ޕާކިސްތާނުގެ އެންމެ ބޮޑު ސިޓީ ކަރާޗީގައި ސަރުކާރުން ހިންގާ ހޮސްޕިޓަލެއްގެ އިހުމާލުން 100 އަށްވުރެ ގިނަ ކުދިން އެއިޑްސް ބައްޔަށް ޕޮޒިޓިވް ވެއްޖެ އެވެ.

ކަރާޗީ ނިސްބަތްވާ ސިންދު ޕްރޮވިންސްގެ ލޭބާ މިނިސްޓަރު ސައީދު ގަނީ ވިދާޅުވީ ހޮސްޕިޓަލްގައި ފެތުރު އެޗްއައިވީ ވައިރަހުގެ ސަބަބުން މިހާތަނަށް ޓެސްޓު ކުރި 130 އަށްވުރެ ގިނަ މީހުން ބައްޔަށް ޕޮޒިޓިވް ވެފައިވާ ކަމަށެވެ. އޭގެ ތެރެއިން 100 އަށްވުރެ ގިނަ މީހުންނަކީ ކުޑަކުދިންނެވެ.

Advertisement

އޭނާ ވިދާޅުވީ ވައިރަސް ފެތުރު ކުލްސުމް ބާއީ ވަލީކާ ހޮސްޕިޓަލްގެ ވަށައިގެންވާ ސަރަހައްދުތަކުން 10،000 އަށްވުރެ ގިނަ މީހުން މިހާތަނަށް ބައްޔަށް ޓެސްޓު ކޮށްފައިވާ ކަމަށެވެ. އެ ސަރަހައްދުން ޕޮސިޓިވްވީ 120 މީހުންނެވެ. ބާކީ 10 މީހުންވީ ހޮސްޕިޓަލުން ފަރުވާ ހޯދި އެހެން ސަރަހައްދެއްގައި އުޅޭ ބައެކެވެ.

ސައީދު ގަބޫލު ކުރައްވާގޮތުގައި އެޗްއައިވީ ފެތުރެން ދިމާވި މައިގަނޑު ސަބަބަކީ ސިއްހީ އެހީތެރިންގެ އިހުމާލެވެ. އޭނާ ވިދާޅުވި ގޮތުގައި އިންފެކްޝަން ޕްރިވެންޝަން ޕްރޮޓޮކޯލްތަކަށް ފުރިހަމައަށް ޢަމަލުނުކުރުމާއި ރައްކާތެރިކަމުގެ ސާމާނު ބޭނުންކުރުން މަދުވުމާއި އެއްފަހަރު ބޭނުންކުރާ ސިރިންޖު އެހެން މީހުންނަށް ބޭނުން ކުރުން ހިމެނޭ ކަމަށެވެ.

މީގެ ކުރިން އޭނާ ވަނީ އެ ހޮސްޕިޓަލުގައި ބޭނުން ކުރަނީ "އޮޓޯ ޑިސޭބަލް" ނުވަތަ އަލުން ބޭނުން ކުރެވޭ ސިރިންޖު ކަމަށް ވިދާޅުވެފައި އެވެ. އެހެން ވިދާޅުވީ މިދިޔަ މަހު އެ ހޮސްޕިޓަލުން ފަރުވާ ހޯދި 6 މީހަކު އެއިޑްސް ބަލީގައި މަރުވުމުން ހޮސްޕިޓަލާއި ދެކޮޅަށް ސިންދު ޕްރޮވިންސްގެ ހައި ކޯޓަށް ހުށަހެޅި މައްސަލަ އާއި ގުޅިގެން ޖަވާބުދާރީވަމުންނެވެ.

އިހުމާލުން ބަލި ފެތުރުނު މައްސަލައިގަ ކުލްސުމް ބާއީ ވަލީކާ ހޮސްޕިޓަލްގެ 37 ޑޮކްޓަރުންނާއި މުވައްޒަފުންތަކަކަށް ވަނީ ޖަވާބުދާރީވުމަށް 14 ދުވަހުގެ ނޯޓިސް ފޮނުވާފައި އެވެ. މިކަމުގައި ޒިންމާވާ ފަރާތްތަކާ މެދު ޖިނާއީ ދަޢުވާ އުފުލައި ވަޒީފާއިން ވަކިކުރެވޭނެއެވެ.

އަދި އެކަމުގައި ނުސީދާ ޒިންމާ އޭނާ ނަންގަވާ ކަމަށާއި އިސްތިއުދާ ދެއްވަން ޖެހޭ ހާލަތެއްގައި އެކަން ކުރާނެ ކަމަށް ސައީދު ވިދާޅުވެފައިވެ އެވެ.