އިނގިރޭސިވިލާތުގެ ސްކޮޓްލެންޑުގެ ގްލާސްގޯގައި ބޭއްވި 2026 ވަނަ އަހަރުގެ ކޮމަންވެލްތް ގޭމްސް ނިމުމާ އެކު ޔުގެންޑާގެ ބޮކްސިން ޓީމުގެ ބައެއް ކުޅުންތެރިން ގެއްލިއްޖެ އެވެ.

އެ ގައުމު ތަމްސީލް ކުރަން ކޮމަންވެލްތް ގޭންސްއަށް ދިޔައީ ހަ މީހުންގެ ޓީމެކެވެ. އޭގެ ތެރެއިން ގެއްލުނީ ހަތަރު ކުޅުންތެރިންނެވެ.

Advertisement

ސްކޮޓްލެންޑުގެ ފުލުހުން ނެރުނު ބަޔާނެއްގައި ބުނީ ބައެއް އެތުލީޓުން ވީ ތަނެއް ނޭނގޭ ކަމުގެ ރިޕޯޓު ލިބިފައިވާ ކަމަށާއި އެ މައްސަލައިގައި ހޯމް އޮފީހާ ގުޅިގެން މަސައްކަތް ކުރަމުން އަންނަ ކަމަށެވެ.  ގެއްލިގެން ހޯދަމުން ދަނީ ޓީމުގެ ކެޕްޓަން ނޫހް  ބައްޓޭ އާއި އެހެން ފިރިހެން ކުޅުންތެރިއަކާއި ދެ އަންހެން ކުޅުންތެރިންނެވެ.

ޔުގެންޑާ ބޮކްސިން ފެޑެރޭޝަންގެ ރައީސް މޯސެސް މުހާންގީ އޭއެފްޕީ ނޫހަށް ބުނެފައިވާގޮތުގައި ޓީމު އެނބުރި ގައުމަށް ދާން ހަމަޖެހިފައި އޮތީ މިދިޔަ އަންގާރަ ދުވަހުގެ ރޭ ކަމަށެވެ. އެނބުރި ދިޔަ ކުޅުންތެރިންގެ ތެރޭގައި ޔުގެންޑާގެ ކުރީގެ ޚުދުމުޚުތާރު ވެރިޔާ އީދީ އަމީންގެ ކާފަ ދަރިއެއް ކަމުގައިވާ އަޒީޒް ޢަބްދުލް ހިމެނެއެވެ. އޭނާ މުބާރާތުން ވަކިކޮށްފައިވަނީ ކުއާޓާ ފައިނަލުގައި ބޮލުން ޖެހުމާ ގުޅިގެންނެވެ.

މޯސެސް ބުނީ އެ ހަތަރު ކުޅުންތެރިން ގެއްލުނީ ކަމަށް ބުނުމަށް އަދި މާ އަވަސް ކަމަށާއި އެ މީހުންގެ އިނގިރޭސިވިލާތުގެ ވިސާގެ މުއްދަތު އަދި ހަމަނުވާ ކަމަށެވެ. މޯސެސް ބުނީ އޭނާ ގަބޫލު ކުރާގޮތުގައި މި ހަފްތާ ތެރޭގައި އެނބުރި އެ ކުޅުންތެރިން ގައުމަށް ދާނެ ކަމަށް ގަބޫލު ކުރާ ކަމަށާއި ގެއްލުނީ ކަމަށް ނިންމާނީ ވިސާގެ މުއްދަތު ހަމަވުމުން ކަމަށެވެ.

ގޭމްސް އިންތިޒާމުކުރި ފަރާތުގެ ޗީފް އެގްޒެކެޓިވް ފިލް ބެޓީ ޕީއޭ މީޑިއާ ނޫހަށް ހޯމަ ދުވަހު ބުނީ ޕޯލީސް ސްކޮޓްލެންޑާއި ބޯޑާ ފޯސް އަދި އިމިގްރޭޝަނާ ގުޅިގެން ހުރިހާ އެތުލީޓުން ގަވައިދާ އެއްގޮތަށް އެތެރެވެ ފުރައިގެން ދިއުން ކަށަވަރުކުރުމަށް މަސައްކަތް ކުރާ ކަމަށެވެ.

އެހެން މީޑިއާ ރިޕޯޓުތައް ބުނާ ގޮތުގައި ޕާކިސްތާނުގެ ބޯކްސިން ކުޅުންތެރިއަކު ވެސް ކަނޑައެޅިފައިވާ ދުވަހަށް އެނބުރި ޤައުމަށް ގޯސްފައެއް ނުވެއެވެ. ކޮމަންވެލްތް ގޭމްސް ފަދަ ބޮޑު މުބާރާތްތަކާ ދިމާކޮށް ކުޅުންތެރިން ގެއްލުމުގެ ހާދިސާތައް ކުރިން ވެސް ހިނގާފައިވެއެވެ.

މި ގޭމްސްގައި 74 ޤައުމަކުން ގާތްގަނޑަކަށް 3,000 އެތުލީޓުން ވާދަކޮށްފައިވާ އިރު ނިންމުމުގެ ރަސްމިއްޔާތު ބާއްވާފައިވަނީ މިދިޔަ އާދީއްތަ ދުވަހުއެވެ.