ވަގަށް ނަގާ ތަކެތި ނުއަގުގައި ގަންނަ ކަމުގެ ތުހުމަތުގައި އައްޑޫ މަރަދޫން މީހަކު ހައްޔަރު ކޮށްފި އެވެ.

މި މައްސަލައިގަ ފުލުހުން ހައްޔަރު ކުރީ ސ. މަރަދޫ ފާގަތިގެ ޢަބްދުﷲ ޢުމަރު (58 އަހަރު) އެވެ. ފުލުހުން ބުނީ އެމީހާ ހައްޔަރުކޮށް ކޯޓަށް ހާޒިރު ކުރުމުން ޝަރީއަތް ނިމެންދެން ބަންދުކޮށްފައިވާ ކަމަށެވެ.

Advertisement

އޭނާ ހައްޔަރު ކުރީ އައްޑޫސިޓީ ގަން ޕޮލިސް ސްޓޭޝަނުން ކޯޓު އަމުރެއްގެ ދަށުން އިއްޔެ އެވެ. އޭނާ ހައްޔަރުކުރީ ވަގު ތަކެތި ނުއަގުގައި ގަންނަ ފަރާތްތައް ހޯދުމަށް އެ ސްޓޭޝަނުން ހިންގަމުން އަންނަ ޚާއްޞަ މަސައްކަތުގެ ތެރެއިން ކުރިއަށް ގެންދިޔަ އޮޕަރޭޝަނެއްގައެވެ.

ފުލުހުން ބުނީ އެ އޮޕަރޭޝަނުގައި ފާގަތިގެ ބަލައި ފާސްކުރި އިރު ނުއަގުގައި ގެނެފައިވާ ކަމަށް ބެލެވޭ 65 އައިޓަމެއް ފެނިފައިވެއެވެ. ފުލުހުން ބުނީ އެ ތަކެއްޗަކީ އައްޑޫ ސިޓީގެ ތަފާތު ގޭގެއިން ވަގަށް ނަގައިގެން ވިއްކާފައިވާ ތަކެތި ކަމަށެވެ.

އުމަރުގެ ގެއިން ފެނުނު ތަކެތީގެ ތެރޭގައި ޕަވަރ ޓޫލާއި ކާޗަރ މެޝިނާއި ސްޕީކަރާއި ލައިޓުގެ އިތުރުން އެހެނިހެން ސާމާނު ހިމެނެއެވެ.

އެ ތަކެތީގެ ތެރެއިން ބައެއް ތަކެތި މިހާރު ވެރިފަރާތްތަކާ ހަވާލުކޮށްފައިވާ ކަމަށް ފުލުހުން ބުނެއެވެ. ވަގަށް ނަގައިގެން ވިއްކާ ތަކެތި ނުގަތުމަށާއި ނުއަގުގައި ތަކެތި ވިއްކާ ނަމަ އެ ކަން ފުލުހުންނަށް ރިޕޯޓުކުރުމަށް ވެސް ފުލުހުން ވަނީ އިލްތިމާސްކޮށްފައެވެ.