ތަކެތީގެ އަގު އުފުލޭ ކަމަށް ބުނެ އެމްޑީޕީން މުޒާހަރާއަކަށް ތައްޔާރުވަމުންދާ ދަނޑިވަޅެއްގައި ރާއްޖެއާއި ބޭރު ޤައުމުތަކުގެ އަގުތައް އަޅައިކިޔުއްވައި އިކޮނޮމިކް މިނިސްޓަރު މުޙައްމަދު ސައީދު މިރޭ އެ ވާހަކަތަކަށް ރައްދު ދެއްވައިފިއެވެ.

އެމްޑީޕީގެ ޗެއާޕާސަން އަދި ކުރީގެ ރައީސް މުޙައްމަދު ނަޝީދު ރޭ ބޭއްވެވި އެ ޕާޓީގެ ޤައުމީ މަޖިލީހުގެ ޖަލްސާއެއްގައި ވަނީ މި މަހުގެ 12 ވަނަ ދުވަހު މުޒާހަރާ ކުރާނެކަން އިޢުލާނުކުރައްވައިފައެވެ. އެ ވާހަކަތަކާ ގުޅިގެން ސައީދު މިއަދު ސޯޝަލް މީޑިއާގައި ޢާންމުކުރެއްވި ވީޑިއޯއެއްގައި ވިދާޅުވީ ކޮންމެ އަހަރެއްގެ ވެސް އޮގަސްޓް 12 އަދި 13 ވަނަ ދުވަހަކީ އެމްޑީޕީން "ޓްރިގާ"ވާ ދުވަހެއް ކަމަށެވެ.

Advertisement

މެދުއިރުމައްޗެގައި ހިނގަމުންދާ ހަނގުރާމައާ ގުޅިގެން ތެލުގެ އަގު މައްޗަށް ގޮސްފައިވާ މި ދުވަސްވަރު ރާއްޖޭގައި ޕެޓްރޯލް ލީޓަރެއް 16.01 ރުފިޔާއަށް ހުރިއިރު ސިންގަޕޫރުގައި ހަމަ އެ ޕެޓްރޯލް ލީޓަރެއްގެ އަގު 40.09 ރުފިޔާއަށް އަރާ ކަމަށް ސައީދު ވިދާޅުވިއެވެ. ދުބާއީގައި 14.07 ރުފިޔާއަށް ލީޓަރެއް ލިބޭއިރު އިންޑިއާގައި ލީޓަރެއްގެ އަގު ހުރީ 18.08 ރުފިޔާގައި ކަން ވެސް އެ މަނިކުފާނު ފާހަގަކުރެއްވިއެވެ.

ހަމައެހެންމެ ކުޑަކުދިންގެ ކިރުދަޅުގެ އަގު ބޮޑުވި ކަމަށް ނަޝީދު ވިދާޅުވި ނަމަވެސް ލެކްޓޯޖެން ބްރޭންޑުގެ 300 ގްރާމްގެ ދަޅެއް ރާއްޖެއަށް އެންމެ ގިނައިން އެތެރެކުރާ އެމްއެޗްއޭގައި 130 ރުފިޔާއަށް ލިބެން އެބަ ހުރި ކަމަށް ސައީދު ވިދާޅުވިއެވެ. ބީފްގެ އަގާ ބެހޭ ގޮތުން ސައީދު ވިދާޅުވީ މަހުގެ ވައްތަރާއި ކޮލެޓީއާއި ކޮށާފައި ހުންނަ ގޮތާއި އެތެރެކުރާ ޤައުމަކީ ކޮބައިކަމުގެ މައްޗަށް ބިނާކޮށް އަގު ތަފާތުވާނެ ކަމަށެވެ.

ސައީދު ވިދާޅުވީ އެމްޑީޕީން މި ބާވަތުގެ ވާހަކަތައް ދައްކަނީ ސިޔާސީ ބޭނުމެއް ފުއްދުމަށް ކަމަށާއި އެ ޕާޓީން އަބަދުވެސް ބޭނުންވަނީ ރައްޔިތުންނަށް "ލަނޑު ދިނުން" ކަމަށެވެ. އެ މަނިކުފާނު އިތުރަށް ވިދާޅުވީ އިޤުތިޞާދު ހަރުދަނާކުރަން ސަރުކާރުން ކުރާ މަސައްކަތްތައް އެމްޑީޕީން ބަލައިނުގަންނަ ކަމަށެވެ.

ސައީދު ފާހަގަކުރެއްވި ގޮތުގައި އެމްޑީޕީގެ ވެރިކަމުގައި ދިވެހި ފައިސާގެ އަގު ވެއްޓި ދަރަނި ބޮޑުވެފައިވާއިރު އެ ދަރަނިތަކުގެ ބޮޑު ބައެއް ދައްކާފައި ވަނީ ވެސް މި ސަރުކާރުންނެވެ. މި ދެ ފަރާތުގެ ބަހުސް ކުރިއަށްދާއިރު އެމްޑީޕީން ވަނީ މި މަހުގެ 12 ވަނަ ދުވަހު މުޒާހަރާ ބާއްވާނެކަން ހާމަކޮށްފައެވެ.