ސަޢޫދީ ޢަރަބިއްޔާއަށް މިދިޔަ އަހަރު ބޭރު ޤައުމުތަކުން 19.5 މިލިއަނަށް ވުރެ ގިނަ ޙައްޖާޖީންނާއި ޢުމްރާވެރިން ޒިޔާރަތްކޮށް އެގައުމުން ހާސިލް ކުރަން ބޭނުންވާ ލަނޑުދަނޑި ފަހަނަ އަޅައި ގޮސްފި އެވެ.

"ޝަރަފާއި އަސަރު" ނަމުގައި ސައުދީގެ ކަމާ ބެހޭ އިދާރާތަކުން އާންމު ކުރި ރިޕޯޓުގެ ތަފާސް ހިސާޞު ދައްކާގޮތުން މީގެ ތެރެއިން 18.03 މިލިއަން މީހުންނަކީ އުމްރާއަށް ދިޔަ މީހުންނެވެ. 1.5 މިލިއަން މީހުންނަކީ ޙައްޖުގެ މަތިވެރި އަޅުކަން އަދާކުރި މީހުންނެވެ.

Advertisement

2022 ވަނަ އަހަރާ އަޅައިބަލާއިރު ޢުމްރާ ވެރިންގެ ޢަދަދު 114 އިންސައްތަ އިތުރުވެފައިވެއެވެ. "ޝަރަފާއި އަސަރު" މި ނަމުގައި ނެރުނު މި ރިޕޯޓަކީ ސަޢޫދީ ވިޝަން 2030 ގެ ލަނޑުދަނޑިތައް ޙާޞިލުކުރުމަށް ޤާއިމުކޮށްފައިވާ ޕްރޮގްރާމެއްގެ ދަށުން ތައްޔާރުކޮށްފައިވާ ރިޕޯޓެކެވެ.

ބައިނަލްއަޤުވާމީ ދަރަޖަތަކަށް ބަލާއިރު ބޭރު ޤައުމުތަކުން އެންމެ ގިނަ ޒިޔާރަތްކުރާ ފަރާތްތައް ލިބޭ ސިޓީތަކުގެ ތެރެއިން މައްކާ ފަސް ވަނައިގައި އޮތް އިރު ފަތުރުވެރިކަމުގެ ޕާފޯމަންސް އިންޑެކްސްގައި މަދީނާ ވަނީ ދުނިޔޭގެ ހަތް ވަނައިގައެވެ.

ޙައްޖާޖީންގެ ހިތްހަމަޖެހުމުގެ މިންވަރު 91 ޕަސެންޓުގައި ހުރި އިރު ޢުމްރާ ވެރިންގެ ހިތްހަމަޖެހުމުގެ ނިސްބަތް ވަނީ 94 ޕަސެންޓަށް އަރައިފައެވެ. މި ދެ ދާއިރާއިން ވެސް ވިޝަން 2030 ގައި ކަނޑައެޅި ލަނޑުދަނޑިތައް ފަހަނައަޅައި ގޮސްފައިވާ ކަމަށް ރިޕޯޓުގައި ބުނެފައިވެ އެވެ.

މީގެ އިތުރުން ރަވްޟާ އައް ޝަރީފަށް 2025 ވަނަ އަހަރު 16 މިލިއަނަށް ވުރެ ގިނަ މީހުން ޒިޔާރަތްކުރައްވާފައިވާ ކަމަށާއި ޒިޔާރަތްކުރެއްވި ފަރާތްތަކުގެ ހިތްހަމަޖެހުން 2022 ގެ 57 ޕަސެންޓުން 88 ޕަސެންޓަށް މައްޗަށް ޖެހިފައިވާ ކަމަށް ރިޕޯޓުގައި ފާހަގަކޮށްފައިވެއެވެ. ހަމައެހެންމެ މައްކާއާއި މަދީނާގައި ތައްޔާރުކޮށްފައިވާ ތާރީޚީ އަދި ސަގާފީ މަންޒިލްތަކުގެ ޢަދަދު 87 އަށް އިތުރުވެ އެ ތަންތަނަށް 55 މިލިއަނަށް ވުރެ ގިނަ ޒިޔާރާތް ލިބިފައިވެއެވެ.

ވިސާގެ ދާއިރާއަށް ބަލާ ނަމަ ޢުމްރާ ޒިޔާރާ އަދި އެ ނޫން ވެސް ބޭނުންތަކަށް ޖުމްލަ 15.03 މިލިއަން ވިސާ ދޫކޮށްފައި ވާއިރު އޭގެ ތެރެއިން 83 ޕަސެންޓަކީ ޢުމްރާ ވިސާއެވެ. އެންމެ ގިނައިން ޢުމްރާ ވިސާ ދޫކޮށްފައި ވަނީ ޕާކިސްތާނު އިންޑޮނީޝިއާ އަދި މިޞްރުގެ ރައްޔިތުންނަށެވެ.

މި ނަތީޖާތައް ދައްކައިދެނީ ޙައްޖާއި ޢުމްރާގެ ޚިދުމަތްތައް ހަރުދަނާ ކުރުމަށް ސަޢޫދީ ޢަރަބިއްޔާއިން ކުރަމުންދާ މަސައްކަތުގެ ފެންވަރު ކަމަށް އެ ރިޕޯޓުގައި ބަޔާންކޮށްފައިވެއެވެ.