ތިލަފުށީގައި ހިނގި އަލިފާނުގެ ހާދިސާގައި އެނދި ކުނިތައް ހދ. ކުނބުރުދުއަށް ގެންދިއުމަށް ވެމްކޯއިން ރާވާފައިވާތީ އެކާމައި ދެކޮޅަށް ރައްޔިތުންގެ މަޖިލީހަށް މިއަދު ހުށަހެޅި ކުއްލި މައްސަލަ ބަލައިނުގަނެ ބޭރުކޮށްލައިފިއެވެ.

މި މައްސަލަ މަޖިލީހަށް ހުށަހެޅުއްވީ ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓޭ) އެވެ/

Advertisement

އެ މައްސަލައާ މެދު ގޮތެއް ނިންމަން ނެގި ވޯޓުގައި ބަލައިގަންނަން ނުފެންނަ ކަމަށް 27 މެންބަރަކު ވޯޓު ދެއްވިއެވެ. ބަލައިގަތުމާ އެއްކޮޅަށް ވޯޓު ދެއްވީ ހަތް މެންބަރުންނެވެ.

ފިއްޓޭގެ ކުއްލި މައްސަލައިގައި ފާހަގަކުރެއްވި ގޮތުގައި ކުނބުރުދޫގެ ވޭސްޓް ޓްރާންސްފާ ސްޓޭޝަނުގެ މަސައްކަތް އަދި ނުނިމެއެވެ. ކުނި ޖަމާކުރާ ކޮންކްރީޓް ފަންގިފިލާ ނާޅާ އިރު ސީދާ ބިންމައްޗަށް ކުނި އެޅުމުން އުފެދޭ ވިހަ ފެން ނައްތައިލެވޭނެ ނިޒާމެއް ވެސް ގާއިމުވެފައި ނެތް ކަމަށް އޭނާ ވިދާޅުވިއެވެ.

އޭގެ އިތުރުން ތިލަފުށީގައި އެނދި ޕްލާސްޓިކާއި ސިނާއީ ކުނިން ޑައިއޮކްސިންސް ފިއުރަންސް އަދި ބެންޒީން ފަދަ ކެންސަރު އުފައްދާ މާއްދާތައް ބޭރުވެ ވައިގެ މަގުންނާއި ފެނުގެ ޒަރީއާއިން ދާއިމީ ބަލިތަކަށް މީހުން ހުށަހެޅިގެން ހިނގައިދާނެ ކަމުގެ ކަންބޮޑުވުން ވެސް ފިއްޓޭ ފާޅުކުރެއްވިއެވެ.

ކުނބުރުދުއަކީ ހިމާޔަތްކޮށްފައިވާ ބާވަތެއް ކަމަށްވާ ކަންޒުކަހަނބު އާލާވާ ރަށެއް ކަމުން ތިލަފުށީގެ ކުނި އެ ރަށަށް ގެންދިއުމުން އެ ތަކެތީގެ ގުދުރަތީ މާހައުލަށް ވެސް ގެއްލުން ލިބޭނެ ކަމަށް ފިއްޓޭ ވިދާޅުވެފައިވެއެވެ. މަޖިލީހުގެ ތަޅުމުން މައްސަލަ ބޭރުކޮށްލި ނަމަވެސް ވެމްކޯއިން ވަނީ ކުނި ބަދަލުކުރުމުގެ މަސައްކަތް ކުރިއަށް ގެންދާނެ ކަން ހާމަކޮށްފައެވެ.

ވެމްކޯގެ މެނޭޖިން ޑައިރެކްޓަރު މުޖުތަބާ ޖަލީލް މީޑިއާގައި އިއްޔެ ވިދާޅުވެފައިވާ ގޮތުގައި ތިލަފުށީގެ އަލިފާންގަނޑު މިހާރު ވަނީ އެއްކޮށް ކޮންޓްރޯލް ކުރެވިފައެވެ. އެނދި ކުނިތައް ނަގައި ކުނބުރުދޫގައި ހިންގާ ވޭސްޓް މެނޭޖުމަންޓް ފެސިލިޓީއަށް ގެންދިއުމުގެ މަސައްކަތް މިއަދު ފަށާނެ ކަމަށް ވެސް އޭނާ ވިދާޅުވިއެވެ.