ދިރާގުން ކުރިއަށް ގެންދިޔަ "އެންރޯލް އެންޑް ވިން 2 ސްޕީޑްބޯޓް" ޕްރޮމޯޝަނުގެ ދެ ވަނަ އަދި ފަހު ސްޕީޑްބޯޓުގެ ނަސީބުވެރިޔާ މިއަދު ހޮވައިފިއެވެ.

މި ޕްރޮމޯޝަނުގެ ފަހު ނަސީބުވެރިޔާ ހޮވުން އޮތީ މިއަދު ހަވީރު އާޓިފިޝަލް ބީޗުގައި ތަފާތު ހަރަކާތްތަކާއި އެކު އެވެ. މިފަހަރުގެ ސްޕީޑްބޯޓު ލިބިފައިވަނީ ބޭންކް އޮފް މޯލްޑިވްސްގެ އިސް މުވައްޒަފެއް ކަމަށްވާ މާލޭ، މުޙައްމަދު ޔޫސުފަށެވެ. 

Advertisement

މިއަދުގެ ރަސްމިއްޔާތުގައި ދިރާގުގެ އިސްވެރިން ވަނީ މުހައްމަދާއި ބައްދަލުކޮށް މަރުހަބާ ކިޔާފައި އެވެ.

ދިރާގުން އޭނާއަށް ދޭން ހަމަޖައްސާފައި ވަނީ އަލް ޝާލީ މެރިން ކެނެރީ 28 މޮޑެލްގެ ސްޕޯޓްސް ސްޕީޑްބޯޓެކެވެ. އެ އުޅަނދުގައި 250 ހޯސްޕަވަރުގެ ޔަމަހާ އައުޓްބޯޑް އިންޖީނެއް އަޅާފައިވެއެވެ.

ދިރާގުން ބުނި ގޮތުގައި މިއީ މަހަށް ދިއުމާއި އެކި އެކްސްކާޝަންތަކާއި ކުރު ދަތުރުތަކަށް އެންމެ އެކަށޭނެ އުޅަނދެކެވެ.

މި ޕްރޮމޯޝަނުގެ ފުރަތަމަ ސްޕީޑްބޯޓުގެ ނަސީބުވެރިޔާ ހޮވީ މިދިޔަ ޖެނުއަރީ މަހުއެވެ. މިއީ ދިރާގުން މިދިޔަ އަހަރު ފެށި ޕްރޮމޯޝަނެކެވެ.

މި ޕްރޮމޯޝަނުގައި ބައިވެރިވެވެނީ މޮބައިލް ޕޯސްޓްޕެއިޑްގެ 450 އިން މަތީގެ ޕެކޭޖުތައް ގެންގުޅޭ ކަސްޓަމަރުންނާއި ފިކްސްޑް ބްރޯޑްބޭންޑް 40 އެމްއިން މަތީގެ ޕެކޭޖުތަކުގެ ކަސްޓަމަރުންނާއި މޮބައިލް ބްރޯޑްބޭންޑް އަދި 5ޖީ ޓާބޯގެ 540 އިން މަތީގެ ޕްލޭންތައް ގެންގުޅޭ ކަސްޓަމަރުންނަށެވެ.