އިންފޮމޭޝަން ކޮމިޝަނަރުގެ މަގާމަށް ކުރިމަތި ލުމުގެ ފުރުސަތު ރައީސް އޮފީހުން ހުޅުވާލައިފި އެވެ.

ރައީސް އޮފީހުން ރޭ ބުނީ އެމަގާމަށް ކުރިމަތިލުމަށް ހުޅުވާލީ މިހާރު ހުންނެވި އިންފޮމޭޝަން ކޮމިޝަނަރުގެ ދައުރު ހަމަވާތީ ކަމަށެވެ.

Advertisement

މި މަޤާމަށް ޝައުޤުވެރިވާ ފަރާތްތަކުން ހުށައަޅަންޖެހޭ ފޯމު ރައީސުލްޖުމްހޫރިއްޔާގެ އޮފީހުގެ ވެބްސައިޓް މެދުވެރިކޮށް ލިބެން ހުންނާނެ ކަމަށް އެ އޮފީހުން ބުނެފައިވެއެވެ.

ފޯމު ބަލައިގަންނާނީ ރަސްމީ ދުވަސްތަކުގައި ހެނދުނު 08:30 އިން މެންދުރު 12:00 އާ ދެމެދު ރައީސުލްޖުމްހޫރިއްޔާގެ އޮފީހުންނެވެ. މި ފުރުޞަތުގެ އެންމެ ފަހު ތާރީޚަކީ މި މަހުގެ 16 ވާ އާދީއްތަ ދުވަހުގެ މެންދުރު 12:00 އެވެ.

މިހާރުގެ އިންފޮމޭޝަން ކޮމިޝަނަރު އާހިދު ރަޝީދުއެވެ. އޭނާގެ ފަސް އަހަރުގެ ދައުރު ހަމަވާނީ އަންނަ މަހު އެވެ.

އާހިދުގެ ދައުރު ހަމަވާން ގާތްވެފައި ވާއިރު، އޭނާއަށް ރައީސް ޑރ. މުހައްމަދު މުއިއްޒު މި ފަހުން ވަރަށް ބޮޑަށް ފާޑުވިދާޅުވި އެވެ.

މިނިވަން ދުވަހުގެ ތަގުރީރުގައި ރައީސް ވަނީ އާހިދުއަށް ތުހުމަތުތަކެއް ކުރައްވާފައެވެ. އެގޮތުން އާހިދު މަސައްކަތް ކުރައްވަނީ އިދިކޮޅު ފަރާތްތަކުން އަންގާ ގޮތަށް ކަމަށް ރައީސް ތުހުމަތުކުރެއްވިއެވެ.