އެމެރިކާގައި ދިރިއުޅޭ އިންޑިއާ މުސްލިމެއްގެ ގަޔަށް ވަޅި ހަރައި ޒަހަމް ކޮށްލައިފި އެވެ.

މި ހާދިސާގައި ޒަހަމްވެފައި ވަނީ އެމެރިކާގެ ވެސްޓްވެލީގެ މޯލްއެއްގައި މަސައްކަތް ކުރާ ސުހައިލް ނަމަކަށް ކިޔާ މީހެކެވެ. އޭނާ މަސައްކަތް ކުރަމުން ދިޔައީ މުސްލިމަކު އެ މޯލްގައި ހިންގާ ޖުވެލަރީ ވިއްކާ ފިހާރައެއްގައި އެވެ.

Advertisement

ވެސްޓްވެލީގެ ފުލުހުންނާއި ހަވާލާދީ މީޑިއާ ރިޕޯޓުތައް ބުނާގޮތުގައި މި މައްސަލައިގަ ހައްޔަރުކޮށްފައިވަނީ 48 އަހަރުގެ ޕީޓާ މައިކަލް ލާސަން ކިޔާ މީހެކެވެ. އެމީހާ ވަނީ ސުހައިލްގެ ހަށިގަނޑުގެ އެކި ތަންތަނަށް 15 ޖަހައި ޒަހަމް ކޮށްލާފައި އެވެ.

ސުހައިލްގެ އެކުވެރިން މީޑިއާގައި ބުނެފައިވާގޮތުގައި ލާސަން ސުހައިލަށް ހަމަލާދޭން ފެށުމުގެ ކުރިން ކޮން ނަމެއް ކިޔާ، ކޮން ގައުމެއްގެ މީހެއްތޯ ސުވާލު ކުރި ކަމަށެވެ. އަދި ނަން ބުނުމުން ތިއީ މުސްލިމެއްތޯ އެހުމަށް ފަހު ދެން ބުނީ ފެންފުޅިއެއް ދިނުމަށް ކަމަށް ބުންޏެވެ.

އެމީހުން ބުނީ ފެންފުޅި ނަގަން އެނބުރު ވަގުތު ވަޅިން ސުހައިލަށް ހަމަލާދޭން ފެށި ކަމަށެވެ. ފުލުހުން ބުނީ ސުހައިލަށް ބޮޑެތި ޒަހަމްތަކެއް ލިބިފައިވާ ކަމަށާއި އޭނާ ހުރި ތަނުގައި ލޭގެ ކޯރެއް އުފެދުނު ކަމަށެވެ.

މި ހަމަލާގެ ފަހަތުގައިވާ ސަބަބު އަދި ރަސްމީކޮށް ކަށަވަރުކޮށްފައި ނުވާއިރު ފުލުހުން މި މައްސަލަ ދަނީ ތަހުގީގުކުރަމުންނެވެ.