އިންޑިއާގެ އިރުއުތުރުގައި އޮންނަ ސިއްކިމް ސްޓޭޓުގައި ކުރިއަށްދާ ހައިޑްރޯޕަވާ މަޝްރޫޢެއްގެ ބިމުއަޑީ ޓަނެލެއްގައި ގޭސް ގޮވުމެއް ހިނގައި 12 މީހުން މަރުވެ 13 މީހަކު ގެއްލިފައިވާ ކަމަށް އޮފިޝަލުން ބުނެފިއެވެ.

ޗައިނާގެ ބޯޑަރު ކައިރީ ސަމަރްދަންގް އަވަށުގައި ހިންގާ 500 މެގަވޮޓުގެ ޓީސްޓާ ކަރަންޓު އުފައްދާ މަޝްރޫޢުގައި ހޯމަ ދުވަހު މި ގޮވުން ހިނގީ ޓަނެލުގެ ތެރޭގައި 21 މަސައްކަތު މީހުން ހަރަކާތްތެރިވަމުން ދަނިކޮށެވެ. އެ މީހުންގެ ތެރެއިން ދެ މީހަކަށް ސަލާމަތްވެގެން ނުކުމެވުނު ނަމަވެސް ސަލާމަތީ މަސައްކަތުގައި އެހީވާން ޓަނެލަށް ވަން ހަ އޮފިޝަލަކު ވެސް ތާށިވީ ކަމަށް ރިޕޯޓުތައް ބުނެއެވެ.

Advertisement

ސިއްކިމްގެ ޗީފް މިނިސްޓަރު ޕްރެމް ސިންގް ތަމަންގް އެ ސަރަހައްދަށް ވަޑައިގެން ވިދާޅުވީ މިހާދިސާ ހިނގީ މީތޭން ގޭސް ޖަމާވެގެން ކަމަށް ޤަބޫލުކުރެވޭ ކަމަށެވެ. ސިވިލް އޮފިޝަލް އަނޫޕަމާ ތަމްލިންގް ބުނީ ސަލާމަތްވި މީހުންނަށް ބާރު ގޮވުމެއްގެ އަޑު އިވި ކުއްލިއަކަށް ކުނިބުނި ވެރެން ފެށީ ކަމަށެވެ.

އިއްޔެ 12 ހަށިގަނޑު ނެގުނުއިރު ޤައުމީ ކާރިސާއާ ބެހޭ ފޯސް (އެންޑީއާރުއެފް) ގެ ޓީމުތައް ދިޔައީ އޮކްސިޖެން ގިޔަރާ އެކު އަދިވެސް ތާށިވެފައި ތިބި ކަމަށް ބެލެވޭ 13 މީހުން ހޯދުމުގެ މަސައްކަތް ކުރަމުންނެވެ. އެންޑީއާރުއެފްގެ އޮފިޝަލް ނިތިން ކުމާރު ބުނީ ޓަނެލުގެ ތެރެއިން މީތޭން ކާބަން މޮނޮކްސައިޑް އަދި ހައިޑްރޯޖެން ސަލްފައިޑް ފެނިފައިވާ ކަމަށެވެ. ވިހަ ގޭހުގެ ސަބަބުން ސަލާމަތީ ޓީމުތަކަށް ގާތްގަނޑަކަށް 15 މިނެޓުގެ ކުރު ދައުރުތަކުގައި ނޫނީ ޓަނެލަށް ވަދެވޭ ގޮތެއް ނުވީ ކަމަށް އޮފިޝަލުން ބުނެފައިވެއެވެ.

ޖިއޮލޮޖީގެ ތަޖުރިބާކާރު މެގާލަޔާގެ ނޯތު-އީސްޓަން ހިލް ޔުނިވާސިޓީގެ ޕްރޮފެސަރު ޑރ. ދެވޭޝް ވާލިއާ ބުނީ އެ ސަރަހައްދުގެ ބިމުގައި ހުންނަ ޒުވާން ހިލައިގެ ފޯމޭޝަންތަކުގައި ބައެއް ފަހަރު ބޯޓާ ނެރޭ ފަށަލަތައް ހުންނަ ކަމަށެވެ. 

ހިމާލަޔާ ސަރަހައްދުގައި ބިންހެލުމުގެ ހަރަކާތްތެރިކަމާއި ނާޒުކު ފަރުބަދަތަކާ ހެދި ޓަނެލް ޕްރޮޖެކްޓްތައް ޚާއްޞަކޮށް ނުރައްކާ ބޮޑެވެ. މިދިޔަ ފެބްރުއަރީ މަހު މެގާލަޔާ ސްޓޭޓުގައި ބޯޓު މައިނެއް ގޮވައި 18 މީހުން މަރުވެފައިވާ އިރު 2023 ވަނަ އަހަރު އުއްތަރާޚަންޑް ސްޓޭޓުގައި ޓަނެލެއް ވެއްޓި 41 މަސައްކަތު މީހުން 17 ދުވަސް ވަންދެން ތާށިވި ހާދިސާއެއް ވެސް ހިނގާފައިވެއެވެ.