ފީފާ ވަރލްޑް ކަޕް 2026 ގެ ޗެމްޕިއަންކަން ސްޕެއިނުން ހޯދުމާ ގުޅިގެން އެ ޤައުމުގެ ރަސްގެފާނު ފެލީޕޭ 6 ވަނައަށާއި ބޮޑުވަޒީރު ޕޭދްރޯ ސަންޗެޘް ޕެރޭޘް-ކަސްތޭޚޯނަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަރުޙަބާގެ މެސެޖު ފޮނުއްވައިފިއެވެ.

ސްޕެއިންގެ ދެ ލީޑަރުންނަށް ވަކިވަކިން ފޮނުއްވި މެސެޖުތަކުގައި ރައީސް ވިދާޅުވެފައިވަނީ ތައްޓާ ހަމައަށް ވާޞިލުވުމުގައި ސްޕެއިންގެ ޤައުމީ ޓީމުން ދައްކައިދިނީ ފާހަގަކޮށްލެވޭ ފެންވަރުގެ ހުނަރާއި ބުރަ މަސައްކަތާއި ކުޅިވަރުގެ މޮޅުކަން ކަމަށެވެ. ރާއްޖޭގައި ފުޓުބޯޅައަކީ ވަރަށް މަޤުބޫލު ކުޅިވަރެއް ކަމާއި ސްޕެއިންގެ ޓީމަށް ދިވެހިންގެ ތެރޭގައި ބޮޑު ތާއީދެއް އޮންނަކަން ރައީސް ފާހަގަކުރެއްވިއެވެ.

Advertisement

ސްޕެއިންގެ މި ކާމިޔާބީ މުޅި ރާއްޖޭގައި ނުހަނު އުފަލާ އެކީ ފާހަގަކޮށްފައިވާ ކަމަށް ވެސް އެމަނިކުފާނު ވިދާޅުވިއެވެ. އެ ކާމިޔާބީގެ ޒަރީޢާއިން ދެ ޤައުމުގެ ދެމެދުގައި ޤާއިމުވެފައި އޮތް ރަޙްމަތްތެރިކަމުގެ ގުޅުން އިތުރަށް ވަރުގަދަވެގެންދާނެ ކަމުގައި ވެސް ރައީސް ވިދާޅުވިއެވެ.

ހަމައެއާ އެކު ރާއްޖެއާއި ސްޕެއިނާ ދެމެދު އޮންނަ ގާތް އަދި ދެމެހެއްޓެނިވި ގުޅުމަށްޓަކައި ރައީސް ޝުކުރު އަދާކުރެއްވިއެވެ. ޚާއްޞަކޮށް ރާއްޖޭގެ ފަތުރުވެރިކަމުގެ ދާއިރާ ކުރިއެރުވުމުގައި ސްޕެއިންގެ ފަތުރުވެރިންނާއި ބައިވެރިންގެ ފަރާތުން މެދުނުކެނޑި ލިބެމުން އަންނަ އެއްބާރުލުން އެމަނިކުފާނު ބައްލަވާލެއްވިއެވެ.

މެސެޖުތައް ނިންމަވާލައްވަމުން ރައީސް ވަނީ ސްޕެއިންގެ ރަސްގެފާނަށާއި ބޮޑުވަޒީރަށް ފުރިހަމަ ޞިއްޙަތާއި ދުޅަހެޔޮކަމަށް އެދިވަޑައިގެންފައެވެ. އެ ޤައުމުގެ ރައްޔިތުންނަށް ދާއިމީ ސުލްޙައާއި ފާގަތިކަމާއި ކުރިއެރުމަށް ވެސް އެމަނިކުފާނު އެދިވަޑައިގެންނެވިއެވެ. ސްޕެއިނަކީ 2010 ވަނަ އަހަރުގެ ވަރލްޑް ކަޕް ވެސް ކާމިޔާބުކޮށްފައިވާ ޓީމެކެވެ.