އިންޑިއާގެ އުއްތަރް ޕްރަދޭޝްގެ ވާރާނަސީގައި ހުންނަ އަމިއްލަ ސްކޫލެއްގެ ނާސަރީ ޓީޗަރަކު ފާޚާނާއަށް ދިޔުމުގެ ހުއްދަ ނުލިބިގެން ހެދުމަށް ކުޑަކަމުދެވުނު ފަސް އަހަރުގެ ފިރިހެން ކުއްޖެއްގެ ޖިންސީ ގުނަވަނުގައި ހޫނުކޮށްފައި އޮތް ވަޅިއެއް ޖައްސައި ފިއްސާލައިފި އެވެ.

މި މައްސަލަ ފުލުހުންނަށް ހުށަހެޅީ ކުއްޖާގެ ބައްޕަ އެވެ. މި މައްސަލައިގަ ފުލުހުން ވަނީ އެ ސްކޫލްގެ އެ ޓީޗަރާއި ޕްރިންސިޕަލާއި މެނޭޖްމެންޓާއި ދެކޮޅަށް މައްސަލަ ރަޖިސްޓްރީކޮށްފައި އެވެ.

Advertisement

ބައްޕަ ހުށަހެޅި ޝަކުވާގައި ބުނެފައިވާ ގޮތުން މިމަހުގެ 24 ވަނަ ދުވަހު ކްލާސް ގަޑީގައި ކުއްޖާ ފާޚާނާއަށް ދާން ހުއްދައަށް އެދުނު ކަމަށެވެ. ނަމަވެސް ޓީޗަރު ހުއްދަ ނުދިނުމުގެ ސަބަބުން ކުއްޖާއަށް ހެދުމަށް ކުޑަކަމުދެވުނީ ކަމަށާއި އެކަމާ ރުޅި އައިސްގެން ޓީޗަރު ކުއްޖާ ގައިގަ ތަޅައި ކޮޓަރިއަކަށް ގެންގޮސް ޖިންސީ ގުނަވަނުގައި ހޫނު ވަޅިއެއް ޖެއްސި ކަމަށެވެ.

މައްސަލަ ރަޖިސްޓަރީ ކުރުމާ ގުޅިގެން ތަހުގީގުގެ ތެރެއިން ސްކޫލުގެ ބަދިގެ ބަލައި ފާސްކޮށްފައިވާ ކަމަށް ވެސް ފުލުހުން ބުނެފައިވެއެވެ. އަދި ސީސީޓީވީ ފުޓޭޖު ބަލައި މައްސަލައަށް ބާރު ލިބޭ ހެކި ހޯދާފައިވާކަމަށް ބުންޏެވެ.

ފުލުހުން ވަނީ ކުއްޖާގެ މެޑިކަލް ޓެސްޓުތައް ހަދައި ކުއްޖާއަށް ލިބިފައިވާ އަނިޔާތަށް ބެލުމުގެ މަސައްކަތް ކުރަމުންދާ ކަމަށެވެ. މީގެ އިތުރުން މި މައްސަލަ ތަހުގީގު ކުރުން ވަރަށް އަވަސް ކޮށްފައި ވާކަމަށްވެސް ބުނެފައިވެ އެވެ.

ފުލުހުން ވަނީ އެމީހުންގެ މައްޗަށް ތިން ދައުވާއެއް ކުރަން ނިންމާފައި އެވެ. އެއީ ގަސްދުގައި ޖިސްމާނީ އަނިޔާ ކުރުމުގެ ދެ ދައުވާ އަކާއި ޖިނާއީ ބިރު ދެއްކުންމުގެ ދައުވާ އެވެ.