ސްޕެއިނުގެ ބެލުމުގެ ދަށުގައި އޮތް ސެއުޓާއާއި މެލީޔާއަށް ޤާނޫނާ ޚިލާފަށް ގިނަ ޢަދަދެއްގެ ބަޔަކު ހުރަސްކުރަން ކުރި މަސައްކަތަކީ ސޯޝަލް މީޑިއާގައި ފެތުރުނު އޮޅުވައިލުމުގެ މަޢުލޫމާތާއި އިންސާނީ ވަގުފާރީގެ ނެޓްވޯކްތަކުން ރާވައިގެން ހިންގި ކަމެއް ކަމަށް މޮރޮކޯގެ ދާޚިލީ ވުޒާރާއިން އާދީއްތަ ދުވަހު ބުނެފިއެވެ.

އެ ވުޒާރާއިން ނެރުނު ބަޔާނުގައި ބުނެފައިވާ ގޮތުގައި ލިބިފައިވާ ހެކިތައް ދިރާސާކުރުމުން ސާފުވީ މި ހާދިސާތަކަކީ ވަގުތީ ނުވަތަ ކުއްލިއަކަށް ހިނގި ކަންތައްތަކެއް ނޫން ކަމެވެ. އެއީ ގިނަ ސަބަބުތައް އެކުވެގެން މެދުވެރިވި ހާދިސާތަކެއް ކަމަށް ބަޔާނުގައި ފާހަގަކޮށްފައިވެއެވެ.

Advertisement

އެ ގޮތުން މައިގަނޑު ސަބަބުތަކުގެ ތެރޭގައި ޑިޖިޓަލް ޕްލެޓްފޯމްތައް ގަސްދުގައި ނަހަމަ ގޮތުގައި ބޭނުންކުރުމާއި ދޮގު ޚަބަރު ފެތުރުމާއި އިންސާނީ ވަގުފާރީގައި ހަރަކާތްތެރިވާ ގޭންގުތަކުގެ ޢަމަލުތަކާއި ޤާނޫނީ އަދި އިދާރީ އިޖުރާއާތުތައް ނުބައިކޮށް މާނަކުރުން ހިމެނޭ ކަމަށް ރޮއިޓާޒާ ހަވާލާދީ އެ ބަޔާނުގައި ބުނެފައިވެއެވެ.

ދާޚިލީ ވުޒާރާއިން ހާމަކޮށްފައިވާ ގޮތުގައި ސެއުޓާއަށް ވަންނަން ގާތްގަނޑަކަށް 40000 މީހުން މަސައްކަތްކުރި އިރު މެލީޔާއަށް ވަންނަން އުޅުނު 1135 މީހުން ހުއްޓުވައިފައިވެއެވެ. މި ހާދިސާތަކުގައި 11 މީހަކު މަރުވެފައިވާ ކަމަށާއި އޭގެ ތެރެއިން ގިނަ މީހުން މަރުވީ ހުރަސްކުރަން އުޅުމުގެ ތެރޭގައި ގެނބިގެން ކަމަށް ވެސް ބަޔާނުގައި ފާހަގަކޮށްފައިވެއެވެ.

ބޯޑަރުގެ އަނެއް ފަރާތުން ލިބިފައިވާ މަރުގެ ރިޕޯޓުތައް ކަމާ ބެހޭ ފަރާތްތަކުން ތަޙުޤީޤުކޮށް ޔަގީންކުރަމުން އަންނަ ކަމަށް ވެސް މޮރޮކޯގެ ދާޚިލީ ވުޒާރާއިން ބުނެފައިވެއެވެ.