މިދިޔަ އަހަރު ރާއްޖޭގައި ރަޖިސްޓްރީކުރި 5,625 ކުއްޖެއްގެ ތެރެއިން 1,431 ކުއްޖެއް އުފަންވީ އުމުރުން 35 އަހަރުން މަތީގެ މައިންނަށް ކަމަށް މޯލްޑިވްސް ބިއުރޯ އޮފް ސްޓެޓިސްޓިކްސް (ސްޓެޓިސްޓިކްސް ބިއުރޯ) ގެ ވައިޓަލް ސްޓެޓިސްޓިކްސް ބުލެޓިނުން ދައްކައިފިއެވެ.

މިއީ ޖުމްލަ އުފަންވި ކުދިންގެ 25.44 އިންސައްތައެވެ. މީގެ މާނައަކީ ރާއްޖޭގައި މިދިޔަ އަހަރު ވިހެއި ކޮންމެ ހަތަރު މަޔަކުން އެކެއްގެ އުމުރު 35 އަހަރަށް ވުރެ މައްޗަށް އަރާ ކަމެވެ. އެ ބުލެޓިނުން ފެންނަ ގޮތުގައި 25 އަހަރުން ދަށުގެ މައިންނަށް ލިބިފައިވަނީ 839 ކުދިންނެވެ. އެއީ 14.92 އިންސައްތައެވެ. މި ދެ ޢަދަދު އެކީ ކިޔައިލީމާ ދޭހަވާ ކަމަކީ ދިވެހި އަންހެނުން ދަރިން ހޯދާ އުމުރު ފަހަތަށް ޖެހެމުންދާ ކަމެވެ.

Advertisement

އަހަރުގެ އެކި ކުއާޓާތަކަށް ބެހިގެން ދިޔައިރު ވެސް 35 އަހަރުން މަތީގެ މައިންގެ ނިސްބަތް 24 އިންސައްތައިން ދަށަށް ގޮސްފައެއް ނުވެއެވެ. ދެވަނަ އަދި ތިންވަނަ ކުއާޓާގައި ޖުމްލަ އުފަންވި ކުދިންގެ ޢަދަދު މަދުވެ ހަތަރުވަނަ ކުއާޓާގައި އެ ޢަދަދު އިތުރުވި ނަމަވެސް ދޮށީ އުމުރުގެ މައިންގެ ހިއްސާއަށް ބޮޑު ތަފާތެއް އައިސްފައެއް ނުވެއެވެ.

ސިއްޙީ ގޮތުން ބެލީމާ 35 އަހަރަށް ވުރެ ފަހުން ބަލިވެ އިނުމުގައި ނުރައްކާ ބޮޑުވެއެވެ. އޭގެ ތެރޭގައި ލޭ މައްޗަށް ދިއުމާއި ހަކުރު ބައްޔާއި ޑައުން ސިންޑްރޯމް ފަދަ ކްރޮމޮޒޯމް މައްސަލަތައް ދަރިފުޅަށް ދިމާވުމުގެ ފުރުސަތު ބޮޑުވުން ހިމެނެއެވެ. އެ ސަބަބުތަކަށްޓަކައި ޚާއްޞަ ސްކްރީނިންގ ހެދުމާއި ގާތުން ބެލެހެއްޓުން މުހިންމުވެއެވެ.

ދަރިން ހޯދުން ފަސްކުރެވެމުންދާ ސަބަބުތަކުގެ ތެރޭގައި އަންހެނުން މަތީ ތަޢުލީމު ޙާޞިލްކުރުމާއި ވަޒީފާގެ ދާއިރާއަށް ނުކުތުމާއި ސިޓީތަކަށް ހިޖުރަކުރުން ހިމެނެއެވެ. ޢުމުރުން 25 އާއި 34 އާ ދެމެދާއި 35 އާއި 39 އާ ދެމެދުގެ މައިންގެ ނިސްބަތް މައްޗަށް ދިއުމަކީ ރާއްޖޭގެ އިޖުތިމާޢީ އަދި އިޤުތިޞާދީ ހާލަތު ބަދަލުވަމުންދާ ކަމުގެ ހެއްކެކެވެ.

މި ބަދަލާ އެކު ރާއްޖޭގެ އާބާދީ އިތުރުވާ ރޭޓް ދަށްވެ މުސްކުޅި އާބާދީއެއް އުފެދުމުގެ ކަންބޮޑުވުން ދަނީ ބޮޑުވަމުންނެވެ. ސްޓެޓިސްޓިކްސް ބިއުރޯގެ އެންމެ ފަހުގެ ރިޕޯޓުން ދައްކާ ގޮތުގައި ރާއްޖޭގެ އާބާދީގެ ބޮޑު ބައެއް މިހާރު ވެސް ނިސްބަތްވަނީ 36 އާއި 64 އާ ދެމެދުގެ ފުރައަށެވެ.
އުމުރުން 65 އަހަރުން މަތީގެ މީހުންގެ ޢަދަދު 26,825 ގައި ހުރި އިރު އެއީ މުޅި އާބާދީގެ ހަތް އިންސައްތައެވެ. 2050 ވަނަ އަހަރާ ހަމައަށް އަންނައިރު ރާއްޖޭގެ އާބާދީގެ އެވެރެޖް ޢުމުރު 50 އަށް އަރާނެ ކަމަށް އަންދާޒާކޮށްފައިވެއެވެ.