ހދ. ހަނިމާދޫ ބަނދަރުގައި އޮތް ލޯންޗެއްގައި އަލިފާނުގެ ހާދިސާއެއް ހިނގައި ދެމީހަކު ފިހިއްޖެ އެވެ.

ލޯންޗުގައި އަލިފާން ރޯވީ ރޭގެ ވަގުތެއްގައި އެވެ. ފުލުހުންނަށް ހާދިސާގެ ރިޕޯޓު ކުރީ ރޭ ދަންވަރު 12:20 ހާއިރު ކަމަށް ފުލުހުން މައުލޫމާތުދެ އެވެ.

Advertisement

ފުލުހުންގެ މީޑިއާ އޮފިޝަލް ވިދާޅުވީ މި ހާދިސާގައި ލޯންޗުގެ ކެޕްޓަނަށާއި ފަޅުވެރިއަކަށް އަލިފާނުގެ އަސަރުކޮށް އެކިވަރުގެ އަނިޔާ ލިބިފައިވާ ކަމަށެވެ.

އޭގެ ތެރެއިން ފަޅުވެރިޔާއަށް ހަނިމާދޫ ސިއްހީ މަރުކަޒުގައި ފަރުވާ ދިނުމަށްފަހު މިހާރު ވަނީ ދޫކޮށްލާފައެވެ. ނަމަވެސް، ކެޕްޓަނަށް ހަނިމާދޫ ސިއްހީ މަރުކަޒުގައި ފަރުވާ ދިނުމަށްފަހު، އިތުރު ފަރުވާއަށް މިހާރު ވަނީ ކުޅުދުއްފުށި ރީޖަނަލް ހޮސްޕިޓަލަށް ބަދަލުކޮށްފައެވެ.

މި ހާދިސާގައި ލޯންޗު ވަނީ ބޭނުންނުކުރެވޭ ވަރަށް އަނދާފައެވެ.

މި ހާދިސާ ފުލުހުން ގެންދަނީ ތަހުގީގު ކުރަމުން ދާ ކަމަށް މައުލޫމާތުދެ އެވެ.