މޮރޮކޯގެ މަޝްހޫރު އަންހެން ފުޓުބޯޅަ ކުޅުންތެރިއެއް ކަމުގައިވާ ފާތިން ބިން ޢުމަރު އެލް ޢަޒީޒީ ސްޕެއިންގެ ސެއުޓާއަށް ހިޖުރަކުރަން އުޅުމުގެ ތެރޭގައި ގެނބިގެން މަރުވެއްޖެ އެވެ.

ގެނބިގެން އޭނާ މަރުވި ސީދާ ދުވަހެއް ހާމަކޮށްފަ ނުވާއިރު ބެލެވޭ ގޮތުގައި މި ހާދިސާ ހިނގީ މިދިޔަ ހުކުރު ދުވަހު ކަމަށް ބެލެވެ އެވެ. ރިޕޯޓުތައް ބުނާގޮތުގައި އޭނާގެ ޖަނާޒާ އިއްޔެ މޮރޮކޯގައި ބޭއްވީ އެތައް ސަތޭކަ ބައެއްގެ ހާޒިރުގައި އެވެ.

Advertisement

ފާތިންގެ އާއިލާއިން މީޑިއާގައި ބުނީ އޭނާ މަރުވީ ޔޫރަޕްގެ ސަރަހައްދެއް ކަމަށްވާ ޝެންގެން ވިސާ ހަމަޖެހޭނެކަން ލިޔުމުން ރަސްމީކޮށް އޭނާއަށް އެންގި ދުވަހު ކަމަށެވެ.

އުމުރުން 20 އަހަރުގެ ފާތިން ގައުމީ ޓީމަށް އަދި ކުޅެން ނުފެށި ނަމަވެސް އޭނާ އަކީ އެ ގައުމުގެ ފެންވަރުގެ ވަރަށް މޮޅު ކުޅުންތެރިއެކެވެ. އޭނާ ވަނީ މޮރޮކޯގެ އެންމެ ދުވަސްވީ އެއް ފުޓްބޯޅަ ކްލަބް ކަމަށްވާ މޮގްރެބް އެތުލެޓިކޯ ޓެޓުއާންއަށް ކުޅެފައި އެވެ.

މިދިޔަ ހަފްތާގައި މޮރޮކޯ އާއި ސެއުޓާގެ ބޯޑަރު ސަރަހައްދުން އެއްގަމާއި ކަނޑުމަގުން 50،000 އާއި 60،000 އާ ދެމެދުގެ އަދަދަކަށް މޮރޮކޯ މީހުން ވަނީ ސްޕެއިނަށް އެތެރެވެފައި އެވެ. ދެގައުމު ގުޅިގެން ކުރި މަސައްކަތުން މިހާރު މަޝްރަހު ހަމައަކަށް އެޅީފައިވާކަމަށް ސްޕެއިނުން ބުނެ އެވެ.

އަދި 25،000 އަށްވުރެ ގިނަ މީހުން އަނބުރާ އެއްގަމު މަގުން ފޮނުވާލާފައިވާއިރު އަމިއްލައަށް އެދިގެންވެސް ގިނަ އަދަދެއްގެ ބަޔަކު ދަނީ އެނބުރި މޮރޮކޯއަށް ދަމުންނެވެ. އަނބުރާ ދިޔަ މީހުންނާއި ހަވާލާދީ ރިޕޯޓުތައް ބުނާގޮތުގައި އެމީހުން ސެއުޓާއަށް އެތެރެވީ މުސްތަގުބަލާއި ފުރުސަތުތައް ހުރިކަން އެނގުމާއި އެކުކަމަށާއި އެކަމަކު ސެއުޓާއިން އެމީހުން ބަލައި ނުގަންނަކަން ފެނިފައިވާ ކަމަށެވެ.

އިންސާނީ ބޮޑު ކާރިސާއެއްގެ ގޮތުގައި ސިފަ ކުރި މި ހިޖުރަކުރުމުގެ ތެރެއިން 70 އަށްވުރެ ގިނަ މީހުން މަރުވެފައިވެ އެވެ. އޭގެ ތެރޭގައި ގިނައީ ފާތިން ފަދައިން ގެނބިގެން މަރުވި މީހުންނެވެ.

މޮރޮކޯގެ ދާޚިލީ ވުޒާރާއިން ބުނީ މޮރޮކޯ މީހުން ހިޖުރަކުރުމުގެ ހާދިސާ ގުޅިފައިވަނީ ޑިޖިޓަލް ޕްލެޓްފޯމްތައް ގަސްދުގައި ނަހަމަ ގޮތުގައި ބޭނުންކުރުމާއި ދޮގު ޚަބަރު ފެތުރުމާއި އިންސާނީ ވަގުފާރީގައި ހަރަކާތްތެރިވާ ގޭންގުތަކުގެ ޢަމަލުތަކާއި ޤާނޫނީ އަދި އިދާރީ އިޖުރާއާތުތައް ނުބައިކޮށް މާނަކުރުން ފަދަ ކަންކަމާއި ކަމަށެވެ.