ޖޫން މަހު ފެށުނު މޫސުމީ ވިއްސާރައިގައި ޕާކިސްތާނުގެ އެކި ހިސާބުތަކަށް ބޯކޮށް ވާރޭވެހި ފެންބޮޑުވެ މިހާތަނަށް 100 އަށްވުރެ ގިނަ މީހުން މަރުވެއްޖެ އެވެ.

އެގައުމުގެ ކާރިސާތަކާއި ބެހޭ އިދާރާ (އެންޑީއެމްއޭ) އާއި ހަވާލާދީ ރިޕޯޓުތައް ބުނާގޮތުގައި ވިއްސާރައިގަ މިހާތަނަށް 107 މީހުން މަރުވެފައިވެ އެވެ. އެކި ހާދިސާތަކުގައި 344 މީހަކަށް އަނިޔާ ލިބިފައިވާ ކަމަށެވެ.

Advertisement

އެންމެ ގިނަ މީހުން މަރުވެފައިވަނީ ޚައިބަރް ޕަޚްތޫންޚްވާ ޕްރޮވިންސުން ކަމަށާއި އެ ޕްރޮވިންސުން 55 މީހުން މަރުވެފައިވާ ކަމަށް މައުލޫމާތުދެ އެވެ. ޕަންޖާބް ޕްރޮވިންސުން 36 މީހުން މަރުވެފައިވެއެވެ.

މަރުވި މީހުންގެ ދެބައިކުޅަ އެއްބައި މީހުން މަރުވީ ގެ ވެއްޓުމާއި ފުރާޅު ވެއްޓުމުގެ ހާދިސާތަކުގައި ކަމަށް އެ އިދާރާއިން ބުނެފައިވެއެވެ. އަދި ލާހޯރާއި ގުޖުރަންވާލާ ޑިވިޝަނުތަކުގައި ގާތްގަނޑަކަށް 400 އަކަ ކިލޯމީޓަރުގެ ސަރަޙައްދެއް ފެނު އަޑީގައިވާ ކަމަށެވެ.

ޕާކިސްތާނުގެ ދެވަނައަށް އެންމެ ބޮޑު ސިޓީ ކަމަށްވާ ޕަންޖާބުގެ ވެރިރަށް ލާހޯރުގައި ފެންބޮޑުވެ ގެދޮރު ދޫކޮށް ދިޔަ ރައްޔިތުންނަށް އެހީތެރިވުމަށް 17 ރިލީފް ކޭމްޕު ޤާއިމުކޮށްފައިވާ ކަމަށް ރިޕޯޓުކޮށްފައިވެއެވެ. 

ޕާކިސްތާނުގެ މީޓިއޮރޮލޮޖީ ޑިޕާޓްމެންޓުން ބުނީ މާދަމާއިން ފެށިގެން އިސްލާމާބާދާއި ޕަންޖާބުގެ އުތުރު ސަރަޙައްދުތަކާއި ޕާކިސްތާނު-ކަޝްމީރާއި ޚައިބަރް ޕަޚްތޫންޚްވާ އަދި ގިލްގިތް-ބަލްޓިސްތާނަށް ވިއްސާރަ ކުރަން ފަށާނެ ކަމަށެވެ. އަދި ބައެއް ކޯރުތައް ފުރުމުގެ ފުރުސަތު އެބައޮތް ކަމަށް ބުނެފައިވެ އެވެ.

2025 ވަނަ އަހަރު ޕާކިސްތާނަށް ކުރި ވިއްސާރައިގަ ފެން ބޮޑުވެ، 1,037 މީހުން މަރުވެ ދެ މިލިއަން މީހުން ގެދޮރު ގެއްލުނެވެ. އަދި އެތައް މިލިއަން ދިރޭ ޖަނަވާރު މަރުވެ ދަނޑުބިންތަކަށް ވެސް ބޮޑެތި ގެއްލުންތައް ލިބިފައިވެއެވެ.