ރާއްޖޭގެ ޖަލުތަކުގައި ތިބި ބަންގްލަދޭޝްގެ ގައިދީން އިންސާނީ ހަމަތަކުގެ މަތިން އެނބުރި ގައުމަށް ގޮސް ހުކުމުގެ ބާކީބައި ފުރިހަމަކުރުމުގެ މަގު ފަހިކޮށްދޭ ގައިދީން ބަދަލުކުރުމުގެ އެއްބަސްވުމެއް އެކުލަވާލުމުގެ ކަންކަން މިހާރު އޮތީ އެންމެ ފަހު މަރުހަލާގައި ކަމަށް ރާއްޖޭގައި ހުންނަ ބަންގްލަދޭޝްގެ ހައި ކޮމިޝަނުން ބުނެފި އެވެ.

ބަންގުލަދޭޝްގެ ނޫހެއް ކަމަށްވާ ޑާކާ ޓްރައިބިއުންގެ ރިޕޯޓެއްގައި ބަންގްލަދޭޝް ހައި ކޮމިޝަނުން މިދިޔަ ހުކުރު ދުވަހު ނެރުނު ބަޔާނަކާ ހަވާލާދީ ބުނީ މި އެއްބަސްވުން އަވަސްކުރުމަށް ދެ ގައުމުގެ ކަމާ ބެހޭ އިދާރާތަކުން ގުޅިގެން ވަރަށް ގާތުން މަސައްކަތް ކުރަމުން އަންނަ ކަމަށެވެ. އަދި ފުރިހަމަ ކުރަންޖެހޭ ގާނޫނީ ކަންކަން ނިމުމާ އެކު ރަސްމީކޮށް މި އެއްބަސްވުމުގައި ސޮއިކޮށް އަމަލުކުރަން ފަށާނެ ކަމަށް ހައި ކޮމިޝަނާ ހަވާލާދީ އެ ނޫހުގައި ބުނެފައިވެއެވެ.

Advertisement

މި އެއްބަސްވުމުގެ ސަބަބުން ދެ ގައުމުގެ ދެމެދުގައި އޮތް ގާނޫނީ އަދި އިންސާނީ ހައްގުތަކާ ގުޅޭ ކަންކަމުގައި އެއްބާރުލުން އިތުރަށް ވަރުގަދަވެ ގައިދީންގެ ނަފުސާނީ ދުޅަހެޔޮ ކަމަށާއި މުޖުތަމައުއަށް އަލުން އަހުލުވެރިވުމަށް ބޮޑު އެހީތެރިކަމެއް ލިބޭނެ ކަމަށް ބަންގްލަދޭޝުން ގަބޫލުކުރާ ކަމަށް ވެސް އެ ރިޕޯޓުގައި ބުނެފައިވެއެވެ.

އެ ރިޕޯޓުގައި ބުނީ މި މަސައްކަތްތަކުގެ ތެރެއިން ރާއްޖެއަށް ކަނޑައަޅުއްވާފައި ހުންނަވާ ބަންގްލަދޭޝްގެ ހައި ކޮމިޝަނަރު ޑރ. މުހައްމަދު ނަޒްމުލް އިސްލާމް އިސްކޮށް ހުންނަވައިގެން ހައި ކޮމިޝަނުގެ ވަފުދެއް މާފުށީ ޖަލަށް ވެސް ޒިޔާރަތް ކުރައްވާފައިވާ ކަމަށެވެ. މިއީ ރާއްޖޭގައި ތިބި ބަންގްލަދޭޝް މީހުންގެ ހައްގުތަކާއި އިންސާނީ ބޭނުންތައް ކަށަވަރުކުރުމަށް ކުރި ޒިޔާރަތެއް ކަމަށް އެ ރިޕޯޓުގައި ބުނެފައިވެއެވެ.

އެ ޒިޔާރަތުގައި ވަފުދުގެ ބޭފުޅުން ވަނީ މާފުށީ ޖަލުގައި ތިބި ބަންގްލަދޭޝްގެ 44 ގައިދީއަކާ ބައްދަލުކޮށް އެމީހުންގެ ހާލު ބައްލަވައިފައެވެ. ހައި ކޮމިޝަނުން މައުލޫމާތު ދޭ ގޮތުގައި އޭގެ ތެރެއިން 34 ގައިދީންނަކީ ކުށް ސާބިތުވެ ހުކުމް ތަންފީޒު ކުރަމުންދާ މީހުންނެވެ. އަދި ބާކީ ތިބި 10 މީހުންނަކީ ޝަރީއަތް ނިމެންދެން ބަންދުކޮށްފައި ތިބި މީހުންނެވެ.

ހައި ކޮމިޝަނުގެ ވަފުދުން ކޮންމެ ގައިދީއަކާ ވަކިވަކިން ވާހަކަދައްކައި ޖަލުގެ މާހައުލާއި ބޭސްފަރުވާ އާއި ކާބޯތަކެއްޗާއި ފޭރާމުގެ އިތުރުން ނިދުމުގެ އިންތިޒާމުތައް ހުރި ގޮތް ބަލައިފައިވެއެވެ. އެއަށް ފަހު މޯލްޑިވްސް ކަރެކްޝަނަލް ސާވިސްއާ ބައްދަލުކޮށް ގައިދީންގެ ހުރި ޝަކުވާތަކާއި ކަންބޮޑުވުންތައް ހިއްސާކޮށް ގާނޫނީ ގޮތުން އެމީހުންނަށް ލިބެން ޖެހޭ ހިދުމަތްތައް ލަސްނުކޮށް ފޯރުކޮށްދިނުމަށް އެދިފައިވާ ކަމަށް ވެސް ޑާކާ ޓްރައިބިއުންގެ ރިޕޯޓުގައި ބުނެފައިވެއެވެ.

ރާއްޖެ އާއި ބަންގްލަދޭޝްއާ ދެމެދު ގައިދީން ބަދަލުކުރުމުގެ މި އެއްބަސްވުމާ ގުޅޭ ގޮތުން ދިވެހި ސަރުކާރުން އަދި ރަސްމީކޮށް އެއްވެސް މައުލޫމާތެއް އާންމުކޮށްފައެއް ނުވެއެވެ.