ކުޅުދުއްފުށީ ސިޓީގައި މަސްތުވާތަކެތީގެ ވިޔަފާރިކޮށް އެތަކެތި ގެންގުޅޭ ކަމުގެ ތުހުމަތުގައި ހަތަރު މީހަކު ހައްޔަރުކޮށްފި އެވެ.

ފުލުހުން ބުނީ އެމީހުން ހައްޔަރު ކުރީ ކައުންޓާ ނާކޮޓިކްސް އިންޓެލިޖެންސާއި ކުޅުދުއްފުށީ ޕޮލިސް ގުޅިގެން ހިންގި އޮޕަރޭޝަންތަކެއްގައި ކަމަށެވެ. އެ ހަތަރު މީހުން ހައްޔަރު ކޮށްފައިވަނީ ދެ ދުވަހެއްގެ މަތިން ހިންގި އޮޕަރޭޝަންތަކުގައި އެވެ.

Advertisement

އޭގެ ތެރެއިން މިދިޔަ ބުދަ ދުވަހު ހައްޔަރު ކުރީ ކުޅުދުއްފުށީ ބަނދަރު ސަރަހައްދުން ކުޅުދުއްފުށީ އުރަހަ ޙުސައިން ނަޢީމް (44 އަހަރު) އާއި ބަންޑާރަހިޔާ 002ޕީ ޢަބްދުއްރަޙްމާން މުޙައްމަދު (45 އަހަރު) އެވެ.

އެ ދެ މީހުންގެ މައްޗަށް ތުހުމަތުކުރެވެނީ މަސްތުވާތަކެތި ބޭނުންކޮށް ގެންގުޅެ ވިއްކައި ވިޔަފާރިކުރުމުގެ ކުށެވެ. ބަލައިފާސްކުރުމުން މަސްތުވާތަކެތި ކަމަށް ބެލެވޭ އެއްޗެއް ހުރި 30 ސެލޯފިންކޮޅު ފެނިފައިވާ އިރު އެ ތަކެތީގެ ވަގުތީ ބަރުދަނަކީ 9.71 ގުރާމެވެ. ކޯޓުން ވަނީ އެ ދެ މީހުން ފަސް ދުވަހަށް ބަންދުކުރަން އަމުރުކޮށްފައެވެ.

އިއްޔެ ހިންގި އޮޕަރޭޝަނުގައި ކުޅުދުއްފުށީ އާރުޓީއެލް ފެރީ ޓާމިނަލުން ހުއްޓުވީ ޏ. ފުވައްމުލަކު ދޫޑިގަން ކަރަންފޫގެ މުޙައްމަދު އުމީން (19 އަހަރު) އާއި ހދ. ކުމުންދޫ ފަހިވާ ޢާއިޝަތު ޢަލީ (30 އަހަރު) އެވެ.

އެ ދެ މީހުން ބަލައިފާސްކުރިއިރު މަސްތުވާތަކެތި ކަމަށް ބެލެވޭ އެއްޗެއް ހުރި 27 ސެލޯފިންކޮޅު ފެނިފައިވާ ކަމަށް ފުލުހުން ބުނެއެވެ. ފެނުނު ތަކެތީގެ ވަގުތީ ބަރުދަނަކީ 7.59 ގުރާމެވެ. ބަންދާ މެދު ގޮތެއް ނިންމަން ކޯޓަށް ހާޒިރުކުރުމުން މުޙައްމަދު އުމީން 15 ދުވަހަށް އަދި ޢާއިޝަތު ޢަލީ ހަތް ދުވަހަށް ބަންދުކުރަން އަމުރުކޮށްފައިވެއެވެ.

މި ދެ އޮޕަރޭޝަނުގައި ޖުމްލަ 57 ސެލޯފިންކޮޅު އަތުލައިގެންފައިވާ އިރު ދެ މައްސަލަ ވެސް ފުލުހުން ދަނީ ތަޙުޤީޤުކުރަމުންނެވެ.