ޔަމަނުގެ ރައްޔިތުން ޙިޞާރުކުރާ ކަމަށް ބުނެ ޙޫޘީ ޖަމާޢަތުން ސަޢޫދީ ޢަރަބިއްޔާއާ ދެކޮޅަށް ކުރި ތުހުމަތުތައް ކުށްވެރިކޮށް ސަޢޫދީގެ ޚާރިޖީ ވުޒާރާއިން ނެރުނު ބަޔާނަށް ދިވެހި ސަރުކާރުން ތާއީދުކޮށްފިއެވެ.

ފޮރިން މިނިސްޓްރީން ނެރުނު ބަޔާނުގައި ބުނެފައިވާ ގޮތުން ޔަމަނުގައި ޞުލްޙަ ޤާއިމުކުރުމަށާއި އެ ޤައުމުގެ ރައްޔިތުންގެ ތަކުލީފުތައް ލުއިކުރުމަށް ސަޢޫދީ ޢަރަބިއްޔާއިން ޒަމާންތަކެއް ވަންދެން ކުރަމުންދާ މަސައްކަތްތައް ރާއްޖެއިން ބަލައިގަންނަ ކަމަށެވެ.

Advertisement

އެ މަސައްކަތް ކުރިއަށް ގެންދަނީ ޔަމަނުގެ ޤާނޫނީ ސަރުކާރާ ގުޅިގެން އދ. ގެ މަސައްކަތްތަކަށް އެއްބާރުލުން ދީގެން ކަމަށް ފާހަގަކޮށްފައިވެއެވެ.

މީގެ އިތުރުން ތަރައްޤީގެ އެހީތެރިކަމާއި އިންސާނީ އެހީގެ ގޮތުގައި ސަޢޫދީ ޢަރަބިއްޔާއިން ޔަމަނަށް ދެމުންދާ އެހީތެރިކަން ވެސް ދިވެހި ސަރުކާރުގެ ބަޔާނުގައި ފާހަގަކޮށްފައިވެއެވެ.

ސަޢޫދީ ޢަރަބިއްޔާއާ އެކު ރާއްޖެ އެއްބައިވަންތަކަމުގައި ދެމިއޮތް ކަން ހާމަކުރައްވައި ޔަމަނުގައި ޞުލްޙައާއި ހަމަޖެހުމާއި އަމާންކަން ދެމެހެއްޓުމަށް ކުރެވޭ އެންމެހައި މަސައްކަތްތަކަށް ރާއްޖެއިން ތާއީދުކުރާ ކަމުގެ ޔަޤީންކަން ދިވެހި ސަރުކާރުން އާކޮށްފައިވެއެވެ.