މިދިޔަ ދެ ރޭ އެމެރިކާއިން ހަމަލާ ދީފައި ނުވާތީ އީރާނުންވެސް މެދުއިރުމަތީގައި އެމެރިކާގެ ބައިވެރިންނާ ދެކޮޅަށް ދެމުން ގެންދިޔަ ރައްދު ހަމަލާތައް ހުއްޓައިލައިފައިވާ ކަމަށް އިއުލާނުކޮށްފި އެވެ.

އީރާނުގެ މި ނިންމުން އައީ ހަތަރު މަހަށްވުރެ ގިނަ ދުވަސްވެފައިވާ ހަނގުރާމަ ވޮޝިންޓަނުން ވަގުތީ ގޮތުން މެދުކަނޑާލާފައި ވަނިކޮށެވެ. އެމެރިކާގެ ހަތިޔާރު ސްޓޮކް ދަށްވެ ޕެޓްރިއޮޓް އިންޓަސެޕްޓަރާއި އެނޫންވެސް ދިފާޢީ ހަތިޔާރު މަދުވެފައިވާ ކަމުގެ ކަންބޮޑުވުންތައް ފެންމަތިވެ ހަމަލާ ވަރުގަދަ ކުރުމުގެ ޕްލޭންތައް ހިފެހެއްޓުނީ ކަމަށް ރިޕޯޓުތައް ބުނެއެވެ.

Advertisement

ހޮރްމޫޒް ކަނޑުއޮޅި ވަށައިގެން ފެށުނު ކުރިމަތިލުންތައް ޑިޕްލޮމެޓިކް މަސައްކަތްތަކަށް ހުރަސް އެޅި ނަމަވެސް ޖެހިޖެހިގެން ގާތްގަނޑަކަށް ދެ ހަފުތާ ވަންދެން ކޮންމެ ރެއަކު އެމެރިކާއިން ދޭ ބޮމުގެ ހަމަލާ ހުއްޓައިލުމާ އެކު ވާހަކަތައް އަލުން ފެށިދާނެ ކަމުގެ އުންމީދު ވަނީ އާވެފައި އެވެ.

މީޑިއާ ރިޕޯޓުތައް ބުނާގޮތުގައި ޕެންޓަގަންގެ ނަން ނުޖެހި މަސްދަރަކާ ހަވާލާދީ އީރާނާ ދެކޮޅު އެމެރިކާގެ އޮޕަރޭޝަންތައް "ހޯލްޑެއް"ގައި ބާއްވާފައިވެއެވެ. އެއީ ހުކުރު ދުވަހު ޓްރަމްޕް މާ ވަރުގަދަ ހަމަލާތައް ދޭނެ ކަމުގެ އިންޒާރު ދީފައި ވަނިކޮށެވެ.

ރިޕޯޓުތައް ބުނާގޮތުގައި ހަމަލާތައް ވަރުގަދަ ކުރުން މަޑުޖައްސާލަން ޖެހުނީ އެމެރިކާގެ ހަތިޔާރު މަދުވަމުންދާތީ އެވެ. އަދި ސަރުކާރުގެ ކަމާ ބެހޭ ފަރާތްތަކުން ޓްރަމްޕަށް ލަފާ ދީފައިވަނީ ހަމަލާތައް ކުރިޔަށް ގެންދިޔަޔަސް ނަތީޖާ މި ހާލަތުގައި ރަނގަޅު ނުވާނެ ކަމަށް ކަމަށެވެ.

އެހެންނަމަވެސް އެމެރިކާއިން އަލުން ހަމަލާ ދޭން ފައްޓައިފި ނަމަ ހަނގުރާމަ މާ ބޮޑަށް ފުޅާވެގެންދާނެ ކަމުގެ އިންޒާރު އީރާނުގެ ސިފައިން ދީފައިވެއެވެ.