ސަޢޫދީ ޢަރަބިއްޔާ އާއި ތުރުކީ އާއި ޕާކިސްތާނުން ތިން ޤައުމުގެ ތެރެއިން އެއް ޤައުމަކަށް ދޭ ޢުދުވާނީ ހަމަލާއެއް ތިން ޤައުމަށް ވެސް ދިން ހަމަލާއެއް ކަމުގައި ބަލާ ގޮތަށް ކަނޑައެޅޭ ގުޅިފައިވާ ދިފާޢީ އެއްބަސްވުމެއްގައި ހުކުރު ދުވަހު މައްކާގައި ސޮއިކޮށްފިއެވެ.

މި އެއްބަސްވުމުގައި ސޮއިކުރެއްވީ ސަޢޫދީ ވަލީޢަހުދު އަދި ބޮޑުވަޒީރު މުޙައްމަދު ބިން ސަލްމާނާއި ތުރުކީގެ ރައީސް ރަޖަބް ޠައްޔިބް އެރްދޮޣާން އާއި ޕާކިސްތާނުގެ ބޮޑުވަޒީރު މުޙައްމަދު ޝެހެބާޒް ޝަރީފެވެ. މައްކާގެ ޤަޞްރުއް ޞަފާގައި ބޭއްވި ގުޅިފައިވާ ދިފާޢީ ސަމިޓުގައި މި ތިން ލީޑަރުން ވަނީ މި ތާރީޚީ އެއްބަސްވުން ޤާއިމުކުރައްވައިފައެވެ.

Advertisement

ޙަރަމައިނިއް ޝަރީފައިނިގެ ޚާދިމު ރަސްގެފާނު ސަލްމާން ބިން ޢަބްދުލްޢަޒީޒުގެ ދަޢުވަތަކަށް ސަޢޫދީ ޢަރަބިއްޔާ އަށް ވަޑައިގެންނެވި އެރްދޮޣާން އާއި ޝެހެބާޒް ޝަރީފަށް މައްކާގެ ރޯޔަލް ކޯޓުން މަރުޙަބާ ވިދާޅުވީ ވަލީޢަހުދެވެ. ސަމިޓުގެ ތެރޭގައި ތިން ލީޑަރުން ވަނީ ތިން ޤައުމުގެ ދެމެދުގައި އޮތް ޚާއްޞަ ގުޅުންތައް މުރާޖަޢާ ކުރައްވައި އެކި ދާއިރާތަކުން ގުޅިގެން މަސައްކަތްކުރެވޭނެ ކަންކަމާ ގުޅޭ ގޮތުން މަޝްވަރާކުރައްވައިފައެވެ.

ސަމިޓާ ގުޅިގެން ނެރުނު ގުޅިފައިވާ ބަޔާނުގައި ބުނެފައިވާ ގޮތުގައި މި އެއްބަސްވުން ބިނާވެފައިވަނީ ތިން ޤައުމުގެ ދެމެދުގައި ޒަމާނުއްސުރެ އޮތް ތާރީޚީ ގުޅުންތަކާއި އިސްލާމީ އެއްބައިވަންތަކަމާއި ސްޓްރެޓީޖިކް މަޞްލަޙަތުތަކާއި ދިފާޢީ ދާއިރާގެ ގާތް ގުޅުމުގެ މައްޗަށެވެ. އެއްބަސްވުމުގެ މައިގަނޑު މަޤުޞަދަކީ ކޮންމެ ބާވަތެއްގެ ޢުދުވާނަކާ ދެކޮޅަށް ގުޅިގެން ރައްކާތެރިވުމުގެ ބާރު ވަރުގަދަކުރުމެވެ. އޭގެ އިތުރުން ތިން ޤައުމުގެ ދެމެދުގައި ދިފާޢީ ދާއިރާގެ އެއްބާރުލުން ހުރިހާ ގޮތަކުން ފުޅާކޮށް ތަރައްޤީ ކުރުމަކީ ވެސް މި އެއްބަސްވުމުގެ ލަނޑުދަނޑިއެކެވެ.

ތިން ޤައުމުން ބުނީ މި އެއްބަސްވުމަކީ ގުޅިފައިވާ ސަލާމަތީ ނިޒާމު ވަރުގަދަކުރުމަށާއި ސަރަޙައްދީ އަދި ބައިނަލްއަޤުވާމީ ފެންވަރުގައި ސުލްޙައާއި ހަމަޖެހުން ޤާއިމުކުރުމަށް ތިން ޤައުމު ވެފައިވާ އަޒުމުގެ ރަމްޒެއް ކަމަށެވެ. މި އެއްބަސްވުމުގެ ދަށުން ތިން ޤައުމުން މަސައްކަތްކުރާނީ ރައްކާތެރި އަދި ފާގަތި މުސްތަޤުބަލެއް ބިނާކުރުމަށް ކަމަށް ވެސް ބަޔާނުގައި ފާހަގަކޮށްފައިވެއެވެ.