ވޯލްޑް ކަޕް ސެމީ ފައިނަލުގައި އިނގިރޭސިވިލާތް ބަލިކުރުމަށްފަހު ސިޔާސީ ބެނާއެއް ދައްކައިގެން އުފެދުނު މައްސަލައާ ގުޅިގެން އެ ބެނާ ނަގައިގެން ތިބި ތިން ކުޅުންތެރިއެއްގެ އިނގިރޭސި ވިސާ ބާތިލް ވެދާނެ ކަމުގެ ވާހަކަ ދެކެވެން ފަށައިފި އެވެ.

އިނގިރޭސިވިލާތުގެ ޕްރިމިއާ ލީގުގައި ކުޅޭ އާޖެންޓީނާގެ ތިން ކުޅުންތެރިންނަކީ މެންޗެސްޓާ ޔުނައިޓެޑުގެ ޑިފެންޑަރު ލިސެންޑްރޯ މާޓީނެޒް އާއި ޗެލްސީގެ އެންޒޯ ފެނާންޑެޒް އަދި ޓޮޓެންހެމް ގެ ޑިފެންޑަރު ކްރިސްޓިއަން ރޮމެރޯއެވެ. މި ތިން ކުޅުންތެރިންގެ އަތުގައި އިނގިރޭސި ސައްހަ ވީސާ އޮވެ އެވެ.

Advertisement

 ސެމީ ފައިނަލުގެ މޮޅަށްފަހު އިނގިރޭސިވިލާތުގެ ސަޕޯޓަރުންނާއި ކުޅުންތެރިންނަށް މަލާމާތް ކުރުމުގެ ގޮތުން މި ކުޅުންތެރިންނާއި އިތުރު ކުޅުންތެރިންތަކެއް ވަނީ "ލާސް މަލްވީނާސް ސޮން އާޖެންޓީނާސް" — މާނައަކީ "ފޯކްލެންޑް ޖަޒީރާތަކަކީ އާޖެންޓީނާގެ ތަނެއް" — މިފަދައިން ލިޔެފައިވާ ބެނާއެއް އުފުލައިގެން ދަނޑުމަތީ އަޑުގަދަކޮށްފައި އެވެ.

މި ޢަމަލުގެ ސަބަބުން އިނގިރޭސިވިލާތުގައި ބޮޑު ރުޅިވެރިކަމެއް އުފެދި ގިނަ ސިޔާސީ ފަރާތްތަކުން ވަނީ ކުޅިވަރާއި ސިޔާސަތު މައްސުނި ކުރި ކަމަށް ބުނެ ފީފާއިން އާޖެންޓީނާއާ ދެކޮޅަށް ފިޔަވަޅު އެޅުމަށް ގޮވައިލައިފައެވެ. ފީފާއިން މި މައްސަލަ ބަލަމުންދާ ކަމަށް ބުނި ނަމަވެސް އަދި ރަސްމީ ފިޔަވަޅެއް އެޅި ކަމެއް ހާމަކޮށްފައެއް ނުވެއެވެ.

އެކްސްޕްރެސް ޔޫކޭ ރިޕޯޓުކޮށްފައިވާ ގޮތުގައި ކުރީގެ ބޮޑުވަޒީރު މާގެރެޓް ތެޗާގެ އެހީތެރިއެއްގެ ގޮތުގައި މަސައްކަތް ކުރެއްވި ނައިލް ގާޑިނާ ވަނީ އެ ކުޅުންތެރިންގެ ވިސާ ބާޠިލުކުރުމަށް ގޮވައިލައިފައެވެ. ނައިލް ބުނީ އިނގިރޭސިންނާ ދެކޮޅު މި ހުތުރު ޢަމަލުގައި ބައިވެރިވި ކޮންމެ އާޖެންޓީނާ ކުޅުންތެރިއެއްގެ އިނގިރޭސި ވޯކް ވިސާ ބާޠިލުކުރަން ޖެހޭ ކަމަށާއި އެއްވެސް ލުޔެއް ދީގެން ނުވާނެ ކަމަށެވެ.

އިނގިރޭސި ސަޕޯޓަރުންވެސް ވަނީ އެ ކުޅުންތެރިންނަށް ފިޔަވަޅު އަޅަން ޖެހޭ ކަމަށް ބުނެފައި އެވެ. އެގޮތުން ވިސާ ބާތިލް ނުކުރާ ނަމަ އެ ކުޅުންތެރިން ފުރިހަމަ މާފެއް ނެރެންދެން ވިސާ ބާޠިލުކުރަން ޖެހޭ ކަމަށެވެ.

އެހެންނަމަވެސް އިނގިރޭސިވިލާތުގެ އިމިގްރޭޝަން ޤާނޫނީ ތަޖުރިބާކާރެއް ފާހަގަކުރި ގޮތުގައި ހަމައެކަނި ބެނާއެއް ދެއްކި ކަމަށްޓަކައި ވީސާ ބާޠިލުކުރުމަކީ ޢަމަލީ ގޮތުން ފަސޭހަ ކަމެއް ނޫނެވެ. އެ ތަޖުރިބާކާރު ބުނީ ހަމައެކަނި 'ފޯކްލެންޑް ޖަޒީރާތަކަކީ އާޖެންޓީނާގެ ތަނެއް' ބެނާ ދެއްކުމަކީ ޕްރިމިއާ ލީގު ކުޅުންތެރިއެއްގެ ވީސާ ބާޠިލުކުރެވޭ ވަރުގެ ސަބަބަކަށް ވެދާނެ ކަމަކީ ނާދިރު ކަމެއް ކަމަށެވެ.

މި ތިން ކުޅުންތެރިންގެ ވީސާ ބާޠިލުކޮށްފިނަމަ 2026-27 ވަނަ ސީޒަނަށް އެ ކުޅުންތެރިންނަށް ކްލަބުތަކާ ގުޅުމުގެ ފުރުޞަތު ގެއްލޭނެއެވެ.