ރާއްޖޭގެ 61 ވަނަ މިނިވަން ދުވަހުގެ ރަސްމީ ހަރަކާތްތައް މާދަމާ ހެނދުނު ފެށޭނެ ކަމަށް ރައީސް އޮފީހުން ބުނެފި އެވެ.

ހަރަދު ކުޑަކުރުމުގެ ގޮތުން މިނިވަން ދުވަސް ފާހަގަކުރުމަށް ބާއްވާ ހާއްސަ ބައެއް ހަރަކާތްތައް ނުބާއްވަ އެވެ. އޭގެ ތެރޭގައި ފުޅަނދު ބުރާއި މިނިވަން ދުވަހުގެ މުނާސަބަތުގައި ރައީސުލްޖުމްހޫރިއްޔާ ބާއްވަވާ ރަސްމީ ބައްދަލު ކުރެއްވުމާއި ސްކޫލް ކުދިންގެ ހުށަހެޅުންތައް ނުބާއްވަ އެވެ.

ރައީސް އޮފީހުން ބުނީ މާދަމާ ހެނދުނު 6:00 ގައި ޖުމްހޫރީ މައިދާނުގައި ދިދަ ނެގުމުގެ ރަސްމިއްޔާތު އޮންނާނެ ކަމަށެވެ. އެ ރަސްމިއްޔާތުގައި ރައީސް ޑރ މުހައްމަދު މުއިއްޒު ބައިވެރިވެވަޑައިގެންނަވާނެ އެވެ.

މިނިވަން ދުވަހުގެ ރަސްމީ ޖަލްސާ އޮންނާނީ މާދަމާ ހެނދުނު 9:00 ގައި ސޯޝަލް ސެންޓަރުގައި އެވެ. މި ރަސްމިއްޔާތުގައި ރައީސް ގައުމާއި މުހާތަބު ކުރެއްވުމުގެ އިތުރުން ދިވެހި ދައުލަތަށް ހިދުމަތް ކުރެއްވުމުގެ ޝަރަފު 66 ފަރާތަކަށް އަރުވާނެ އެވެ.

މިނިވަން ދުވަހުގެ ކުޅިވަރުތައް އޮންނާނީ މާދަމާ ރޭ ޖުމްހޫރީ މައިދާނުގައި އެވެ.

މާދަމާ ރޭ އޮންނަ ހަރަކާތްތަކުގެ ތެރޭގައި އެމްއެންޑީއެފާއި ގައުމީ ކެޑޯޓްކޯގެ ސްކޫލްތަކުގެ ދަރިވަރުންގެ ޕްރޭޑު ހިމެނެ އެވެ. ޕެރޭޑު ޖުމްހޫރީ މައިދާނުގައި ކުރިޔަށް ގެންދިއުމަށް ފަހު މާލޭގެ އެކި މަގުތަކުގައި ކުރިޔަށް ގެންދާނެ އެވެ.

އަދި ސިފައިންގެ ހާއްސަ ޑްރިލް އާއި ހަރަކާތްތަކުގެ އިތުރުން ރާއްޖޭގެ ސަގާފީ ޑާންސް ގްރޫޕުތަކާއި ބޮޑު ބެރު ގްރޫޕުތަކުގެ ހުށަހެޅުން ކުރިޔަށް ގެންދަން ހަމަޖެހިފައިވެ އެވެ. 

މިނިވަން ދުވަހުގެ މުނާސަބަތުގައި ހަވާ އެރުވުމަށްވެސް ހަމަޖެހިފައިވެ އެވެ.

މިއަހަރުގެ މިނިވަން ދުވަހުގެ ޝަރަފުވެރި މެހެމާނަކީ ސައުދީ އަރަބިއްޔާގެ ވަޒީރުންގެ މަޖިލީހުގެ މެންބަރު ޕްރިންސް ޑރ. މަންޞޫރު ބިން މުތްޢިބު ބިން ޢަބްދުލްޢަޒީޒް އާލް ސަޢޫދު ރާއްޖެ ވަޑައިގެންފިއެވެ.

ދެ ޙަރަމްފުޅުގެ ޚާދިމުގެ މުޝީރު އަދި މިނިސްޓަރ އޮފް ސްޓޭޓްގެ މަޤާމުވެސް ފުރުއްވާ ޕްރިންސް މަންޞޫރު ރާއްޖެ ވަޑައިގެންނަވީ ސަޢޫދީ ވަލީއަޙުދު އަދި ބޮޑުވަޒީރު ޕްރިންސް މުޙައްމަދު ބިން ސަލްމާން ބިން ޢަބްދުލްޢަޒީޒް އާލް ސަޢޫދުގެ ފަރާތްޕުޅުންނެވެ.