ގިނަ އަދަދެއްގެ ފައިސާ ހުރި ފޮއްޓެއް ވަގަށް ނެގި މީހަކު ހައްޔަރުކޮށްފި އެވެ.

މި މައްސަލައިގަ ފުލުހުން ހައްޔަރު ކޮށްފައިވަނީ ލ. މުންޑޫ ސެވަންސްޓާ، އުމުރުން 44 އަހަރުގެ އަލީ ނާޒިމް އެވެ. ފުލުހުން އޭނާ ހައްޔަރު ކުރީ މާލޭގެ ބޮޑުތަކުރުފާނު މަގު ޖެޓީ ސަރަޙައްދުން ގެއްލުނު ފޮއްޓެއް ވަގަށް ނެގި ކަމުގެ ތުހުމަތުގައި އެވެ.

Advertisement

މި ހާދިސާ ހިނގާފައި ވަނީ މިމަހުގެ ދެ ވަނަ ދުވަހު އެވެ.

ފުލުހުން ބުނީ އެ ދުވަހު މާލެ އައި ލޯންޗަކުން ބޭލި އެ ފޮށި އެޓޯލްސް ޕާކިން ޒޯނާ ދިމާ ޖެޓީ މަތީ ބަހައްޓާފައި ހުއްޓައެވެ. ފޮށީގެ ވެރިފަރާތުން މައްސަލަ ރިޕޯޓުކުރީ އެ ފޮށީގައި ތިން ލައްކައަށް ވުރެ ގިނަ ދިވެހި ރުފިޔާ ހުންނާނެ ކަމަށް ބުނެއެވެ.

ރިޕޯޓާ އެކު ފުލުހުން ވަނީ އެ ސަރަޙައްދުގެ ސީސީޓީވީ ފުޓެޖް ތަޙުލީލުކޮށް ތަޙުޤީޤުގެ ތެރެއިން ކުރެވުނު މަސައްކަތުން ފޮށި ގެންދިޔަ މީހާއާއި ފޮށި ގެންދިޔަ ތަން ދެނެގެންފައެވެ. މި މައްސަލައިގަ ފުލުހުން ނާޒިމް ހައްޔަރު ކުރީ ކޯޓު އަމުރެއްގެ ދަށުން އިއްޔެ އެވެ.

ނާޒިމް ވަގަށް ނެގި ފޮށި ހޯދައި ބަލައި ފާސްކުރި އިރު 248,500 އަށް ވުރެ ގިނަ ރުފިޔާ ފެނިފައިވެއެވެ. އޭގެ އިތުރުން ވަގަށް ނެގި ފައިސާއިން ގަނެފައިވާ ކަމަށް ބެލެވޭ 7,000 ރުފިޔާގެ މޯބައިލް ފޯނެއް ވެސް ފެނިފައިވާ ކަމަށް ފުލުހުން ބުނެފައިވެއެވެ.

ބަންދާ މެދު ގޮތެއް ނިންމުމަށް ކޯޓަށް ޙާޒިރުކުރުމުން 15 ދުވަހުގެ މުއްދަތަށް ބަންދުގައި ބެހެއްޓުމަށް ކޯޓުން ވަނީ އަމުރުކޮށްފައެވެ.

ފުލުހުން ދަނީ މައްސަލަ ތަހުގީގު ކުރަމުންނެވެ.