ވައިގެ މަގުން ރާއްޖެ އެތެރެ ކުރަން އުޅުނު ވޭޕް ކާޓްރިޖްތަކެއް އަތުލައިގެންފި އެވެ.

ކަސްޓަމްސް އިން ބުނީ އެތަކެތި އަތުލައިގަތީ މިމަހުގެ ތިން ވަނަ ދުވަހު ހިންގި އޮޕަރޭޝަނެއްގައި ކަމަށެވެ. މި އޮޕަރޭޝަން ހިންގީ ވެލާނާ އިންޓަނޭޝަނަލް އެއާޕޯޓުގައި އެވެ.

Advertisement

ކަސްޓަމްސްއިން ވަނީ އެ ދުވަހު 800 ކާޓްރިޖް އަތުލައިގެންފައި އެވެ. މި މައްސަލަ އާއި ގުޅުންހުރި މީހާގެ މައުލޫމާތު ހާމައެއް ނުކުރެ އެވެ.

ދުންފަތް ކޮންޓްރޯލްކުރުމާ ބެހޭ ގާނޫނަށް ގެނެވުނު އާ އިސްލާހުގެ ދަށުން، 15 ނޮވެމްބަރު 2024 އިން ފެށިގެން ރާއްޖެއަށް ވޭޕާއި އެއާ ގުޅުންހުރި އެކި ބާވަތްތަކުގެ އާލާތްތައް އެތެރެކުރުމަކީ މަނާކަމެކެވެ.

މި ގާނޫނުގައިވާ ގޮތުން، މަނާކުރެވިފައިވާ ވޭޕްގެ އާލާތެއް ގެންގުޅޭ ފަރާތްތައް 2,000 ރުފިޔާއިން ޖޫރިމަނާ ކުރެވޭނެއެވެ. އަދި އެފަދަ ތަކެތި ފުލުހުންނާ ހަވާލުކުރަން އިންކާރުކޮށްފި ނަމަ، 50,000 ރުފިޔާއާ ހަމައަށް ޖޫރިމަނާ ކުރުމުގެ އިހުތިޔާރު ކަމާބެހޭ ފަރާތްތަކަށް ލިބިގެންވެއެވެ.