ލ. އަތޮޅުން ހުވަދު އަތޮޅަށް ހިލައާއި ހިލަވެލި ހިފައިގެން ދަތުރުކުރި "ފްރެންޑް 4" ސަޕްލައި ދޯނި ދިޔަވެ އަޑިއަށް ދިއުމުގެ ހާދިސާގައި ގެއްލުނު މީހުން ހޯދުމުގެ މަސައްކަތް އިތުރަށް ފުޅާކޮށްފި އެވެ.

މި ހާދިސާގައި ގެއްލިފައިވަނީ އެ ދޯނީގެ ކެޕްޓަން އާއި ހާދިސާ ރިޕޯޓު ކުރުމުން ސަލާމަތް ކޮށްދޭން ދިޔަ ސިފައިންގެ މީހަކާއި ފުލުހެކެވެ.

Advertisement

އެމްއެންޑީއެފުން ބުނީ މި ހާދިސާގައި ގެއްލުނު މީހުން ހޯދަން ވައިގެ މަގުން ޔޫއޭވީ (ޑްރޯން) އާއި މޯލްޑިވިއަންގެ ފްލައިޓެއް ބޭނުންކުރަން ފަށާފައިވާ ކަމަށެވެ. އަދި ކަނޑުމަގުން ކޯސްޓު ގާޑާއި ފުލުހުންގެ އުޅަނދު ފަހަރު ދަނީ އެ މީހުން ހޯދުމުގެ މަސައްކަތް ކުރަމުން ކަމަށް މައުލޫމާތުދެ އެވެ.

ދޯނި އަޑިއަށް ދިޔައިރު އެ އުޅަނދުގައި ޖުމްލަ އަށް މީހަކު ތިއްބެވެ. އޭގެ ތެރެއިން ހަތް ސަލާމަތްކޮށްފައިވާ ކަމަށް އެމްއެންޑީއެފުން ބުނެއެވެ.

ތިން މީހުން ގެއްލުނީ ދޯނި އަޑިއަށް ދާ ކަމުގެ ރިޕޯޓު ލިބިގެން އެހީތެރިކަން ފޯރުކޮށްދެނިކޮށް އެ އުޅަނދު އަޑިއަށް ދިއުމުން ސަލާމަތީ މަސައްކަތުގައި އުޅުނިކޮށެވެ.

ގެއްލުނު ފުލުސް މީހާއަކީ ނ. މަނަދޫ ފުލޫނިޔާގޭ ސާޖެންޓް ޢަލީ ނާފިޢު ކަމަށް މައުލޫމާތު ލިބެ އެވެ. ގެއްލުނު އަނެއް ދެމީހުންގެ މައުލޫމާތު އަދި ނޭނގެ އެވެ.

މީގެ ކުރިން ތިލަފުށިން ފުރައިގެން ދަތުރުކުރި ކޮޅުވެއްޓިއެއް ގާފަރު ކައިރިއަށް އަޑިއަށް ދިޔަ ހާދިސާގައިވެސް އިންޑިއާގެ ދެ މީހަކު ގެއްލިފައިވާ އިރު އެ ދެ މީހުން ހޯދުމުގެ މަސައްކަތް އަދިވެސް ދަނީ ކުރިއަށެވެ. ކަނޑުމަތީގެ ނުރައްކާތެރި ހާދިސާތައް ފަހަކަށް އައިސް ގިނަވަމުންދާތީ މޫސުމަށް ސަމާލުވެ ސަލާމަތީ ވަސީލަތްތައް ފުރިހަމަކުރުމަށް ކަމާ ގުޅޭ އިދާރާތަކުން ވަނީ އިލްތިމާސްކޮށްފައެވެ.