ކ. ތިލަފުށިން ފުރައިގެން ދަތުރުކު ކުރަނިކޮށް ގ. ގާފަރު ކައިރިއަށް އަޑިއަށް ދިޔަ ކޮޅުވެއްޓިން ގެއްލުނު ދެ މީހުން އަދިވެސް ނުފެންނަ ކަމަށް ސިފައިން ބުނެފި އެވެ.

މި ހާދިސާ ހިނގީ މިދިޔަ ހުކުރު ދުވަހު އެންމެ މޫސުން ގޯސްވެފައި އޮތް ވަގުތު އެވެ. ގެއްލިގެން ހޯދަމުން ދަނީ އިންޑިއާ ދެ ފިރިހެނުންނެވެ.

Advertisement

އެމްއެންޑީއެފުން ބުނީ އެ ދެމީހުން ހޯދުމުގެ މަސައްކަތް އަދިވެސް ހުއްޓާނުލާ ކުރަމުންދާ ކަމަށެވެ. އެގޮތުން އަދިވެސް ކަނޑާއި ވައިގެ މަގުން ހޯދުމުގެ މަސައްކަތް ކުރިޔަށް ގެންދާ ކަމަށް ބުނެފައިވެ އެވެ.

މި އޮޕަރޭޝަންގައި އެމްއެންޑީއެފް ކޯސްޓްގާޑް ޝިޕް 'ޢިމާދުއްދީން' އާއި ފާސްޓް އިންޓަސެޕްޓަރ ކްރާފްޓްތައް ބޭނުންކޮށްގެން 441 އަކަ ނޯޓިކަލް މޭލްގެ ސަރަހައްދެއް ބަލާފައިވާ ކަމަށް އެމްއެންޑީއެފުން ބުނެއެވެ. އަދި ކޯސްޓްގާޑުގެ ހުނަރުވެރި ޑައިވަރުން ވަނީ ކަނޑުގެ އަޑިން 675,120 އަކަ މީޓަރުގެ ސަރަހައްދެއްވެސް ބަލާ ފާސްކޮށްފައެވެ.

އެމްއެންޑީއެފް އެއަރ ކޯރގެ އެހީތެރިކަމާއެކު ވައިގެ މަގުން މިހާތަނަށް 3580 އަކަ ކިލޯ މީޓަރުގެ ސަރަހައްދެއް ވަނީ ބަލާފައެވެ.

އެމްއެންޑީއެފުން ވަނީ އެ ސަރަހައްދުން ދަތުރުކުރާ އުޅަނދުފަހަރާއި ކައިރި ރަށްތަކުން މި ދެ މީހުންނާ ބެހޭ އެއްވެސް މައުލޫމާތެއް ލިބޭތޯ ބަލައިދިނުމަށް އިލްތިމާސްކޮށްފައެވެ. މި ހާދިސާއާ ގުޅުންހުރި އެއްވެސް މައުލޫމާތެއް ލިބިއްޖެނަމަ، ލަސްނުކޮށް ކޯސްޓްގާޑުގެ ހިލޭ ގުޅޭ ނަންބަރު 191 ނުވަތަ 3395981 އަދި 3398898 އަށް ގުޅުއްވައި ހިއްސާކޮށްދެއްވުމަށް އެމްއެންޑީއެފުން އެދެއެވެ. އަދި ފެކްސް މެދުވެރިކޮށް މައުލޫމާތު ހިއްސާކުރައްވާނަމަ 3391665 ނަންބަރު ބޭނުންކުރެއްވުމަށްވެސް ވަނީ އެދިފައެވެ.

ހާދިސާ ހިނގި އިރު އެ ކޮޅުވެއްޓީގައި 10 މީހުން ތިއްބެވެ. އޭގެ ތެރެރިން ސަލާމަތްވި އަށް މީހުން ވަނީ އެ ދުވަހު ގާފަރަށް ގެންގޮސްފައި އެވެ.