ބަންގްލަދޭޝްގެ ކުރީގެ ބޮޑުވަޒީރު ޝެއިހް ހަސީނާ އަނބުރާ ގައުމަށް ފޮނުވުމުގެ މައްސަލައިގައި އިންޑިއާގެ ސިޔާސަތު ބަދަލު ނުވާކަމަށް އެ ގައުމުން ބުނެފި އެވެ.

ބަންގްލަދޭޝްގައި ދަރިވަރުންގެ ލީޑަރޝިޕްގައި ހިންގި ސަރުކާރާ ދެކޮޅު ހަރަކާތްތަކަށްފަހު 2024 ވަނަ އަހަރުގެ އޮގަސްޓް މަހު ހަސީނާގެ ސަރުކާރު ވެއްޓުމުން އިންޑިއާއިން ހިމާޔަތް ހޯއްދަވައިގެން އޭނާ ދިރިއުޅެމުން ދަނީ އެ ގައުމުގައި އެވެ. މި ފަހުން ހަސީނާ ވަނީ އަންނަ ޑިސެމްބަރު މަހު އެނބުރި ގައުމަށް ވަޑައިގެންނަވާނެކަން އިއުލާނު ކުރައްވާފައި އެވެ.

Advertisement

މި ނިންމުމާއި ގުޅިގެން އިންޑިއާގެ އެކްސްޓާނަލް އެފެއާޒް މިނިސްޓްރީގެ ތަރުޖަމާނު ރަންދީރު ޖައިސްވަލް މީޑިއާގައި ވިދާޅުވީ އިންޑިއާ މީގެ ކުރިންވެސް ބުނެފައިވާ ގޮތަށް އެކަމަށް ހުއްދަ އަށް އެދުމުން ކުރިޔަށް ދާނެ ކަމަށެވެ. ހަސީނާގެ ފަރާތްޕުޅުން އެފަދަ އެދުމެއް އަދި އިންޑިއާ ސަރުކާރަށް ހުށަނާޅާ ކަމަށް އޭނާ ވިދާޅުވި އެވެ.

ރަންދީރު ވިދާޅުވީ ހަސީނާ އަނބުރާ ގައުމަށް ފޮނުވުމުގެ ކޮންމެ މައްސަލައަކީ ގާނޫނީ މައްސަލައެއް ކަމަށެވެ. އެކަން ކުރިޔަށް ދާނީ ދިރާސާކޮށް ޝަރުއީ އަދި ގާނޫނީ އިޖުރާތުތަކާއި އެއްގޮތަށް ކަމަށް ވިދާލުވި އެވެ.

ދަރިވަރުންގެ ލީޑަރޝިޕްގައި ހިންގި ސަރުކާރާ ދެކޮޅު ހަރަކާތްތައް ފުނޑާލުމުގައި ހަސީނާގެ ސަރުކާރުން ހިންގި ކަންކަމުގައި "އިންސާނިއްޔަތާ ދެކޮޅު ޖަރީމާތަކެއް" ހިންގިކަމަށް ބުނެ ފާއިތުވި އަހަރު ޑާކާގެ ޚާއްޞަ ޓްރައިބިއުނަލަކުން ހަސީނާގެ މައްޗަށް މަރުގެ ޙުކުމް އިއްވިއެވެ. ބަންގްލަދޭޝްގައި މިހާރު ވެރިކަން ކުރާ ބަންގްލަދޭޝް ނޭޝަނަލިސްޓް ޕާޓީ (ބީއެންޕީ)ގެ ސަރުކާރުން ދަނީ ހަސީނާ ފޮނުވުމަށް ތަކުރާރުކޮށް ގޮވާލަމުންނެވެ.

ހަސީނާ ވިދާޅުވެފައިވަނީ ޑިސެމްބަރު މަހު ގައުމަށް ވަޑައިގެން ކޯޓަށް ހާޒިރުވާނެ ކަމަށެވެ. އަދި މަރަށްވެސް ތައްޔާރު ކަމަށް ވިދާޅުވެފައިވެ އެވެ.