ބަންގްލަދޭޝްގެ ރައީސް މުޙައްމަދު ޝަހާބުއްދީން މަގާމުން އިސްތިއުފާ ދެއްވައިފި އެވެ.

އޭނާ އިސްތިއުފާދެއްވާފައި މިވަނީ ދައުރު ހަމަވާން ބާކީ ދެ އަހަރު އޮއްވަ އެވެ. ޝަހާބުއްދީން މަގާމަށް އައްޔަން ކުރީ 2023 ވަނަ އަހަރުގެ އޭޕްރިލް 24 ވަނަ ދުވަހު އެވެ.

Advertisement

ޝަހާބުއްދީނަކީ މަގާމުން ދުރުކޮށްފައިވާ އެ ގައުމުގެ ކުރީގެ ބޮޑުވަޒީރު ޝެއިހް ހަސީނާގެ ވަރަށް އަރިސް ބޭފުޅެކެވެ. އޭނާ އިސްތިއުފާ ދެއްވާފައި މިވަނީ ދެ ބޭފުޅުންގެ މެދުގައި އޮތް ގާތް ގުޅުމާއި މެދު ބަންގްލަދޭޝް ސަރުކާރުން ހިތްހަމަ ނުޖެހުން ފާޅު ކުރަމުންދާ ދަނޑިވަޅެއްގައި އެވެ.

އަދި ޝެއިހް ހަސީނާ އަންނަ ޑިސެމްބަރު މަހު ގައުމަށް އެނބުރި ވަޑައިގެންނަވާނެކަން އިއުލާނު ކުރައްވާފައިވާ ދަނޑިވަޅެއްގައިވެސް މެއެވެ. ވެރިކަމުން ދުރުކުރެވުނީންސުރެ 2024 ވަނަ އަހަރުން ފެށިގެން ހަސީނާ ހުންނަވަނީ އިންޑިއާގެ ހިމާޔަތް ހޯއްދަވައިގެން އެ ގައުމުގައި އެވެ.

ބަންގްލަދޭޝްގެ ޤާނޫނުއަސާސީގެ ދަށުން އައު ރައީސެއް އިންތިޚާބުކުރެވެންދެން ރައީސްގެ މަސްއޫލިއްޔަތުތައް ޢަދާކުރައްވާނީ ރައްޔިތުންގެ މަޖިލީހުގެ ރައީސް ޙާފިޒް އުއްދީން އަޙުމަދެވެ.

ޝަހާބުއްދީނަކީ 2023 ވަނަ އަހަރު މިހާރު މަނާކޮށްފައިވާ އަވާމީ ލީގުގެ ފަރާތުން ވާދަވެރިއެއް ނެތި ރައީސްކަމަށް އިންތިޚާބުވެވަޑައިގެންނެވި ބޭފުޅެކެވެ. ޙަސީނާ ވެރިކަމުން ވެއްޓިވަޑައިގެންނެވި ފަހުން ކުރީގެ އަވާމީ ލީގު ސަރުކާރުގެ ދައުލަތުގެ ބޮޑެތި މަޤާމުތަކުގައި ހުންނެވި އެންމެ ފަހު ބޭފުޅަކީ ވެސް ޝަހާބުއްދީނެވެ.

ބަންގްލަދޭޝްގެ ބައެއް މީޑިއާ ރިޕޯޓުތައް ބުނާ ގޮތުގައި ޝަހާބުއްދީން ފަހަކަށް އައިސް ޙަސީނާއާ އަލުން ގުޅުން ބެހެއްޓެވުމަށް މަސައްކަތްކުރެއްވި ކަމަށް ސަރުކާރުން ޤަބޫލުކުރެއެވެ. ނަމަވެސް އިސް ސިޔާސީ ބޭފުޅުން ވިދާޅުވީ އިސްތިޢުފާގެ ފަހަތުގައި ހުރި ސަބަބުތައް ހީކުރާ ވަރަށް ވުރެ ބޮޑަށް އޮޅުން ބޮޅުން ވެފައިވާ ކަމަށާއި ޚާއްޞަކޮށް ޙަސީނާ ޢާންމުކޮށް އެނބުރި ވަޑައިގަންނަވާނެ ކަމަށް ވިދާޅުވުމާ ގުޅިގެން ކަންކަން ނާޒުކުވެފައިވާ ކަމަށެވެ.

ޝަހާބުއްދީން ކުރިން ރޮއިޓާސް އަށް ވިދާޅުވެފައި ވަނީ ޢާންމު އިންތިޚާބަށް ފަހު އިސްތިޢުފާ ދެއްވަން ރޭއްވެވި ކަމަށާއި ޙަސީނާގެ ސަރުކާރު ބަދަލުވި ފަހުން ޤާއިމުކުރެވުނު ވަގުތީ ސަރުކާރުގެ ދައުރުގައި ރައީސް ކަމުގެ ދައުރު ހަނިވެފައިވާ ކަމަށެވެ.