2023 ވަނަ އަހަރުން ފެށިގެން ފާއިތުވި ތިން އަހަރު ދުވަހުގެ ތެރޭގައި ގާތްގަނޑަކަށް 268,000 އިޒްރޭލު ރައްޔިތުން ދިގު މުއްދަތަށް އެ ޤައުމު ދޫކޮށް ގޮސްފައިވާ ކަމަށް ޓެލް އަވީވް ޔުނިވާސިޓީގެ ދިރާސާއަކުން ދައްކައިފިއެވެ.

އިޒްރޭލުގެ ނޫސް ޔެޑީއޮތު އެހެރޮނޮތުން ރިޕޯޓުކޮށްފައިވާ ގޮތުގައި އެ ޔުނިވާސިޓީގެ ކޮލާ ސްކޫލް އޮފް މެނޭޖުމެންޓުގެ ޕްރޮފެސަރު އިޓާއީ އެޓާގެ ބެލުމުގެ ދަށުން ކުރި މި ދިރާސާއިން ހާމަވާ ގޮތުގައި 2023 ވަނަ އަހަރު ތިން މަސް ނުވަތަ އެއަށްވުރެ ދިގު މުއްދަތަކަށް ޤައުމު ދޫކޮށް ދިޔައީ 86,509 މީހުންނެވެ. 2024 ގައި 91,499 މީހުން އަދި 2025 ގައި 90,922 މީހުން ހިޖުރަކޮށްފައިވެއެވެ.

Advertisement

މި ޢަދަދުތަކަކީ ކުރީގެ އަހަރުތަކާ އަޅައި ބަލާއިރު ރެކޯޑް މިންވަރެއް ކަމަށް އެ ނޫހުން ފާހަގަކޮށްފައިވެއެވެ. 2013 އިން 2015 އަށް ބެލީމާ ދިގު މުއްދަތަށް ޤައުމުން ދިޔައީ ޖުމްލަ 183,219 މީހުންނެވެ.

2023 އިން 2025 އާ ދެމެދު އެވެރެޖުކޮށް ކޮންމެ އަހަރަކު ގާތްގަނޑަކަށް 90,000 މީހުން އިޒްރޭލު ދޫކޮށް ގޮސްފައިވާއިރު 2010 އިން 2019 އާ ދެމެދު އެ ޢަދަދު ހުރީ އެވެރެޖުކޮށް އަހަރަކު 60,000 ގައެވެ. މި ދިރާސާގެ ނަތީޖާތަކުން ފެންނަނީ ކުރިން ނިސްބަތުން ހަމަހެއްޔާގައި އޮތް ހިޖުރައިގެ ޙާލަތު ގެއްލި ޤައުމު ދޫކޮށް ދާ މީހުންގެ ޢަދަދު ފާހަގަކޮށްލެވޭ މިންވަރަށް އުފުލިފައިވާ ކަން ކަމަށް އެ ނޫހުން ބުނެފައިވެއެވެ.

ޕްރޮފެސަރު އިޓާއީ އެޓާ ބުނީ ދިގު މުއްދަތަށް ޤައުމު ދޫކޮށް ދާ މީހުންގެ ޢަދަދު "ވަރަށް ކަންބޮޑުވާ" ދަރަޖައެއްގައި ހުރި ކަމަށެވެ. "އެންމެ ބޮޑު ނުރައްކަލަކީ ހަމަހެއްޔާ ގެއްލި ހިޖުރަކުރާ މީހުންގެ ޢަދަދު މިހާރު ހުރި ދަރަޖައިގައި ހުއްޓިފައި އޮތުމުގެ ބަދަލުގައި އެ ޢަދަދު އިތުރަށް މައްޗަށް ދިއުމުގެ ފުރުސަތު ބޮޑުވުން" ކަމަށް އޭނާ އިންޒާރު ދީފައިވެއެވެ.

ޔެޑީއޮތު އެހެރޮނޮތުން ފާހަގަކޮށްފައިވާ ގޮތުގައި ކުރީގެ ރިޕޯޓެއްގައި ޑޮކްޓަރުންނާއި ޕީއެޗްޑީ ހޯލްޑަރުންނާއި އިންޖިނިއަރުންނާއި ޢިލްމީ ފަންނުވެރިންނާއި މަތީ ފެންވަރުގެ އާމްދަނީ ހޯދާ ފަރާތްތައް ޤައުމު ދޫކޮށް ދާ ނިސްބަތް ވަރަށް ބޮޑަށް އިތުރުވެފައިވާ ކަމަށް ހާމަވެފައިވެއެވެ. އެ ނޫހުން ބުނީ "އިޒްރޭލުގެ އިޤުތިޞާދަކީ ޤުދުރަތީ ވަސީލަތްތައް މުއްސަނދި އިޤުތިޞާދެއް ނޫން ކަމަށާއި ބޮޑަށް ބަރޯސާވަނީ ހައި ޓެކް ދާއިރާއާއި ޢިލްމީ ސިނާޢަތްތަކުގައި ތިބި މޮޅު އިންސާނީ ވަސީލަތްތަކަށް" ކަމަށެވެ.

މި ދިރާސާ ނެރެފައި ވަނީ 2023 ވަނަ އަހަރުގެ އޮކްޓޫބަރުން ފެށިގެން އިސްތިއުމާރީ އިޒްރޭލުން ޣައްޒާއާ ދެކޮޅަށް ގަތުލުޢާންމެއް ހިންގަމުންދާ ދަނޑިވަޅެއްގައެވެ. އޭގެ އިތުރުން ލުބުނާނާއި ސޫރިޔާއާއި ޔަމަނާއި އީރާނަށް ވެސް އެ ޤައުމުން ޢަސްކަރީ ޙަމަލާތައް ފުޅާކޮށްފައިވެއެވެ. ރަސްމީ ޢަސްކަރީ ތަފާސްހިސާބުތައް ދައްކާ ގޮތުން ޣައްޒާ ހަނގުރާމަ ފެށުނު ފަހުން 966 ސިފައިން މަރުވެފައިވާއިރު އިޒްރޭލުގެ ޖުމްލަ އާބާދީ 10 މިލިއަނަށްވުރެ އިތުރުވެއެވެ.