ރައީސުލްޖުމްހޫރިއްޔާ ޑރ. މުހައްމަދު މުއިއްޒު އާއި ފަސްޓްލޭޑީ ސާޖިދާ މުހައްމަދު އއ. އުކުޅަހަށް ވަޑައިގެންފި އެވެ.

އެމަނިކުފާނު އުކުޅަހަށް ވަޑައިގެންނެވުމުން ގިނަ އަދަދެއްގެ ބަޔަކު ވަނީ ބަނދަރަށް އެއްވެ މަރުހަބާ ކިޔާފައި އެވެ.

Advertisement

ރައީސްގެ މި ދަތުރުފުޅަކީ ކުދި ޖަޒީރާ ގައުމުތައް ނުވަތަ ސިޑްސްގެ ގައުމުތަކުގެ އޮޑިޓް އޮފީސްތަކުގެ މަހާސިންތާ ޝަރަފުވެރި ކޮށްދެއްވުމަށް ކުރައްވާ ދަތުރުފުޅެކެވެ. "ސިޑްސް-އެސްއޭއައި ސިމްޕޯޒިއަމް"ގެ ނަމުގައި ކުރިއަށް ގެންދާ މި މަހާސިންތާގެ ދަށުން މިއަދު ބާއްވާ ހާއްސަ ރަސްމިއްޔާތުގައި ރައީސް މުއިއްޒު ވާހަކަފުޅު ދައްކަވާނެ އެވެ.

އުކުޅަހުގައި އިއްޔެ ފެށި މި މަހާސިންތާއަކީ އދ. ގެ އިގުތިސާދީ އަދި އިޖުތިމާއީ ކަންތައްތަކާ ބެހޭ ޖަމިއްޔާ އާއި ރާއްޖޭގެ އޮޑިޓާ ޖެނެރަލްގެ އޮފީހާ ގުޅިގެން ތިން ދުވަހުގެ މުއްދަތަށް ކުރިއަށް ގެންދާ މަހާސިންތާއެކެވެ.

ރައީސްގެ މި ދަތުރުފުޅުގައި މެންދުރުފަހު އެރަށުގައި އައިސްޕްލާންޓު އެޅުމުގެ އެއްބަސްވުމުގައި ސޮއި ކުރުމުގެ ރަސްމިއްޔާތުގައި ބައިވެރިވެވަޑައިގެންނަވާނެ އެވެ. އުކުޅަހުގައި އަޅާ 50 ހައުސިން ޔުނިޓުގެ އަމަލީ މަސައްކަތް ރަސްމީކޮށް ރައީސް ފައްޓަވައިދެއްވާނެ އެވެ.

ހަވީރު އުކުޅަހު ވޮލީ ކޯޓު ހުޅުވައިދެއްވުމަށް ފަހު ސްޕޯޓްސް ކޮމްޕްލެކްސްގެ ބިންގާ އަޅުއްވައި ދެއްވާނެ އެވެ. އަދި ފަސް މިލިއަން ގަސް އިންދުމުގެ ޕްރޮގްރާމްގެ ދަށުން ރައީސްގެ ދެ ކަނބަލުން އުކުޅަހުގައި ގަސް އިންދެވުން ހަވީރު އޮންނާނެ އެވެ.

މީގެ އިތުރުން މިރޭ އެމަނިކުފާނު ޕީއެންސީގެ މެމްބަރުންނާއި ބައްދަލު ކުރައްވާނެ އެވެ. މިރޭ އުކުޅަހުގައި އޮންނަ ފުޓްސެލް މެޗެއްގައިވެސް އެމަނިކުފާނު ބައިވެރިވެވަޑައިގެންނަވާނެ ކަމަށް ރައީސް އޮފީހުން މައުލޫމާތުދެ އެވެ.