މިދިޔަ ބުރާސްފަތި ދުވަހުގެ ރޭ ލޯންޗަކާއި ޖެހި އެކްސިޑެންޓުވުމުން މަޑުނުކޮށް ފިލި ދޯނި ހޯދަން ފުލުހުން އާންމުންގެ އެހީތެރިކަމަށް އެދިއްޖެ އެވެ.

އެ އެކްސިޑެންޓު ހިނގީ ހިންމަފުއްޓާއި މާލެ އާއި ދެމެދު ދަތުރު ކުރާ ފެރީ ލޯންޗެއް ކަމަށްވާ "ލީޖަން 1" ނަމަކަށް ކިޔާ ލޯންޗަކާއި ދޯންޏެއް ޖެހި އެވެ. ހާދިސާ ހިނގިކަން އެނގުނީ އެކްސިޑެންޓަށް ފަހު ލޯންޗު މާލޭ އިއްޒުއްދީން ފާލަން ކައިރިއަށް ގާތް ކުރުމަށް ފަހު ފުލުހުންނަށް ރިޕޯޓު ކުރުމުންނެވެ.

Advertisement

މި އެކްސިޑެންޓު ހިނގީ އިއްޒުއްދީން ފާލަމާއި ބޭރުން ކަމަށް ފުލުހުން ބުނެ އެވެ. މި މައްސަލަ ތަހުގީގު ކުރަމުންދާއިރު އަދިވެސް ދޯނި ފެނިފައިނުވާ ކަމަށް ފުލުހުން މައުލޫމާތުދެ އެވެ.

އެހެންވެ ފުލުހުން ވަނީ މަޑުނުކޮށް ދިޔަ އުޅަނދާ ބެހޭ އެއްވެސް މައުލޫމާތެއް އެނގޭ ފަރާތެއްވާނަމަ، މެރިން ޕޮލިސް އިންވެސްޓިގޭޝަންގެ ނަންބަރު 9926094 އަށް ގުޅައި އެ މައުލޫމާތެއް ހިއްސާކުރަން އެދިފައި އެވެ. 

މި ހާދިސާގައި ލޯންޗުން ދަތުރު ކުރި ފަސް މީހަކަށް އަނިޔާވެފައިވެ އެވެ. އޭގެ ތެރެއިން ހޮސްޕިޓަލުގައި ފަރުވާ ދިނުމަށް ފަހު ދެ މީހުން ދޫކޮށްލާފައިވާއިރު އަނެއް ތިން މީހުންނަށް ދަނީ ހޮސްޕިޓަލްގައި ފަރުވާ ދެމުންނެވެ.