މިއަހަރުގެ މިނިވަން ދުވަހުގެ ކުރިން ހުޅުމާލެ ހޮސްޕިޓަލުގައި ގެސްޓްރޯއެންޓޮލޮޖީއާއި ނިއުރޮލޮޖީ އަދި ޔޫރޮލޮޖީ ނެފްރޮލޮޖީގެ ޚިދުމަތްތައް ފެށުމަށް ތައްޔާރުވަމުންދާ ކަމަށް މާލެ ސިޓީ ގްރޫޕް އޮފް ހޮސްޕިޓަލްސް (އެމްސީޖީއެޗް) އިން ހާމަކޮށްފިއެވެ.

ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން އެމްސީޖީއެޗްގެ ސީއީއޯ އިބްރާހީމް ޢަބްދުއްރައްޒާޤު ޙަލީމް ވިދާޅުވީ ރައީސް ޑރ. މުޙައްމަދު މުއިއްޒުގެ ރިޔާސީ ވައުދުފުޅާ އެއްގޮތަށް ޖުލައި 26 ގެ ކުރިން އެ ޚިދުމަތްތައް ދޭން ފެށޭނެ ކަމަށެވެ.

Advertisement

ގޮހޮރާއި މައިދާގެ ބަލިތަކަށް ޚާއްޞަ އޯޕީޑީ ޚިދުމަތް ދިނުމަށް ހަމަޖެހިފައިވަނީ އައިޖީއެމްއެޗްގެ ޑޮކްޓަރުންގެ ޓީމާ ގުޅިގެން ކަމަށް ޙަލީމް ވިދާޅުވިއެވެ. މި ޚިދުމަތް ހުޅުމާލެ ހޮސްޕިޓަލުން ލިބެން ފެށުމުން އެ ސަރަހައްދުގައި ދިރިއުޅޭ ރައްޔިތުން ފަރުވާ ހޯދަން މާލެ ދާންޖެހޭ ޖެހުމަށް ލުޔެއް ލިބިގެންދާނެ ކަމަށް އެ ހޮސްޕިޓަލުން ބުނެފައިވެއެވެ.

ހަމައެއާ އެކު ކުރިން ހުޅުމާލެ ހޮސްޕިޓަލުން ނުލިބޭ ޔޫރޮލޮޖީ ނެފްރޮލޮޖީގެ ޚިދުމަތް ވެސް މި ޖުލައިމަސް ނިމުމުގެ ކުރިން ފެށުމަށް ނިންމާފައިވާ ކަމަށް ޙަލީމް ވިދާޅުވިއެވެ.

މީގެ އިތުރުން ގްލޮކޯމާ ދެނެގަތުމަށް ބޭނުންވާ ޑައިގްނޯސްޓިކް ޓެސްޓުތަކާއި ގްލޮކޯމާ ސާޖަރީތައް ފެށުމަށް ވެސް ތައްޔާރީތައް ވަމުންދާ ކަމަށާއި ކެންސަރާއި އޮންކޮލޮޖީގެ ޚިދުމަތް ފުޅާކުރުމުގެ މަސައްކަތް ވެސް ކުރިއަށްދާ ކަމަށް އޭނާ ވިދާޅުވި އެވެ.

ހުޅުމާލެއަކީ މިހާރު އެންމެ ބާރު ދުވެއްޔެއްގައި އާބާދީ ބޮޑުވަމުން އަންނަ ސިޓީ ކަމަށްވާ އިރު ރައްޔިތުންނަށް ރަނގަޅު ޞިއްޙީ ޚިދުމަތެއް ފޯރުކޮށްދިނުމުގައި އެ ހޮސްޕިޓަލަށް ކުރިމަތިވެފައިވާ އެންމެ ބޮޑު ގޮންޖެހުމެއް ކަމުގައި ފާހަގަކޮށްފައިވަނީ ޖާގައިގެ ދަތިކަމެވެ.