ރޭވިގެން ހިންގި ކަމެއްތޯ ސަރުކާރުން ބަލަމުންދާ ކަމަށް އޭނާ ބުންޏެވެ. "މި ހުރިހާ ހާދިސާތައް އެއްކޮށް ބަލާއިރު މީގެ ފަހަތުގައި ރޭވުންތެރިކަމެއް އޮތް ކަމާއި ހަލާކުކުރުމުގެ މަސައްކަތެއް ހިންގަން ކޮށްފައިވާ ކަމެއް ކަމަށް ފެނެއެވެ. ނަމަވެސް ފުރިހަމަ ތަޙުޤީޤެއް ކުރެވުނީމާ ނޫނީ އެ ކަމާ ގުޅޭ ގޮތުން އިތުރު އެއްޗެއް ދެންނެވެން ނެތެވެ" ވިޖެޕާލަ ބުންޏެވެ.

މީގެ މަހެއް ކުރިން ނެގޮމްބޯގެ ޖަލެއްގައި ދެ ދުވަހެއްގެ މައްޗަށް ދެމިގެންދިޔަ ހަމަނުޖެހުމެއްގައި ޖަލު އޮފިސަރުންގެ ތެރެއިން 10 މީހަކާއި 20 ޤައިދީއަކު މަރުވެފައިވެއެވެ. ފާއިތުވި ހަފުތާ ބަންދުގައި ވެސް ކޮޅަމްބޯއާ 14 ކިލޯމީޓަރު ދުރުގައި އޮންނަ މަހާރާ ޖަލުގައި ހިނގި ހަމަނުޖެހުމެއްގައި ޤައިދީއެއް މަރުވެ އެތައް ބަޔަކަށް އަނިޔާވެފައިވެއެވެ.

ސްރީލަންކާގެ ޖަލުތައް ވަނީ ތޮއްޖެހިގެން ނުރައްކާތެރި ހާލަތެއްގައެވެ. ޢަދުލު އިންޞާފާ ބެހޭ ވަޒީރު ހަރްޝާނަ ނަނަޔައްކާރަ ޤާނޫނު ހަދާ މަޖިލީހުގައި ވާހަކަ ދައްކަމުން ބުނީ 10,000 ޤައިދީންގެ ޖާގަ ހުރި ޖަލުތަކެއްގައި 39,000 އަށް ވުރެ ގިނަ ޤައިދީން ތިބި ކަމަށެވެ. ޤައިދީންގެ ޙައްޤުތަކާ ބެހޭ ކޮމިޓީގެ ރައީސް ސެނަކަ ޕެރެއިރާ ބުނީ "ސްރީލަންކާގެ ޖަލުތަކުގައި މިއަދު ތިބީ ޖާގައިގެ ހަތަރު ގުނަ ޤައިދީން" ކަމަށާއި "އެ މީހުން ވަރަށް ގިނަ ދުވަހު ކެތްތެރިވެގެން ތިބެއްޖެ" ކަމަށެވެ. ޖަލު ތޮއްޖެހުމުގެ ބޮޑު ސަބަބަކީ މަސްތުވާތަކެތީގެ މައްސަލަތަކުގައި ޝަރީޢަތް ނުނިމި ތިބި ގިނަ ޢަދަދެއްގެ ބަންދު މީހުން ކަމަށާއި ކަފާލާތުގެ ޝަރުތުތައް ހަރުކަށިކުރި ޤާނޫނުތަކުގެ ސަބަބުން މި މައްސަލަ ބޮޑުވެފައިވާ ކަމަށް ޕެރެއިރާ ބުންޏެވެ. ސްރީލަންކާ ސަރުކާރުން ދަނީ މިލިއަނަކަށް ވުރެ ގިނަ ކޯޓު މައްސަލަ ފުނި ހުސްކުރުމަށާއި ޤައިދީންގެ ޢަދަދު މަދުކުރުމަށް މަތީ ކޯޓުގެ ފަނޑިޔާރުންގެ މުއްދަތު ދެ އަހަރަށް ދިގުކުރެވޭ ގޮތަށް ޤާނޫނުއަސާސީ އިޞްލާޙުކުރުމުގެ މަސައްކަތްކުރަމުންނެވެ.