ލޯކަލް ގަވަމަންޓް އޮތޯރިޓީ (އެލްޖީއޭ)ގެ ބޯޑަށް މެންބަރުން އައްޔަންކުރުމަށް ބާއްވަން ތާވަލުކޮށްފައި އޮތް އިންތިޚާބު ވަކި މުއްދަތެއް ނެތްގޮތަށް ފަސްކޮށްފި އެވެ.

މި އިންތިހާބު ބާއްވަން ހަމަޖައްސާފައި އޮތީ އަންނަ ހޮނިހިރު ދުވަހު އެވެ.

Advertisement

އެލްޖީއޭއިން މިއަދު ނެރުނު ނޫސް ބަޔާނުގައި ބުނެފައިވާ ގޮތުގައި ކައުންސިލަރުންނާއި އަންހެނުންގެ ކޮމިޓީތަކުގެ ރައީސުންގެ ތެރެއިން އެ އޮތޯރިޓީގެ ބޯޑަށް މެންބަރުން ހޮވުމުގެ ވޯޓު ފަސްކުރީ އިންތިޚާބީ ތައްޔާރީތަކުގެ ތެރެއިން ނިންމަން ޖެހޭ މުހިންމު މަސައްކަތްތައް ފުރިހަމަނުވެ ހުރުމުންނެވެ.

އެހެންނަމަވެސް ނުނިމި ހުރީ ކޮން މަސައްކަތްތަކެއް ކަމެއް އެ އޮތޯރިޓީން ހާމަކޮށްފައެއް ނުވެއެވެ.

އެލްޖީއޭގެ ބޯޑަކީ ނުވަ މެންބަރުންގެ މައްޗަށް އެކުލެވޭ ބޯޑެކެވެ.

އެ ބޯޑުގައި ހިމެނެނީ ރައީސް ޢައްޔަންކުރައްވާ ވަޒީރަކާއި ޗީފް އެގްޒެކެޓިވް އޮފިސަރާއި ރައްޔިތުންގެ މަޖިލީހުން ކަނޑައަޅާ ތިން މެންބަރަކާއި ސިޓީ ކައުންސިލަރުންގެ ތެރެއިން ހޮވާ މެންބަރަކާއި އަތޮޅު ކައުންސިލް ރައީސުންގެ ތެރެއިން ހޮވާ މެންބަރަކާއި ރަށު ކައުންސިލަރުންގެ ތެރެއިން ހޮވާ މެންބަރެއްގެ އިތުރުން ފިނޭންސް ވުޒާރާއިން ކަނޑައަޅާ އެ އޮފީހުގެ މުވައްޒަފެކެވެ.

އިންތިޚާބު ބާއްވާނެ އައު ތާރީޚެއް އެލްޖީއޭއިން އަދި އިޢުލާންކޮށްފައެއް ނުވެއެވެ.

މި އިންތިހާބު ފަސްކުރި އިރު ޕާޓީތަކުން ވަނީ ބޯޑަށް ހޮވަން ހުށަހަޅާނެ ކެންޑިޑޭޓުންވެސް ހަމަޖައްސާފައި އެވެ.