ހަށިގަނޑުގެ ބަރުދަނަށް ބަދަލު އަންނާނެ ކަމަށް ނުވަތަ ބައްޔަކަށް ފަރުވާ ލިބޭނެ ކަމަށް ބުނެ ކާބޯތަކެތި އިޝްތިހާރުކުރުމަކީ ކާބޯތަކެތި އިޝްތިހާރުކުރުމުގެ ގަވާއިދުގެ ދަށުން މަނާ ކަމެއް ކަމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން މިއަދު ބުނެފިއެވެ.

އެ އޮތޯރިޓީން ނެރުނު ބަޔާނުގައި ބުނެފައިވާ ގޮތުގައި ބަރުދަން ދަށްކުރެވޭ ކަމަށާއި ތަފާތު ބަލިބައްޔަށް ޝިފާ ހޯދޭނެ ކަމަށް ދައްކައިގެން ގިނަ އުފެއްދުންތަކެއް ބާޒާރުކޮށް އެ ތަކެތި ބޭނުންކުރަން ބައެއް ފަރާތްތަކުން ހިތްވަރުދެމުން ގެންދެއެވެ. ސައިންޓިފިކް ދިރާސާއަކުން ސާބިތު ނުހިފޭ ދޮގު މަޢުލޫމާތާ އެކު މި ތަކެތި ވިއްކަމުންދާ ކަމަށެވެ.

Advertisement

އޭގެ ސަބަބުން އެތަކެތި ބޭނުންކުރާ ފަރާތްތަކަށް ރަނގަޅު މަޢުލޫމާތު އޮޅި ސިއްޙީ ގެއްލުން ލިބުމުގެ ފުރުޞަތު އެބައޮތް ކަމަށް ވެސް އެ ބަޔާނުގައި ބުނެފައިވެއެވެ.

މި ބަޔާނުގައި ބުނީ ކާބޯތަކެތީގެ ބާވަތެއް ޕްރޮމޯޓުކުރުމަށް ފަތުރާ މަޢުލޫމާތު އެކި ޕްލެޓްފޯމްތަކުގައި ދައުރުވުމަކީ ވެސް ކާބޯތަކެތި އިޝްތިހާރުކުރުމުގެ ގަވާއިދުގެ ތެރޭގައި ހިމެނޭ ކަމެއް ކަމަށެވެ. 

އެމްއެފްޑީއޭ އިން ވަނީ ހުރިހާ ފަރާތްތަކުން ވެސް ކާބޯތަކެތި އިޝްތިހާރުކުރުމުގެ ގަވާއިދާ އެއްގޮތަށް ޢަމަލުކުރުމަށް އިލްތިމާސްކޮށްފައެވެ. އެއާ އެކު ސާބިތު ނުހިފޭ މަޢުލޫމާތުގެ މައްޗަށް ބިނާކޮށް ވިއްކާ ކާބޯތަކެތި ބޭނުންކުރުމުގެ ބަދަލުގައި ދުޅަހެޔޮ ދިރިއުޅުމެއް އިޚުތިޔާރުކުރުމަށް އެ އޮތޯރިޓީން ވަނީ ގޮވާލައިފައެވެ.

އެ ގޮތުން މިންހެޔޮ ކެއުމާއި ލޮނާއި ހަކުރު މަދުކުރުމާއި ގަވާއިދުން ކަސްރަތުކުރުމަށް ވެސް އެ އޮތޯރިޓީން ވަނީ ނަސޭހަތްތެރިވެފައެވެ.

އެ އޮތޯރިޓީން މިއަދު ބަޔާނެއް ނެރެފައި މިވަނީ ކުޑަ ދުވަސްކޮޅެއްގެ ތެރޭގައި ބަރުދަން ލުއިވާ ކަމަށް ބުނެ ޓިކްޓޮކް މެދުވެރިކޮށް ޕައުޑަރެއް ޕްރޮމޯޓު ކުރަމުން ދަނިކޮށެވެ.