ޣައިރު ޤާނޫނީ އަދި ފޭކް މުދާ ވިއްކުން ހުއްޓުވުމުގައި ނާކާމިޔާބުވެފައިވާ ކަމަށް ބުނެ ޗައިނާގެ އޮންލައިން ވިޔަފާރި ޕްލެޓްފޯމެއް ކަމުގައިވާ އެލިއެކްސްޕްރެސް ރެކޯޑް އަދަދަކުން ޔޫރަޕިއަން ކޮމިޝަނުން ޖޫރިމަނާކޮށްފިއެވެ.

މިއީ މިފަދަ މައްސަލައެއް ސާބިތުވެ އީޔޫއިން އެ ކުންފުނި ޖޫރިމަނާ ކުރި ފުރަތަމަ ފަހަރެވެ. މި މައްސަލައިގަ 629 މިލިއަން ޑޮލަރުން ޖޫރިމަނާ ކޮށްފައިވެ އެވެ.

Advertisement

ޔޫރަޕިއަން ޔޫނިއަން (އީޔޫ) ގެ ޑިޖިޓަލް ސާވިސަސް އެކްޓް (ޑީއެސްއޭ) ގެ ދަށުން މިހާތަނަށް ކޮށްފައިވާ އެންމެ ބޮޑު ޖޫރިމަނާއަކީ މިއީއެވެ.

ނުރައްކާތެރި ހެދުމާއި ކޮސްމެޓިކްސް އާއި ބަދިގެ ސާމާނުގެ އިތުރުން ފޭކް ބްރޭންޑެޑް މުދާ އެ ޕްލެޓްފޯމުގައި ވިއްކަމުންދާ ކަމަށް އެތަނުގެ ތަޙުޤީޤުން ވަނީ ހާމަވެފައެވެ. ދެ އަހަރަށް ވުރެ ދިގު ދެމިގެންދިޔަ ތަޙުޤީޤުގެ ތެރޭގައި ކުންފުންޏަށް މައްސަލަ ހައްލުކުރުމުގެ ފުރުޞަތު ދިނީ ނަމަވެސް އެކަށީގެންވާ ފިޔަވަޅުތައް އެ ކުންފުނިން ނާޅާ ކަމަށް ކޮމިޝަނުން ބުނެއެވެ.

މުދަލުގެ ޤާނޫނީ ޝަރުޠުތައް ފުރިހަމަވޭތޯ ބެލުމަށް ކުންފުނީގައި އެކަށީގެންވާ މުވައްޒަފުން ނެތް ކަމަށާއި ބައެއް ފަހަރު "ސިކުންތުކޮޅެއް" ތެރޭގައި މުދާ ބެލުން ނިންމާ ކަމަށް ކޮމިޝަނުގެ ހޯދުންތަކުން ދައްކައެވެ. ޣައިރު ޤާނޫނީ މުދާ ފާހަގަކުރެވުމަށް ފަހު ވެސް ބައެއް ފަހަރު ހަފުތާތަކެއް ވަންދެން ޕްލެޓްފޯމުގައި ދެމިހުންނަ ކަމަށާއި މިލިއަނުން މުދާ ނެގުމަށް ފަހު ވެސް އެނބުރި އައިސް މަހަކަށް ވުރެ ގިނަ ދުވަހު ހުންނަ ކަމަށް ކޮމިޝަނުން ބުނެފައިވެއެވެ.

ފޭކް ފެޝަން ބްރޭންޑްތައް "ބްރޭންޑް ނެތް" މުދާ ކެޓެގެރީގައި ހިމަނައިގެން ހުރަސްތައް ފޫ ވައްޓާލެވޭ މިންވަރަށް ނިޒާމު ބަލިކަށި ކަމަށް ވެސް ފާހަގަކޮށްފައިވެއެވެ.

އެލިއެކްސްޕްރެސް އިން ބުނީ އީޔޫގެ މި ނިންމުމާއި ބޮޑު ޖޫރިމަނާ އާއި އެއްބަސްވެވެން ނެތް ކަމަށެވެ. އެހެންވެ ކޮމިޝަންގެ ނިންމުން އިސްތިއުނާފު ކުރާނެ ކަމަށް ބުނެފައިވެ އެވެ.

ކުރިން ޑީއެސްއޭގެ ދަށުން ޗައިނާގެ ޓީމޫ 200 މިލިއަން ޔޫރޯ އިން ޖޫރިމަނާކޮށް އެކްސް (ކުރީގެ ޓުވިޓާ) 120 މިލިއަން ޔޫރޯ އިން ޖޫރިމަނާކޮށްފައިވެއެވެ. އެލިއެކްސްޕްރެސް ގެ މައި ކުންފުނި އެލީބާބާ ގެ މިދިޔަ އަހަރުގެ އާމްދަނީ 122 ބިލިއަން ޔޫރޯ ކަމުން މި ޖޫރިމަނާއަކީ ޖުމްލަ އާމްދަނީގެ އެކެއް އިންސައްތައަށް ވުރެ ވެސް ކުޑަ ޢަދަދެކެވެ.

އީޔޫގައި 193 މިލިއަން މީހުން ބޭނުން ކުރާ އަލިއެކްސްޕްރެސް އަކީ އީޔޫގައި ހިންގާ އެންމެ ބޮޑު ޗައިނާގެ އޮންލައިން ރީޓެއިލް ޕްލެޓްފޯމެވެ.