ބަންގްލަދޭޝްއިން 20،000 ގަސް ރާއްޖެއަށް ހަދިޔާކުރައްވާނެ ކަމަށް ބަންގްލަދޭޝްގެ ޚާރިޖީ ވަޒީރު ޑރ. ހަލީލުއްރަހްމާން ވިދާޅުވެއްޖެއެވެ.

ރާއްޖޭގެ މިނިވަން ދުވަހަށް 61 އަހަރު ފުރުން ފާހަގަކުރުމުގެ ޙަފުލާތަކަށް ވަޑައިގެން އުޅުއްވާ ހަލީލުއްރަހްމާން މި ވާހަކަ ޙިއްޞާކުރެއްވީ ލޮނުޒިޔާރަތް ބަގީޗާގައި ބޭއްވި ޚާއްޞަ ގަސް އިންދުމުގެ ރަސްމިއްޔާތެއްގައެވެ. އެ ރަސްމިއްޔާތުގައި ދެ ޤައުމުގެ ގާތް ގުޅުމުގެ ރަމްޒެއްގެ ގޮތުން 10 ގަސް ހަދިޔާކުރެއްވިއެވެ.

Advertisement

ހަލީލުއްރަހްމާން ވިދާޅުވި ގޮތުގައި މި 20،000 ގަސް ހަދިޔާކުރެއްވުމަކީ ތިމާވެށި ޙިމާޔަތްކުރުމާއި މޫސުމީ ބަދަލުތަކުގެ ނޭދެވޭ އަސަރުތައް ކުޑަކުރުމަށް ދެ ޤައުމު ގުޅިގެން ކުރަމުންދާ މަސައްކަތުގެ ބައެކެވެ. އަދި ރައީސް ޑރ. މުޙައްމަދު މުޢިއްޒުގެ ފަސް މިލިއަން ގަސް އިންދުމުގެ ޕްރޮގްރާމަށް އެއްބާރުލުން ދިނުމުގެ ގޮތުން ހަދިޔާ ކުރައްވާ ގަސްތަކެއް ކަމަށް ވިދާޅުވި އެވެ.

ބަންގްލަދޭޝް ސަރުކާރުގެ މި ދީލަތި އެހީއަށް ރާއްޖޭގެ ޚާރިޖީ ވަޒީރު އިރުތިޝާމް އާދަމް އާއި ތިމާވެށީގެ ވަޒީރު ޢަލީ ޝަރީފް ވަނީ ބަންގްލަދޭޝްގެ ޚާރިޖީ ވަޒީރަށާއި އެ ޤައުމުގެ ސަރުކާރަށް ޝުކުރު ދަންނަވައިފައެވެ.

ދެ ވަޒީރުން ފާހަގަކުރެއްވި ގޮތުގައި ގަސް ހަދިޔާކުރެއްވުމަކީ ދެ ޤައުމުގެ ޒަމާންވީ ގުޅުމާއި މޫސުމީ ރައްކާތެރިކަމަށް ދެމެހެއްޓެނިވި ގޮތެއްގައި ގުޅިގެން މަސައްކަތްކުރުމުގެ ޢަޒުމް ދައްކުވައިދޭ ކަމެކެވެ.

މި ގަސްތައް ހަދިޔާކުރެއްވުމަކީ ރައީސް މުޢިއްޒު އިސްނެންގެވީ ފަސް މިލިއަން ގަސް އިންދުމުގެ ޤައުމީ ޕްރޮގްރާމަށް ލިބިގެންދާ އިތުރު ކުރިއެރުމެކެވެ.