ތައިލެންޑުގެ ދެކުނުގެ ނަރާތިވާތު ޕްރޮވިންސުގައި ހުންނަ ބުކެތާ ސާމީ ޗެކްޕޮއިންޓަށް ދިން ހަމަލާއެއްގައި އެ ގައުމުގެ ފަސް ސިފައިން މަރައިލައި ހަ ޢާންމު ރައްޔިތަކު ޒަހަމް ކޮށްލައިފި އެވެ.

އެ ޤައުމުގެ އަސްކަރިއްޔާގެ އިންޓާނަލް ސެކިއުރިޓީ އޮޕަރޭޝަންސް ކޮމާންޑުން ނެރުނު ބަޔާނެއްގައި ބުނެފައިވާ ގޮތުގައި ހަމަލާދިން މީހުން ތިބީ ކަޅު ހެދުމުގައި ކަޅު ތޮފި އަޅައިގެން ކަމަށާއި އެ ގްރޫޕުގައި ގާތްގަނޑަކަށް 10 މީހުން ތިބި ކަމަށެވެ. އެމީހުން ހަމަލާދިން ސަރަހައްދަށް ދިޔައީ ޕިކަޕް ޓްރަކެއްގައާއި ސައިކަލްތަކެއްގައި ކަމަށްވެސް ބުނެފައިވެ އެވެ.

Advertisement

އެމީހުން ވަނީ އެ ޗެކްޕޮއިންޓަށް އަމާޒުކޮށް ބަޑީއާ ބޮމުގެ ހަމަލާ ދީފައި އެވެ. އަދި ސިފައިން މަރާލުމަށް ފަހު އެ ޗެކްޕޮއިންޓުގައި ހުރި ތިން އޭކޭ-47 ބަޑިއާއި ބުލެޓް ޕްރޫފް ތިން ވެސްޓާއި މޮބައިލް ފޯނުތަކެއް ގެންގޮސްފައިވެ އެވެ.

އެ ހާދިސާ އާއި ގުޅިގެން ފުލުހުން ހިންގި އޮޕަރޭޝަންގައި އެ ސަރަހައްދާއި 21 ކިލޯމީޓަރު ދުރުން ހަމަލާދޭން ބޭނުން ކުރި ޓްރަކްގައި އަލިފާން ރޯކޮށްލާފައި އޮއްވަ ފެނިފައިވެ އެވެ.

މިދިޔަ އަންގާރަ ދުވަހު ހަމަ އެ ސަރަހައްދުގެ ޕޮލިސްޓްރޭޝަނެއް ކައިރީ ކާރު ބޮމެއް ގޮއްވާލައި ދިން ހަމަލާއެއްގައި ފުލުހަކު ޒަހަމްވެފައިވެ އެވެ. ސިފައިންނަށް އަމާޒުކޮށް ދެވުނު ހަމަލާއަކީ މި ފަހުގެ ތާރީހުުގައި ތައިލެންޑުގައި ދެވުނު ނުރައްކާތެރި އެއް ހަމަލާއެވެ.

މިހާތަނަށް މި ހަމަލާގެ ޒިންމާ އެއްވެސް ބަޔަކު ނުނެގިޔަސް ތައިލެންޑު ސަރުކާރުން ވަނީ ނުސީދާކޮށް މި ހަމަލާ އާއި އެ ގައުމުގެ ދެކުނުގައ އޮންނަ ރާތިވާތާއި ޕައްތާނީ އަދި ޔާލާ ޕްރޮވިންސުގައި ހަރަކާތްތެރިވާ ޖަމާއަތެއް ކަމަށްވާ ބާރިސާން ރެވޮލޫސީ ނެޝެނަލް (ބީއާރުއެން) އާ ގުޅުވައި ވާހަކަ ދައްކާފައި އެވެ. އެ ދެ ޕްރޮވިންސްގައި ދިރިއުޅެނީ މެލޭ ދަރިކޮޅުގެ މުސްލިމުންނެވެ.

ތައިލެންޑު ސަރުކާރުގެ ތަރުޖަމާނު ރަޗަދާ ދަނަދިރެކް ނެރުއްވި ބަޔާނެއްގައި ވިދާޅުވެފައިވަނީ މި ހަމަލާއަކީ "ޓެރަރިޒަމް"ގެ ޢަމަލެއް ކަމަށާއި މިކަމުގެ ސަބަބުން ޤައުމީ ސަލާމަތަށް ސީރިއަސް ނުރައްކަލެއް ކުރިމަތިވެ ޞުލްޙައިގެ މަޝްވަރާތައް އަލުން ފެށުމަށް ކުރެވެމުންދާ މަސައްކަތަށް ހުރަސް އެޅޭނެ ކަމަށެވެ. އެންމެ ފަހުން ސަރުކާރާއި އެ ޖަމާއަތާއި މަޝްވަރާ ކުރުމަށް މިދިޔަ މަހަށް ތާވަލު ކުރި ބައްދަލުވުންވެސް ވަނީ އެކި ސަބަބުތަކާއި ހެދި ކެންސަލްވެފައި އެވެ.

2004 ވަނަ އަހަރުން ފެށިގެން ރާތިވާތާއި ޕައްތާނީ އަދި ޔާލާ ޕްރޮވިންސުގައި ކުރެވެމުންދާ ވަކިވެގަތުމުގެ ހަނގުރާމައިގައި 7,000 އަށްވުރެ ގިނަ މީހުން މަރުވެފައިވެއެވެ.