ބޭންކް އޮފް މޯލްޑިވްސް (ބީއެމްއެލް) އަށް ޑޮލަރުން މުސާރަ ޖަމާ ކުރުމުން ދެގުނަވާ ޕްރޮމޯޝަނެއް ފަށައިފި އެވެ.

ބީއެމްއެލް އިން ބުނީ މި ޕްރޮމޯޝަންގައި ކޮންމެ މަހަކު ޑޮލަރުން މުސާރަ ލިބޭ ހުރިހާ ކަސްޓަމަރުންނަށް ބައިވެރިވެވޭނެ ކަމަށެވެ. މުސާރަ ޖަމާވުމަށް ވަކި އަދަދެއް ނެތެވެ.

Advertisement

މި ޕްރޮމޯޝަންގެ ދަށުން ޑޮލަރުން މުސާރަ ޖަމާ ކުރާ ކަސްޓަމަރުންގެ މެދުގައި ނެގޭ ގުރުއަތުން ކޮންމެ މަހަކު ތިން ކަސްޓަމަރުންނަށް އެ ކަސްޓަމަރަކު ޖަމާކުރާ މުސާރަ ދެގުނަ ވާނެ އެވެ. 

ބީއެމްއެލްއިން ބުނީ ޑޮލަރުން މުސާރަ ޖަމާވާ ކަސްޓަމަރުންނަށް ތަފާތު އިތުރު ހިދުމަތްތައް އެ ކުންފުނިން ދޭ ކަމަށެވެ.

އޭގެ ތެރޭގައި ގެދޮރާއި ގުޅުން ހުރި ލޯނުތަކަށް ލުއިވާނެ ކަމަށާއި ލިމިޓެއް ނެތި ބޭރުގެ ޝޮޕިން ވެބްސައިޓުތަކުން ވިޔަފާރި ކުރެވޭނެ ކަމަށެވެ. އަދި ޑޮލަރުން މުސާރަ ޖަމާ ކުރާ ބިދޭސީ މުވައްޒަފުން ދައްކަން ޖެހޭ ފީވެސް ކުޑަވާނެ ކަމަށެވެ.

މި ޕްރޮމޯޝަން ފެށޭނީ އަންނަ އޮގަސްޓު މަހުގެ އެއް ވަނަ ދުވަހުން ފެށިގެންނެވެ.